អន្តរជាតិ
Brexit៖ នាយករដ្ឋមន្ត្រី ម៉េយ៍ នឹងមិនសុំអឺរ៉ុបលើកពេលចាកចេញយូរឡើយ
× នាយករដ្ឋមន្ត្រីអង់គ្លេស ថេរ៉េសា ម៉េយ៍ នឹងមិនសុំសហភាពអឺរ៉ុបលើកពេលចាកចេញយូរឡើយ ក្នុងករណីអង់គ្លេសមិនមានកិច្ចព្រមព្រៀងទាន់ពេលនោះ។ ជាផ្លូវការ ចក្រភពអង់គ្លេសត្រូវចាកចេញពីសហភាពអឺរ៉ុបនៅថ្ងៃទី២៩ ខែមីនា ខាងមុខ។ ប៉ុន្តែមកទល់ពេលនេះ រដ្ឋាភិបាលអង់គ្លេសនៅតែមិនអាចទទួលភ្លើងខៀវពីសភាជុំវិញកិច្ចព្រមព្រៀងចាកចេញនៅឡើយ ដ្បិតសភាបានបោះឆ្នោតបដិសេធសំណើពីរដងទៅហើយ។
នៅសល់តែ៩ថ្ងៃទៀតប៉ុណ្ណោះ ចក្រភពអង់គ្លេសត្រូវចាកចេញពីសហភាពអឺរ៉ុបហើយទោះមានឬមិនមានកិច្ចព្រមព្រៀងក៏ដោយ។ តែមកដល់ថ្ងៃទី២០ ខែមីនា កិច្ចព្រមព្រៀងដែលរដ្ឋាភិបាលនាយករដ្ឋមន្ត្រី ថេរ៉េសា ម៉េយ៍ ប្រឹងចរចាជាមួយសហភាពអឺរ៉ុប នៅតែមិនអាចឆ្លងសភាបានដដែល។ លទ្ធភាពដែលពន្យារពេលចាកចេញដើម្បីទុកពេលចរចារកកិច្ចព្រមព្រៀងឲ្យសក្តិសម ជាជម្រើសទីមួយសម្រាប់លោក ម៉េយ៍ ។
ស្ថានភាពនយោបាយនៅអង់គ្លេស ធ្វើឲ្យប្រជាជនមិនពេញចិត្តឡើយ។ ការិយាល័យ 10 Downing Street របស់លោកស្រី ម៉េយ៍ ចេញមកបង្ហាញការខកចិត្តដូចគ្នាចំពោះសភាដែលនៅតែមិនអាចសម្រេចចិត្តអ្វីបាន។ ជុំវិញការពន្យារពេលចាកចេញវិញ ការិយាល័យនាយករដ្ឋមន្ត្រីអង់គ្លេសប្រកាសថា លោកស្រី ម៉េយ៍ នឹងមិនសុំអឺរ៉ុបពន្យារពេលលែងលះគ្នាយូរឡើយ បើសិនជាលោកស្រីជូនដំណឹងពីសំណើលើកពេលនេះទៅអឺរ៉ុបផ្លូវការ។
បើតាមសារព័ត៌មាន BBC ការិយាល័យលោកស្រី ម៉េយ៍ ពន្យល់ថា សភាត្រូវការពេលបន្ថែមដើម្បីយល់ព្រមលើបញ្ហានេះ ប៉ុន្តែប្រជាជនអង់គ្លេសរង់ចាំអស់ពេលជិតបីឆ្នាំទៅហើយ។ ខណៈកិច្ចព្រមព្រៀងជាមួយអឺរ៉ុបត្រូវបានសភាទាត់ចោលពីរដងហើយនោះ លោកស្រី ម៉េយ៍ ចង់ឲ្យសភាបោះឆ្នោតម្ដងទៀត។ សម្រាប់ការបោះឆ្នោតចុងក្រោយនេះ ទោះសភាយល់ព្រមក្ដី លោកស្រីនៅតែសុំពន្យារពេលដដែល ដើម្បីទុកពេលឲ្យសភាធ្វើតាមនីតិវិធីច្បាប់សេសសល់។
តាមពិតទៅ បើរដ្ឋាភិបាលអង់គ្លេសចង់លើកពេលចាកចេញយូរ ក៏អឺរ៉ុបទំនងជាមិនព្រមដែរ។ តំណាងចរចារបស់អឺរ៉ុប Michel Barnier និយាយថា អឺរ៉ុបមិនឯកភាពលើការពន្យារពេលឡើយ បើគ្មានផែនការជាក់លាក់ពីអង់គ្លេស។ ការលើកពេលវែង ឬខ្លីណាមួយ ត្រូវមានការយល់ព្រមពីសមាជិកអឺរ៉ុបទាំង២៧ប្រទេសសិន។ លោកស្រីនាយករដ្ឋមន្ត្រី ម៉េយ៍ នឹងធ្វើដំណើរទៅកាន់ទីក្រុងព្រុចសែលនៅថ្ងៃទី២១ ខែមីនា ដើម្បីជជែកពីបញ្ហានេះជាមួយអឺរ៉ុប។
ការបោះឆ្នោតលើកទីបីលើកិច្ចព្រមព្រៀងចាកចេញ នឹងធ្វើនៅសប្ដាហ៍ក្រោយ។ ប៉ុន្តែប្រធានសភាអង់គ្លេស John Bercow ប្រកាសទុកមុនថា បើលោកស្រី ម៉េយ៍ ដាក់កិច្ចព្រមព្រៀងដដែល លោកនឹងមិនអាចអនុញ្ញាតឲ្យមានការបោះឆ្នោតអ្វីឡើយ។ យ៉ាងណាមិញ នាយករដ្ឋមន្ត្រីអង់គ្លេស ក៏ធ្លាប់បញ្ជាក់ដែរថា បើសភាមិនផ្ដល់ភ្លើងខៀវទេនោះ ការចាកចេញក៏នឹងត្រូវពន្យារពេលយូរតាមនឹងដែរ៕
Tag:
Brexit
អឺរ៉ុប
ថេរ៉េសា ម៉េយ៍
© រក្សាសិទ្ធិដោយ thmeythmey.com