ជាតិ
សួនអាកាសលក្ខណគ្រួសារ ជួយឲ្យកសិករខេត្តកោះកុងចំណេញថវិកា និងគេចផុតពីបញ្ហាគ្រោះរាំងស្ងួត
× ប្រជាពលរដ្ឋជាង២០គ្រួសាររស់នៅស្រុកថ្មបាំងនិងស្រុកបទុមសាគរ នៃខេត្តកោះកុង បានរៀបចំសួនលើធ្នើរ សម្រាប់ដាំដំណាំផ្សេងៗ ដែលផ្ដល់ភាពងាយស្រួលក្នុងការថែទាំ។ លោក វង្ស សាវឿន អ្នកសម្របសម្រួលកសិកររបស់អង្គការសេដាក ដែលធ្វើការជាមួយកសិករនៅខេត្តកោះកុង បានបញ្ជាក់ថា ការដាំដុះបែបនេះ ជួយដល់កសិករកាត់បន្ថយការចំណាយ ជាពិសេសកសិករអាចគេចផុតពីបញ្ហាគ្រោះរាំងស្ងួត និងការប្រឈមនឹងស្ថានភាពទឹកប្រៃ។
ការកែច្នៃផ្ទៃដីតូចចង្អៀតសម្រាប់ដាំដំណាំ តាមរយៈការរៀបចំសួនលើធ្នើរ ឬសួនអាកាសលក្ខណគ្រួសារ បានជួយឲ្យកសិករក្នុងខេត្តកោះកុងកាត់បន្ថយការចំណាយ និងចំណេញដល់សុខភាព។ ការដាំដុះបែបនេះ ជាគម្រូភាពដល់កសិករដទៃ រួមទាំងការបណ្ដុះការស្រឡាញ់ចំពោះដំណាំផងដែរ។
លោក វង្ស សាវឿន អ្នកសម្របសម្រួលកសិកររបស់អង្គការសេដាក ដែលជំរុញកសិករឲ្យដាំដំណាំលើធ្នើរ បានលើកឡើងថា៖ « ក្រោយអង្គការសេដាក បានចុះទៅបណ្ដុះបណ្ដាល និងណែនាំឲ្យដាំដំណាំបែបនេះ កសិករបានអនុវត្តតាម ហើយទទួលបានលទ្ធផលល្អ។ ហើយវាជួយដល់ការដាំដុះដែលប្រឈមនឹងស្ថានភាពទឹកប្រៃផងដែរ»។
បើតាមលោក វង្ស សាវឿន ការដាំដំណាំលើធ្នើរ ផ្ដល់អត្ថប្រយោជន៍ដល់កសិករដូចជា កាត់បន្ថយការចំណាយ, ប្រើប្រាស់ទឹកអស់តិច វាមានភាពងាយស្រួលក្នុងការដាំដុះដោយមិនព្រួយបារម្ភសត្វបំផ្លាញ និងជាគម្រូសម្រាប់កសិករដទៃផងដែរ។
អ្នកសម្រួលសម្របកសិកម្មរូបនេះ ជំរុញឲ្យកសិករអ្នកខេត្តដទៃងាកមកដាំដំណាំ តាមបច្ចេកទេសងាយៗ នៅលើធ្នើរបែបនេះ ដោយទប់ស្កាត់ការទិញបន្លែផ្លែឈើពីខាងក្រៅ។ ទន្ទឹមនឹងនេះ លោក វង្ស សាវឿន ក៏បានអំពាវនាវដល់ក្រសួងកសិកម្ម ឲ្យបញ្ជូនបុគ្គលិកចុះតាមមូលដ្ឋាន ដើម្បីបង្កភាពងាយស្រួលដល់កសិករ ជាពិសេសចូលរួមដោះស្រាយបញ្ហាខ្វះទឹក និងស្វែងរកទីផ្សារសម្រាប់កសិករ៕
Tag:
កសិកម្ម
សួនដំណាំលើធ្នើរ
© រក្សាសិទ្ធិដោយ thmeythmey.com