អន្តរជាតិ
លោក ត្រាំ រងការរិះគន់ក្រោយទទួលស្គាល់ «ខ្ពង់រាបហ្គោឡង់» ជាកម្មសិទ្ធិអ៊ីស្រាអែល លោក ដូណាល់ ត្រាំ ទទួលស្គាល់ទឹកដីហ្គោឡង់ជាកម្មសិទ្ធិអ៊ីស្រាអែល។ (រូបភាព AFP)
× ប្រធានាធិបតីអាមេរិក ដូណាល់ ត្រាំ នៅថ្ងៃទី២៥ ខែមីនា បានប្រកាសកម្មសិទ្ធិរបស់អ៊ីស្រាអែលលើតំបន់ខ្ពង់រាបហ្គោឡង់ ដែលដណ្ដើមបានស៊ីរី។ ការប្រកាសទទួលស្គាល់បែបនេះ រងប្រតិកម្មយ៉ាងខ្លាំងពីសំណាក់សហគមន៍អន្តរជាតិ ពិសេសស៊ីរីដែលជាម្ចាស់ទឹកដីនេះផ្ទាល់។ ប៉ុន្តែអ៊ីស្រាអែលឯណោះវិញ សប្បាយចិត្តយ៉ាងខ្លាំង ដោយនាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ ប្រដូចលោក ត្រាំ ទៅនឹងមេដឹកនាំល្បីរបស់អាមេរិកទៀត។
នៅចំពោះមុខនាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ ប្រធានាធិបតីអាមេរិក ដូណាល់ ត្រាំ បានចុះហត្ថលេខាលើសេចក្ដីប្រកាសទទួលស្គាល់ខ្ពង់រាបហ្គោឡង់ជាកម្មសិទ្ធិអ៊ីស្រាអែលពេញទី។ អ៊ីស្រាអែល បានត្រួតត្រាតំបន់យុទ្ធសាស្ត្រមួយនេះក្នុងសង្គ្រាម៦ថ្ងៃឆ្នាំ១៩៦៧ ជាមួយរដ្ឋមជ្ឈិមបូព៌ាផ្សេងទៀត។ អ៊ីស្រាអែល បានបញ្ចូលខ្ពង់រាបនេះជាទឹកដីរបស់ខ្លួនក្នុងឆ្នាំ១៩៨១ តែគ្មាននរណាទទួលស្គាល់ឡើយ។
ក្រោយការចុះហត្ថលេខារបស់លោក ត្រាំ លោក ណេតាន់យ៉ាហ៊ូ ចាត់ទុកការទទួលស្គាល់នេះ ជារឿងប្រវត្តិសាស្ត្រ។ ប្រមុខរដ្ឋាភិបាលអ៊ីស្រាអែលរូបនេះ ថែមទាំងប្រដូចលោក ត្រាំ ទៅនឹងអតីតប្រធានាធិបតី ហារី ទ្រូម៉ាន់ ដែលទទួលស្គាល់រដ្ឋអ៊ីស្រាអែល និងស្ដេចនគរពែក្ស Cyrus the Great ដែលរំដោះជនជាតិជ្វីហ្វនៅបាប៊ីឡោនផង។ លោក ណេតាន់យ៉ាហ៊ូ អះអាងថា អ៊ីស្រាអែលគ្រប់គ្រងខ្ពង់រាបហ្គោឡង់ក្នុងសង្គ្រាមដើម្បីការពារខ្លួន។
ការសម្រេចចិត្តរបស់លោក ត្រាំ ជារឿងល្អសម្រាប់អ៊ីស្រាអែល ពិសេសលោក ណេតាន់យ៉ាហ៊ូ ប៉ុន្តែអាមេរិកឯណេះបែរជាឯកោលើឆាកអន្តរជាតិទៅវិញ។ សហគមន៍អន្តរជាតមិនដែលទទួលស្គាល់កម្មសិទ្ធិរបស់អ៊ីស្រាអែលលើខ្ពង់រាបនេះឡើយ សម្ព័ន្ធអាមេរិកមានបារាំង និងអង់គ្លេស ក៏ដូចជាអង្គការសហប្រជាជាតិផងនោះ នៅតែប្រើពាក្យតំបន់គ្រប់គ្រងដោយអ៊ីស្រាអែលដើម្បីហៅខ្ពង់រាបមួយនេះតាមការសម្រេចរបស់អង្គការសហប្រជាជាតិ។
ស៊ីរីដែលជាម្ចាស់ទឹកដីហ្គោឡង់ បានប្រតិកម្មយ៉ាងខ្លាំង។ ក្រុងដាម៉ាស់ចាត់ទុកសកម្មភាពអាមេរិកជាការបំពានលើអធិបតេយ្យរបស់ខ្លួន ហើយអាមេរិកក៏គ្មានសិទ្ធិអំណាចអ្វីទៅរកផ្ដល់ភាពស្របច្បាប់ឲ្យអ៊ីស្រាអែលដែរ។ តួកគីឯណោះវិញ ក៏ចេញមុខរិះគន់អាមេរិកដែរ។ រដ្ឋមន្ត្រីការបរទសតួកគី Mevlut Cavusoglu ហៅការសម្រេចចិត្តរបស់អាមេរិក ជាការផ្ដល់អំណោយដល់លោក ណេតាន់យ៉ាហ៊ូ ដែលត្រៀមប្រជែងការបោះឆ្នោតខែក្រោយប៉ុណ្ណោះ។
នេះជាទង្វើចម្រូងចម្រាសលើកទីពីររបស់អាមេរិកក្នុងសំណុំរឿងអ៊ីស្រាអែល។ រឿងទីមួយ គឺលោកប្រធានាធិបតីរូបនេះ បានធ្វើឲ្យផ្អើលមួយពិភពលោកតាមរយៈការប្ដូរស្ថានទូតអាមេរិកប្រចាំអ៊ីស្រាអែលទៅកាន់ទីក្រុងហ្ស៊េរុយសាឡិមវិញ ដែលមានន័យស្មើនឹងការទទួលស្គាល់ទីក្រុងពិសិដ្ឋនេះជាកម្មសិទ្ធិអ៊ីស្រាអែលទាំងស្រុង ទោះជាប៉ាឡេស្ទីន បានទាមទារចំណែកភាគកើតដើម្បីទុកធ្វើជារដ្ឋធានីរបស់ខ្លួននៅថ្ងៃខាងមុខក្ដី៕
Tag:
អាមេរិក
អ៊ីស្រាអែល
ស៊ីរី
ហ្គោឡង់
ដូណាល់ ត្រាំ
© រក្សាសិទ្ធិដោយ thmeythmey.com