អន្តរជាតិ
អតីតមន្ត្រីជាន់ខ្ពស់ហ្វីលីពីនប្ដឹងលោក ស៊ី ពីបទឧក្រិដ្ឋកម្មប្រឆាំងមនុស្សជាតិនៅសមុទ្រចិនខាងត្បូង រូបភាព Xinhua
× អតីតមន្ត្រីជាន់ខ្ពស់ហ្វីលីពីនពីររូប រួមនឹងក្រុមអ្នកនេសាទ បានប្ដឹងប្រធានាធិបតីចិន ស៊ី ជិនភីង ទៅកាន់តុលាការព្រហ្មទណ្ឌអន្តរជាតិ (ICC) ពីបទឧក្រិដ្ឋកម្មប្រឆាំងមនុស្សជាតិដែលកើតឡើងនៅសមុទ្រចិនខាងត្បូង។ ក្នុងពាក្យបណ្ដឹងនេះ លោក ស៊ី ត្រូវរងការចោទថា បានបង្កផលប៉ះពាល់ដល់អ្នកនេសាទហ្វីលីពីន និងមកពីប្រទេសផ្សេង ក៏ដូចជាពលរដ្ឋប្រទេសជាច្រើនដែលអាស្រ័យផលពីធនធាននៃតំបន់សមុទ្រមួយនេះ។
អតីតរដ្ឋមន្ត្រីការបរទេសហ្វីលីពីន Albert del Rosario និងអតីតមន្ត្រីត្រួតពិនិត្យ Conchita Carpio Morales ជាមួយនឹងអ្នកនេសាទមួយក្រុម បានដាក់ពាក្យបណ្ដឹងរបស់ខ្លួនទៅកាន់តុលាការព្រហ្មទណ្ឌអន្តរជាតិកាលពីថ្ងៃទី១៥ ខែមីនាកន្លងទៅ។ ម្ចាស់បណ្ដឹងទាំងបីនេះ ប្រាប់ការិយាល័យរដ្ឋអាជ្ញាតុលាការអន្តរជាតិថា ប្រធានាធិបតីចិន ស៊ី ជិនភីង និងមន្ត្រីចិនផ្សេងទៀត ប្រព្រឹត្តបទឧក្រិដ្ឋពាក់ព័ន្ធការបំផ្លាញធនធានបរិស្ថានទ្រង់ទ្រាយធំនៅសមុទ្រចិនខាងត្បូង។
បើតាមសារព័ត៌មាន Rappler លោ Rosario លោកស្រី Morales និងជនជាតិហ្វីលីពីនដទៃទៀតអះអាងថា ការខូចខាតបរិស្ថានេះ កើតឡើងនៅពេលប្រធានាធិបតីចិន និងមន្ត្រីរបស់ខ្លួនអនុវត្តផែនការជាប្រព័ន្ធដើម្បីក្ដោបក្ដាប់សមុទ្រចិនខាងត្បូង។ បើតាមពាក្យបណ្ដឹង សកម្មភាពបំពាននេះ បង្កើតទៅជាផលប៉ះពាល់ធ្ងន់ធ្ងរដល់អ្នកនេសាទហ្វីលីពីនដែលពឹងផ្អែកលើការនេសាទដើម្បីការរស់នៅរបស់ពួកគេ។
លើសពីនោះ ទង្វើរបស់ចិន ក៏នាំឲ្យមានផលប៉ះពាល់ដល់ជីវភាពរបស់ប្រជាជននៅជុំវិញសមុទ្រចិនខាងត្បូងទាំងពេលបច្ចុប្បន្ន និងថ្ងៃអនាគតរាប់ទាំងប្រជាជនហ្វីលីពីនផងតាមរយៈការជំរុញល្បឿនហន្តរាយផលនេសាទ ហើយចុងក្រោយក៏ធ្វើឲ្យមានការខ្វះខាតចំណីអាហារនៅតាមប្រទេសជាច្រើន។ នេះបើតាមពាក្យបណ្ដឹងដដែល។
ម្ចាស់បណ្ដឹងទាំងនេះ លើកឡើងថា តុលាការអន្តរជាតិ និងអចិន្ត្រយ៍មួយនេះ មានយុត្តាធិការលើករណីនេះ ព្រោះសកម្មភាពមន្ត្រីចិនកើតឡើងអំឡុងពេលហ្វីលីពីននៅជាភាគីនៃលក្ខន្តិកៈទីក្រុងរ៉ូមនៅឡើយ។ ហ្វីលីពីនដែលខឹងរដ្ឋអាជ្ញា ICC បើកការស៊ើបអង្កេតបឋមក្នុងសំណុំរឿងយុទ្ធនាការបោសសម្អាតគ្រឿងញៀននោះ បានចាកចេញជាផ្លូវការពីស្ថាប័នយុត្តិធម៌ពិភពលោកមួយនេះនៅថ្ងៃទី១៧ ខែមីនាកន្លងទៅ។
អតីតប្រមុខការទូតហ្វីលីពីន អតីតមន្ត្រីអធិការកិច្ច ព្រមទាំងអ្នកនេសាទ បានស្នើឲ្យរដ្ឋអាជ្ញា ICC ពិចារណាបណ្ដឹងរបស់ខ្លួន មុននឹងចាប់ផ្ដើមការស៊ើបអង្កេតបឋម រួចបើកការស៊ើបអង្កេតពេញលេញតែម្ដង។ យ៉ាងណាមិញ ចិនមិនមែនជាភាគីនៃលក្ខន្តិកៈទីក្រុងរ៉ូមឡើយ ដែលវាអាចបង្កជាឧបសគ្គសម្រាប់ដំណើរការក្ដីនេះ។ ម្យ៉ាងទៀត គេក៏មិនរំពឹងថា ចិននឹងសហការក្នុងសំណុំរឿងនេះឡើយ៕
Tag:
ហ្វីលីពីន
ចិន
ស៊ី ជិនភីង
សមុទ្រចិនខាងត្បូង
© រក្សាសិទ្ធិដោយ thmeythmey.com