-ចេះមិនប្រើ ស្មើនឹងអត់ ខ្សត់ខ្សោះខ្សោយ
ចេះក៏ដោយ ធ្លោយឈប់អាន បានបោះបង់
ឱកាសមាស ចៀសឆ្ងាយប្រាជ្ញ អាប់ឱនអង្គ
ប្រាជ្ញប្រាប់ត្រង់ ថាអានច្រើន កើនកាក់កប។
-បានចំណេះ ចេះគិតជ្រៅ ទោះទៅទាល់
អាននាំស្គាល់ យល់ជីវិត ស្រួលស្រាយស្រប
លោកសម័យ ក្រៃចម្រើន តើនតោងតប
ទម្លាក់ដប គ្រឿងស្រវឹង ប្រឹងប្រែប្រាណ។
-ចាប់សៀវភៅ តទៅទៀត ឆ្លៀតឆ្លាស់ឈ្លាស
ត្រូវរវៀស ចៀសឈប់ខ្ជិល ខិលខកខាន
ដាក់Facebook ទុកនាំកូន ឲ្យអាចអាន
ស្រុកថ្កើងថ្កាន បានព្រោះរាស្ត្រ រួមរករៀន។
-ទាំងទន់រឹង ប្រឹងតម្រង់ ផ្ចិតផ្ចង់ភ្ជិត
រួមគ្នាគិត មឹតកំចាត់ ខ្លៅខ្លាចឃ្លាន
រាស្ត្រចេះដឹង ដឹងតែជាតិ មាំមាឌមាន
គេលែងហ៊ាន មើលស្រាលយើង ឡើងលូតលាស់៕