លោក មហាធៀ គំរាមទិញយន្តហោះពីចិន បើអឺរ៉ុបលែងឲ្យនាំចូលដូងប្រេង

អន្តរជាតិ

លោក មហាធៀ គំរាមទិញយន្តហោះពីចិន បើអឺរ៉ុបលែងឲ្យនាំចូលដូងប្រេង

25, Mar 2019 , 2:27 pm

រូបភាព

ដោយ: តន ចាន់រិទ្ធារ៉ា

នាយករដ្ឋមន្ត្រីម៉ាឡេស៊ី មហាធៀ មហាម៉ាត់ បានចេញមុខព្រមានសហភាពអឺរ៉ុបដោយផ្ទាល់ជុំវិញការចាត់វិធានការរឹតត្បិតការនាំចូលដូងប្រេងចូលទីផ្សារអឺរ៉ុប។ ម៉ាឡេស៊ីដែលជាប្រទេសនាំចេញដូងប្រេងធំទីពីរលើពិភពលោកបន្ទាប់ពីឥណ្ឌូណេស៊ី មិនពេញចិត្តឡើយផែនការរបស់សហភាពអឺរ៉ុបដែលចង់លែងនាំចូលដូងប្រេងសម្រាប់ការផលិតជីវថាមពលក្រោមហេតុផលបរិស្ថាន។ លោក មហាធៀ គំរាមឈប់ប្រើទំនិញអឺរ៉ុបរាប់ទាំងយន្តហោះចម្បាំងផង បើអឺរ៉ុបបន្តផែនការខ្លួន។

បិទការនាំចូលដូងប្រេង ម៉ាឡេស៊ីនឹងលែងទិញយន្តហោះពីអឺរ៉ុប។ នេះជាការព្រមានរបស់លោក មហាធៀ មហាម៉ាត់ នាយករដ្ឋមន្ត្រីម៉ាឡេស៊ីទៅនឹងផែនការរបស់សភាអឺរ៉ុបដែលជំរុញឲ្យមានការហាមប្រាមការនាំចូលដូងប្រេងក្នុងវិស័យថាមពល។ គម្រោងរបស់អឺរ៉ុបដែលចាប់ផ្ដើមពីឆ្នាំ២០២៣ ធ្វើឲ្យម៉ាឡេស៊ី និងឥណ្ឌូណេស៊ីដែលការនាំចេញដូងប្រេងរួមគ្នាស្មើនឹង៨០ភាគរយនៃការនាំចេញទូទាំងពិភពលោក ជំទាស់យ៉ាងខ្លាំង។

ទាំងម៉ាឡេស៊ី ទាំងឥណ្ឌូណេស៊ី បានគំរាមចាត់វិធានការស្រដៀងគ្នា គឺឈប់ទិញទំនិញរបស់អឺរ៉ុប។ សម្រាប់ម៉ាឡេស៊ី លោក មហាធៀ បានផ្ញើសារគំរាមខ្លាំងៗថា នឹងងាកទៅរកទីផ្សារផ្សេងវិញដើម្បីទិញយន្តហោះចម្បាំងថ្មីជំនួយយន្តហោះស៊េរីចាស់ Mig-29 របស់រុស្ស៊ី។ កន្លងមក ក្រុងគូឡាឡាំពួ សម្លឹងឃើញយន្តហោះរបស់បារាំង Rafale និងយន្តហោះអឺរ៉ុប Eurofighter Typhoon ក្នុងការធ្វើទំនើបកម្មកងទ័ពរបស់ខ្លួន។

អត្ថបទទាក់ទង

ឥណ្ឌូណេស៊ីនិងម៉ាឡេស៊ី ព្រមានអឺរ៉ុប បើហ៊ានបិទការនាំចូលដូងប្រេង

យ៉ាងណាមិញ ការគំរាមរបស់លោក មហាធៀ អាចធ្វើឲ្យអឺរ៉ុបបាត់បង់អតិថិជនសក្ដានុពលរបស់ខ្លួន។ បើតាមការផ្សាយរបស់ទីភ្នាក់ងារព័ត៌មានរដ្ឋ Bernama នាយករដ្ឋមន្ត្រីម៉ាឡេស៊ីរូបនេះព្រមានថា បើអឺរ៉ុបនៅតែបន្តអនុវត្តផែនការរបស់ខ្លួន ម៉ាឡេស៊ីនឹងគិតគូរទិញយន្តហោះចម្បាំងពីចិន ឬប្រទេសផ្សេងវិញ។ ប៉ុន្តែលោកមិនចាត់ទុកការឆ្លើយតបនេះ ជាប្រកាសសង្គ្រាមឡើយ ដ្បិតរដ្ឋអឺរ៉ុបជាដៃគូពាណិជ្ជកម្មសំខាន់របស់ម៉ាឡេស៊ី។

មន្ត្រីក្រុងហ្សាការតា និងក្រុងគូឡាឡាំពួ ធ្លាប់ព្រមានរួចហើយពីហានិភ័យរបស់វិធានការអឺរ៉ុបលើវិស័យដូងប្រេងនេះ។ កម្មករដូងប្រេងរាប់លាននាក់ ដែលពឹងអាស្រ័យលើផលិតកម្មដូងប្រេង នឹងរងគ្រោះព្រោះជីវភាពរបស់ពួកគេពឹងផ្អែកលើការដាំដុះដូងប្រេង ហើយវានឹងប៉ះពាល់ដល់ការកាត់បន្ថយភាពក្រីក្រផងដែរ។ នេះជាអ្វីដែលឥណ្ឌូណេស៊ីព្រមានអឺរ៉ុប។ ប្រទេសនាំចេញដូងប្រេងទាំងពីរ ក៏មានផែនការលើកបញ្ហានេះទៅដោះស្រាយនៅអង្គការពាណិជ្ជកម្មពិភពលោកដែរ។

ដូងប្រេង ជាផលិតផលនាំចេញដ៏សំខាន់មួយរបស់ឥណ្ឌូណេស៊ី និងម៉ាឡេស៊ី។ រដ្ឋតំបន់អាស៊ីអាគ្នេយ៍ទាំងពីរបានប្រឹងប្រែងជំរុញការនាំចេញរូបធាតុដើមមួយនេះដែលត្រូវបានប្រើប្រាស់ក្នុងការផលិតវត្ថុជាច្រើនដូចជាសាប៊ូ និងសូកូឡាជាដើម។ ប៉ុន្តែអឺរ៉ុបវិញបានព្រួយបារម្ភពីការពង្រីកដីដាំដុះរុក្ខជាតិមួយនេះលើបរិស្ថាន ពិសេសការកាប់បំផ្លាញព្រៃឈើដើម្បីយកដីតែម្ដង។ លើសពីនោះ ការឆេះព្រៃដូងប្រេងក៏បង្កជាផលប៉ះពាល់ធ្ងន់ធ្ងរដល់បរិយាកាសដែរ៕