កីឡាជាតិ
ជាតិ
Smart RSN Stadium ជាឈ្មោះកីឡដ្ឋានរបស់ក្លិបភ្នំពេញក្រោន កីឡដ្ឋាន RSN, រូបភាពពីក្លិបបាល់ទាត់ភ្នំពេញក្រោន
× ក្លិបបាល់ទាត់ភ្នំពេញក្រោន បានប្រកាសឈ្មោះកីឡដ្ឋានរបស់ខ្លួន ដោយបន្ថែមពាក្យ Smart នៅពីមុខពាក្យ RSN។ RSN ដែលយោងតាមឈ្មោះម្ចាស់ក្លិប លោក ឬទ្ធី សំណាង ជាភាសាឡាតាំង (Rithy Samnang) ត្រូវបានប្រើប្រាស់តាំងពីឆ្នាំ២០១៥មក ហើយបានប្តូរទៅជា Smart RSN Stadium។
ឈ្មោះកីឡដ្ឋាននេះ ត្រូវបានប្រកាសជាផ្លូវការក្នុងពិធីបង្ហាញឯកសណ្ឋានសម្រាប់រដូវកាលឆ្នាំ២០១៩ កាលពីយប់ថ្ងៃទី២៥ ខែមីនា នៅក្លិបភ្នំពេញក្រោនផ្ទាល់ ជាមួយនឹងកម្មវិធីប្រគំតន្ត្រី The Singha’s Step។
ក្នុងឱកាសនោះ ក្លិបបាល់ទាត់ភ្នំពេញក្រោន ក៏បានបង្ហាញឯកសណ្ឋានប្រកួតក្នុងនិងក្រៅទឹកដីសម្រាប់រដូវកាលឆ្នាំ២០១៩ ផងដែរ។ ឯកសណ្ឋានរបស់ក្លិបភ្នំពេញក្រោនមាន៣ពណ៌ ក្នុងនោះពណ៌ក្រហមឆ្នូតសសម្រាប់ប្រកួតក្នុងដី ពណ៌បៃតងឆ្នូតសប្រកួតក្រៅដី និងពណ៌សម្រាប់អ្នកចាំទី។
លោក ឬទ្ធី សំណាង ប្រធានក្លិបបាល់ទាត់ភ្នំពេញក្រោនបានចំណាយធនធានរាប់លានដុល្លារក្នុងការសាងសង់កីឡដ្ឋានដែលមានឈ្មោះថា RSN Stadium ក្នុងអំឡុងឆ្នាំ២០១៥។ កីឡដ្ឋាន ដែលអាចផ្ទុកអ្នកទស្សនាជាង៥ពាន់នាក់នេះ សាងសង់ឡើងដើម្បីបំពេញតាមបទដ្ឋានកំណត់របស់សហព័ន្ធកីឡាបាល់ទាត់អាស៊ី ក្នុងការប្រែខ្លួនជាក្លិបបាល់ទាត់អាជីពនៅកម្ពុជា។ បច្ចុប្បន្នភ្នំពេញក្រោនមានទីលានក្រាលស្មៅធម្មជាតិចំនួនពីរ និងក្រាលស្មៅសិប្បនិម្មិតសម្រាប់កម្តៅសាច់ដុំមួយ៕
Tag:
បាល់ទាត់
ភ្នំពេញក្រោន
កីឡដ្ឋាន RSN
© រក្សាសិទ្ធិដោយ thmeythmey.com