អ្នកជំនួញទេសចរណ៍ «បៃតង» ខៃ ចិន្តា ទៅផ្សព្វផ្សាយតំបន់ទេសចរណ៍ខ្មែរនៅអាល្លឺម៉ង់

ជាតិ

វីដេអូ

អ្នកជំនួញទេសចរណ៍ «បៃតង» ខៃ ចិន្តា ទៅផ្សព្វផ្សាយតំបន់ទេសចរណ៍ខ្មែរនៅអាល្លឺម៉ង់

14, Mar 2019 , 8:19 pm

រូបភាព

លោកស្រី ខៃ ចិន្តា ចូលរួមពិព័រណ៍ទេសចរណ៍អន្តរជាតិ

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ លោកស្រី ខៃ ចិន្តា ម្ចាស់សណ្ឋាគារទែរូ រួមទាំងមន្ត្រីក្រសួងទេសចរណ៍, ក្រុមហ៊ុនទេសចរណ៍ និងសណ្ឋាគារជាង១០ក្រុមហ៊ុន បានចូលរួមការតាំងពិព័រណ៍ទេសចរណ៍អន្តរជាតិ (ITB BERLIN) នាទីក្រុងប៊ែកឡាំង ប្រទេសអាល្លឺម៉ង់។ ព្រឹត្តិការណ៍ពិព័រណ៍ទេសចរណ៍អន្តរជាតិនេះ មានរយៈពេល ៥ថ្ងៃ ចាប់ពីថ្ងៃទី ៦ដល់ថ្ងៃទី ១០ ខែ មីនា ដោយផ្ដល់ឱកាសដល់ប្រទេសដែលចូលរួម អាចផ្សព្វផ្សាយពីសក្ដានុពលទេសចរណ៍នៅក្នុងតំបន់ទៅកាន់ពិភពលោក។

លោកស្រី ខៃ ចិន្តា អ្នកជំនួញទេសចរណ៍ និងសណ្ឋាគារ បានប្រាប់សារព័ត៌មានថ្មីៗថា ការចូលរួមតាំងពិព័រណ៍ទេសចរណ៍អន្តរជាតិនេះ ក្នុងទិសដៅផ្សព្វផ្សាយពីតំបន់ទេសចរណ៍សក្ដានុពលរបស់កម្ពុជាដល់ទេសចរណ៍អន្តរជាតិ។ ក្នុងពិព័រណ៍ទេសចរណ៍អន្តរជាតិនេះ ប្រតិភូកម្ពុជា រួមមាន៖ មន្ត្រីក្រសួងទេសចរណ៍, ក្រុមហ៊ុនឯកជនផ្នែកទេសចរណ៍ និងផ្នែកសណ្ឋាគារ។

ពិព័រណ៍ទេសចរណ៍អន្តរជាតិ (ITB BERLIN) ដែលប្រារព្ធនៅប្រទេសអាល្លឺម៉ង់នេះ មានការចូលរួមពីគ្រប់បណ្ដាទាំងអស់នៅលើពិភពលោក ដោយជួបជុំគ្នាផ្សព្វផ្សាយពីតំបន់ទេសចរណ៍។

តាមរយៈពិព័រណ៍ទេសចរណ៍អន្តរជាតិ (ITB BERLIN) នេះ តំណាងក្រុមហ៊ុនទេសចរណ៍ និងសណ្ឋាគារ ក៏មានឱកាសស្វែងរកទីផ្សារ និងស្វែងរកក្រុមហ៊ុនដៃគូ ដោយសំដៅធ្វើយ៉ាងណាឲ្យទាក់ទាញភ្ញៀវទេសចរចាប់អារម្មណ៍ និងចង់មកកម្សាន្ត។

បើតាមលោកស្រី ខៃ ចិន្តា ប្រតិភូកម្ពុជាបានធ្វើបទបង្ហាញ និងណែនាំដល់ភ្ញៀវទេសចរពីតំបន់ទេសចរណ៍សំខាន់របស់កម្ពុជាផងដែរ។ ជាមួយគ្នានេះ ភ្ញៀវទេសចរបរទេសជាច្រើន បានចាប់អារម្មណ៍ និងមានបំណងមកដើរកម្សាន្តនៅកម្ពុជានាពេលខាងមុខផងដែរ៕