ជាតិ
ចិនសន្យាជួយសាងសង់រោងចក្រអគ្គិសនីដើរដោយថាមពលព្រះអាទិត្យ និងខ្យល់នៅកម្ពុជា រូបភាពពីក្រសួងព័ត៌មាន
× ភ្នំពេញ៖ រដ្ឋាភិបាលចិន បានសន្យាជួយសាងសង់រោងចក្រផលិតអគ្គីសនីដើរដោយព្រះអាទិត្យ និងខ្យល់នៅកម្ពុជាខាងមុននេះ ដើម្បីផ្គត់ផ្គង់អគ្គិសនីកម្ពុជាតាមតម្រូវការ។ ការសន្យានេះធ្វើឡើងនៅពេលលោក kong Xuanyou អនុរដ្ឋមន្រី្តការបរទេសចិនជួបលោក ហោ ណាំហុង ឧបនាយករដ្ឋមន្ត្រី នៅវិមានសន្តិភាព កាលពីថ្ងៃទី២១មីនា ។ នេះបើតាមគេហទំព័រក្រសួងព័តមាន។
លោក kong Xuanyou បាននិយាយថា វារីអគ្គិសនីនៅខេត្តកោះកុង ដែលចិនសាងសង់កន្លងមក អាចនឹងមានបញ្ហា ដោយសារការប្រែប្រួលអាកាសធាតុ និងការខ្វះខាតទឹក ដែលជាហេតុធ្វើឲ្យការផលិតអគ្គិសនីប្រើប្រាស់មិនគ្រប់គ្រាន់នៅកម្ពុជា។ ដោយសារមើលឃើញពីបញ្ហានេះ ទើបអនុរដ្ឋមន្រី្តការបរទេសចិនរូបនេះ សន្យាជួយសាងរោងចក្រសង់អគ្គិសនីដើរដោយថាមពលព្រះទិត្យ និងខ្យល់នៅពេលខាងមុខ។
ឆ្លើយតបការសន្យានេះ លោក ហោ ណាំហុង ចាត់ទុកថា គម្រោងសាងសង់អគ្គិសនីដើរដោយព្រះអាទិត្យ និងខ្យល់នេះ ដែលចិនគ្រោងជួយកម្ពុជានេះ ពិតជាមានសារៈសំខាន់សម្រាប់កម្ពុជា ដែលនៅខ្វះខាតអគ្គិសនីផ្គត់ផ្គងតម្រូវការ។
បច្ចុប្បន្នកម្ពុជាប្រភពអគ្គិសនីក្នុងស្រុករបស់កម្ពុជាជាង ១.៦០០ មេហ្គាវ៉ាត់ ដែលក្នុងនោះមានការនាំចូលប្រភពអគ្គិសនីជាង ៤០០មេហ្គាវ៉ាត់ពីប្រទេសជិតខាង។
កម្ពុជា មានទំនប់វារីអគ្គិសនីមួយចំនួន រួមមានវារីគិរីរម្យ ១ នៅខេត្តកំពង់ស្ពឺ មានអនុភាព ១២ មេហ្កាវ៉ាត់ ដែលបានដាក់ដំណើរការនៅឆ្នាំ ២០០២ ។ វារីអគ្គិសនីកំចាយ ស្ថិតក្នុងស្រុកទឹកឈូ ខេត្តកំពត ដែលមានអនុភាព ១៩៣,២ មេហ្កាវ៉ាត់ បានបើកឲ្យដំណើរការ កាលពីថ្ងៃទី៧ ខែធ្នូ ឆ្នាំ២០១១។វារីអគ្គិសនីគិរីរម្យ៣ មានទីតាំងស្ថិតនៅតាមស្ទឹងពង្រូល ក្នុងឃុំដងពែង ស្រុកស្រែអំបិល ខេត្តកោះកុង អាចផលិតថាមពល ១៨មេហ្គាវ៉ាត់ ដែលដាក់ប្រើប្រាស់នៅឆ្នាំ២០១៣។វារីអគ្គិសនីស្ទឹងអាតៃ ស្ថិតក្នុងភូមិឆាយលូក ឃុំអូរសោម ស្រុកវាលវែង ខេត្តពោធិ៍សាត់ មានកម្លាំង១២០មេហ្កាវ៉ាត់ ដែលដាក់ប្រើប្រាស់កាលឆ្នាំ២០១៤។វារីអគ្គិសនីស្ទឹងតាតៃ ស្ថិតនៅខេត្តកោះកុងកម្លាំង ២៤៦ មេហ្គាវ៉ាត់ ដំណើរការនៅចុង២០១៥ ដែលអាចផ្គត់ផ្គង់អគ្គិសនី ២៤៦ មេហ្គាវ៉ាត់។ វារីអគ្គិសនីស្ទឹងឫស្សីជ្រុំក្រោម មានកម្លាំងអគ្គិសនី ៣៣៨មេហ្គាវ៉ាត់ ស្ថិតនៅតំបន់ជួរភ្នំក្រវ៉ាញ ស្ថិតក្នុងឃុំបាក់ខ្លង ស្រុកមណ្ឌលសីមា ខេត្តកោះកុង និងទំនប់វារីអគ្គិសនីសេសានក្រោមពីរ ដែលអាចផ្គត់ផ្គង់អគ្គិសនី ៤០០មេហ្គាវ៉ាត់ នៅខេត្តស្ទឹងត្រែង៕
© រក្សាសិទ្ធិដោយ thmeythmey.com