អន្តរជាតិ
ប្រមុខការពារជាតិបារាំង៖ សាមគ្គីភាពរបស់ណាតូមិនអាស្រ័យលើការទិញ F-35 ពីអាមេរិកទេ រដ្ឋមន្រ្តីការពារជាតិបារាំង Florence Parly ត្រូវបានស្វាគមន៍ដោយរដ្ឋមន្រ្តីស្ដីទីក្រសួងការពារជាតិអាមេរិកនៅមន្ទីរបញ្ចកោណ។ (រូបភាព AFP)
× រដ្ឋមន្ត្រីការពារជាតិបារាំង Florence Parly នៅថ្ងៃទី១៨ ខែមីនា ប្រាប់ឲ្យអាមេរិកឈប់ដាក់លក្ខខណ្ឌលើសម្ព័ន្ធមិត្តនៅអឺរ៉ុប ខណៈទំនាក់ទំនងធ្លាប់ចាក់ទឹកមិនលិចរវាងអាមេរិក និងសម្ព័ន្ធមិត្តរបស់ខ្លួន ប្រែទៅជាល្អក់កករខ្លាំងចាប់តាំងពីលោក ដូណាល់ ត្រាំ ក្លាយជាប្រធានាធិបតីអាមេរិកមក។ លោក ត្រាំ តែងរិះគន់ប្រទេសអឺរ៉ុបដែលមិនព្រមបង្កើនការចំណាយឲ្យសម្ព័ន្ធយោធាណាតូ ហើយចង់ឈប់ពឹងណាតូទៀត។
នយោបាយដាក់សម្ពាធលើសម្ព័ន្ធមិត្តខ្លួនឯងរបស់ប្រធានាធិបតី ដូណាល់ ត្រាំ ធ្វើឲ្យសម្ព័ន្ធមិត្តអាមេរិកនៅអឺរ៉ុបអាក់អន់យ៉ាងខ្លាំង និងកំពុងតែផ្លាស់ប្ដូរផ្លូវដើររបស់ខ្លួន សំដៅកាត់បន្ថយការពឹងផ្អែកលើអាមេរិកខ្លាំងពេក ពិសេសវិស័យការពារជាតិ។ តាំងពីឡើងកាន់តំណែងមកនោះ លោក ត្រាំ តែងទាមទារឲ្យសមាជិកសម្ព័ន្ធយោធាណាតូបង្កើនការចំណាយរបស់ខ្លួន ហើយក៏រិះគន់អឺរ៉ុបមានបំណបង្កើតកម្លាំងយោធាផ្ទាល់ខ្លួនទៅទៀត។
យ៉ាងណាមិញ រដ្ឋមន្ត្រីការពារជាតិបារាំង Florence Parly ប្រាប់ឲ្យអាមេរិកត្រជាក់វិញទៅ ព្រោះបើអឺរ៉ុបមានសមត្ថភាពការពារខ្លួនឯង អាមេរិកក៏ធូរទាំងកម្លាំង ទាំងហិរញ្ញវត្ថុដែរ ស្របពេលផ្ដោតការយកចិត្តទុកលើតំបន់ផ្សេងដូចជាអាស៊ី និងមជ្ឈិមបូព៌ា។ ថ្លែងទៅកាន់ក្រុមប្រឹក្សាអាត្លង់ទិកនៅថ្ងៃទី១៨ ខែមីនា លោកស្រី Parly និយាយថា ការបង្កើតស្វ័យភាពរបស់អឺរ៉ុប មិនគួរត្រូវបានមើលឃើញថាការប្រឆាំងអាមេរិក ឬក៏ជាមូលហេតុដែលអាមេរិកលែងរាប់រកអឺរ៉ុបនោះដែរ។
បន្ទាប់ពីការឡើងដឹកនាំប្រទេសនៅដើមឆ្នាំ២០១៧ រដ្ឋបាលលោក ត្រាំ តែងស្នើឲ្យសម្ព័ន្ធមិត្តរបស់ខ្លួនបង្កើនការបញ្ជាទិញគ្រឿងបរិក្ខារយោធាឲ្យបានច្រើនថែម ខណៈបច្ចុប្បន្ននេះ យុទ្ធោបករណ៍របស់សមាជិកសម្ព័ន្ធណាតូដ៏ច្រើនលើសលប់ ត្រូវបានផ្គត់ផ្គង់ដោយអាមេរិក។ បើតាមការលើកឡើងរបស់លោកស្រី Parly យន្តហោះចាក់សាំងរបស់ណាតូ៩១ភាគរយ ជារបស់អាមេរិក ខណៈយន្តហោះទម្លាក់គ្រាប់បែកយុទ្ធសាស្ត្រ និងប្រព័ន្ធការពារមីស៊ីលជាផលិតផលអាមេរិកទាំងស្រុង។
សម្រាប់ប្រមុខការពារជាតិបារាំង ការពឹងផ្អែកលើអាមេរិកខ្លាំងបែបនេះ ជាបញ្ហា ឯការបង្កើនឯករាជ្យភាពវិញ ជារឿងល្អមួយទៅវិញ។ មន្ត្រីបារាំងរូបនេះក៏បារម្ភដែរថា អាមេរិកអាចប្រើប្រាស់ការទិញសព្វាវុធពីខ្លួនដើម្បីធ្វើជាលក្ខខណ្ឌវាស់ស្ទង់សាមគ្គីភាពរបស់ណាតូ។ ប៉ុន្តែលោកស្រី Parly អះអាងថា សាមគ្គីភាពរបស់ណាតូ គឺនៅក្នុងមាត្រា៥ មិនមែនលើការទិញយន្តហោះ F-35 ពីអាមេរិកទើបមានសាមគ្គីភាពឡើយ។
មាត្រា៥ នៃសន្ធិសញ្ញាអាត្លង់ទិកចែងពីការជួយគ្នាទៅវិញទៅមកក្នុងចំណោមសមាជិកណាតូ។ ពោល គឺការវាយប្រហារលើសមាជិកណាមួយ មានស្មើនឹងការវាយប្រហារណាតូទាំងមូលដែរ ហើយដែលសមាជិកផ្សេងទៀតត្រូវឆ្លើយតបព្រមគ្នា។
ជុំវិញយន្តហោះ F-35 នេះ អាល្លឺម៉ង់បានបដិសេធទិញយន្តហោះអាមេរិកដើម្បីប្រើជំនួសយន្តហោះរបស់ខ្លួនដែលហួសសម័យ។ ជំនួសមកវិញ ក្រុងបែរឡាំងចង់លើកកម្រិតសមត្ថភាពយន្តហោះមានស្រាប់របស់ខ្លួនតាមរយៈការទិញយន្តហោះ Eurofighter Typhoon ដែលផលិតរួមគ្នាដោយបារាំង និងអាល្លឺម៉ង់ ឬក៏ F-18 របស់ក្រុមហ៊ុនប៊ូអ៊ីង៕
Tag:
អាមេរិក
បារាំង
ណាតូ
Florence Parly
© រក្សាសិទ្ធិដោយ thmeythmey.com