ជាតិ
ក្រោយទស្សនាអង្គរវត្ត លោក មូន ចេអ៊ីន ថា អច្ឆរិយទន្លេមេគង្គនឹងកើតឡើងយ៉ាងប្រាកដ
×![]()
ដោយ: តន ចាន់រិទ្ធារ៉ា
ប្រធានាធិបតីកូរ៉េខាងត្បូង មូន ចេអ៊ីន ទើបបញ្ចប់ទស្សនកិច្ចផ្លូវរដ្ឋនៅកម្ពុជានៅថ្ងៃទី១៦ ខែមីនា។ ក្រៅពីចូលគាល់ព្រះមហាក្សត្រ និងជួបចរចាជាមួយសម្ដេចនាយករដ្ឋមន្ត្រី ហ៊ុន សែន លោក មូន ចេអ៊ីន ក៏ធ្វើទស្សនាប្រាសាទពិធូរ និងប្រាសាទអង្គរវត្តក្នុងខេត្តសៀមរាបផង។ ជាមួយនឹងការស្ងើចសរសើរប្រាង្គប្រាសាទរបស់ខ្មែរ ប្រធានាធិបតីកូរ៉េខាងត្បូងរូបនេះនិយាយថា អច្ឆរិយទន្លេមេគង្គ នឹងកើតឡើងយ៉ាងប្រាកដ។
ទស្សនកិច្ចនៅតំបន់ប្រាសាទអង្គររបស់ប្រធានាធិបតី មូន ចេអ៊ីន និងភរិយា ធ្វើឡើងតាមសំណើរបស់រដ្ឋាភិបាលកម្ពុជា។ លោក មូន ដែលចាកចេញពីកម្ពុជានៅរសៀលថ្ងៃទី១៦ ខែមីនាក្រោយបញ្ចប់ទស្សនកិច្ចផ្លូវរដ្ឋបីថ្ងៃ បានបង្ហាញការគោរពចំពោះសម្បត្តិបេតិកភណ្ឌរបស់កម្ពុជា ជាមួយនឹងការនិយាយលើកសរសើរផង។
ប្រធានាធិបតីកូរ៉េខាងត្បូងបានបង្ហោះសារតាមគណនី Twitter និង Facebook ផ្លូវការរបស់ខ្លួនថា ក្ដីគោរពរបស់លោកចំពោះប្រជាជនកម្ពុជាមានកាន់តែជ្រាលជ្រៅថែមទៀត ពេលបានឈរខាងមុខប្រាសាទអង្គរវត្ត។ លោកមានអារម្មណ៍ថា ប្រទេសនីមួយៗមានសក្តានុពលផ្សេងគ្នាក្នុងការសរសេរប្រវត្តិសាស្ត្ររៀងៗខ្លួន ហើយប្រាសាទអង្គរវត្ត គឺជាអតីតកាលរបស់កម្ពុជា ហើយក្នុងពេលដំណាលគ្នានេះ ក៏ជាអនាគតរបស់កម្ពុជាដែរ។
«ខ្ញុំមានជំនឿថា អច្ឆរិយទន្លេមេគង្គនឹងកើតឡើងមិនខាន។» នេះជាការលើកឡើងរបស់ប្រធានាធិបតីសាធារណរដ្ឋកូរ៉េក្នុងសារតាម Twitter ដដែល។ លោកក៏បានអរព្រះគុណព្រះមហាក្សត្រ ព្រះករុណាសម្ដេចព្រះបរមនាថ នរោត្តម សីហមុនី និងសម្ដេចនាយករដ្ឋមន្ត្រី ហ៊ុន សែន សម្រាប់បដិសណ្ឋារកិច្ចដ៏ល្អ និងបានអនុញ្ញាតឲ្យរូបលោកបានឃើញផ្ទាល់ភ្នែកនូវអរិយធម៌ខ្មែរ៕
Tag:
មូន ចេអ៊ីន
កូរ៉េខាងត្បូង
អង្គរវត្ត
កម្ពុជា
ទន្លេមេគង្គ
© រក្សាសិទ្ធិដោយ thmeythmey.com
