ជាតិ
បទយកការណ៍ / បទសម្ភាសន៍
អាជ្ញាធរជួសជុលផ្លូវទំនប់បារាយណ៍ ដើម្បីពង្រឹងតួទំនប់ និងផ្ដល់ប្រយោជន៍ដល់ប្រជាពលរដ្ឋ
×![]()
សៀមរាប៖ បារាយណ៍ទឹកថ្លា ឬបារាយណ៍ខាងលិច ជាអាងស្ដុកទឹកដ៏សំខាន់សម្រាប់តំបន់អង្គរ។ កន្លងមក ដោយសារផ្លូវរងការខូចខាត និងទឹកហូរច្រោះនារដូវវស្សា បានធ្វើឱ្យផ្នែកខ្លះនៃទំនប់នេះ រងកខាតខូតខាត។ ថ្មីៗនេះ អាជ្ញាធរទើបនឹងជួសជុលផ្លូវនៅលើខ្នងទំនប់បារាយណ៍ខាងលិចនេះ។ ផ្លូវនេះធ្វើឡើងដើម្បីប្រយោជន៍ទាំងការធ្វើដំណើររបស់ប្រជាពលរដ្ឋ ភ្ញៀវទេសចរ ក៏ដូចជាពង្រឹងតួទំនប់ឱ្យមាំឡើងវិញ។ ផ្លូវលើខ្នងទំនប់បារាយណ៍មានប្រវែងសរុបទាំងអស់២០គីឡូម៉ែត្រ ហើយបច្ចុប្បន្នការជួសជុលបានប្រវែង ១០គីឡូម៉ែត្រហើយ។
ព័ត៌មានលម្អិត សូមស្ដាប់បទយកការណ៍ដែលរៀបរៀងដោយអ្នកនាង អ៊ីសា រ៉ហានី ពីខេត្តសៀមរាប ដូចតទៅ
អ្នកសៀមរាប និងភ្ញៀវទេសចរមួយចំនួនធំ ច្បាស់ជាបានស្គាល់បារាយណ៍ទឹកថ្លា ឬខ្លះនិយមហៅបារាយណ៍ខាងលិចជាក់ជាមិនខាន។ បារាយណ៍នេះ ស្ដុកទឹកបានប្រមាណ ៥៣លានម៉ែត្រកូប ដែលបម្រើប្រយោជន៍ទាំងប្រព័ន្ធធារាសាស្ដ្រក្នុងតំបន់អង្គរ និងស្រោចស្រពផ្ទៃដីកសិកម្មរបស់ប្រជាពលរដ្ឋនៅជុំវិញនោះផងដែរ។ ភ្ញៀវទេសចរ តែងទៅកម្សាន្តនៅតំបន់នេះទាំងរដូវប្រាំង និងវស្សា ដ្បិតមានទេសភាពត្រកាល និងបរិយាកាសបរិសុទ្ធ។ ដើម្បីសម្រួលចរាចរណ៍ដល់ប្រជាពលរដ្ឋ ភ្ញៀវទេសចរ ដែលនិយមទៅកម្សាន្តនៅបារាយណ៍ខាងលិច អាជ្ញាធរជាតិអប្សរា ទើបនឹងជួសជុលផ្លូវដីក្រហមនៅផ្នែកខាងកើត និងខាងលិចខ្នងបារាយណ៍នេះ។
លោក មាន់ ផានិត មន្ត្រីបច្ចេកទេសនៃនាយកដ្ឋានគ្រប់គ្រងទឹក ទទួលបន្ទុកការងារនៅបារាយណ៍ខាងលិច បានឱ្យដឹងថា ផ្លូវថ្មីចំនួន២ខ្សែដែលអាជ្ញាធរជាតិអប្សរាទើបនឹងជួសជុលនេះ ធ្វើឡើងក្នុងបំណងដើម្បីសម្រួលចរាចរណ៍ដល់ប្រជាពលរដ្ឋដែលរស់នៅក្នុងតំបន់ទាំងនោះ ក៏ដូចជាសម្រួលចរាចរណ៍ដល់ភ្ញៀវទេសចរផងដែរ។ ផ្នែកខាងលិចនៃបារាយណ៍ គឺជាគោលដៅទស្សនាថ្ងៃរះដ៏ទាក់ទាញ រីឯផ្នែកខាងកើតវិញ ភ្ញៀវចាប់អារម្មណ៍ក្នុងការទស្សនាថ្ងៃលិច។ តាមការបញ្ជាក់របស់លោក ផានិត កន្លងមកផ្លូវទាំងនេះរងការខូចខាត មានជង្ហុក និងដក់ទឹកនារដូវវស្សា ពិបាកធ្វើដំណើរខ្លាំង។ ក្រៅពីនេះ ក្នុងការជួសជុលនេះដែរ ក៏ក្នុងបំណងដើម្បីពង្រឹងតួទំនប់ផងដែរ។
ផ្លូវដែលទើបទទួលបានការជួសជុលនេះ មានប្រវែងសរុបជិត៣ពាន់ម៉ែត្រ ដោយផ្នែកខាងលិចប្រវែង ២២០០ម៉ែត្រ និងខាងកើតប្រវែងជាង ៥០០ម៉ែត្រ។ ផ្លូវនេះបានបម្រើប្រយោជន៍ដល់ពលរដ្ឋនៅភូមិមួយចំនួនដូចជា គោកបេង គោកត្នោត ពាម ប្រាសាទចារ គោកពោធិ៍ជាដើម ជាប្រយោជន៍ដើម្បីឆ្លងកាត់នាំកសិផលទៅលក់នៅទីរួមស្រុកពួក ក៏ដូចជាក្រុងសៀមរាប។ បើតាមការបញ្ជាក់របស់លោក ផានិត បច្ចុប្បន្នការជួសជុលផ្លូវនៅខ្នងបារាយណ៍មានប្រវែងត្រឹម១០គីឡូម៉ែត្រ ដោយនៅសល់ប្រវែង ១០គីឡូម៉ែត្រ ដែលនឹងត្រូវរៀបចំគម្រោងជួសជុលនាពេលខាងមុខ។
បន្ទាប់ពីផ្លូវនៅតាមខ្នងបារាយណ៍ត្រូវបានជួសជួលហើយ គេសង្កេតឃើញថា មានប្រជាពលរដ្ឋ ក៏ដូចជាភ្ញៀវទេសចរកាន់តែច្រើនចូលមកកម្សាន្តនៅបារាយណ៍ខាងលិចនេះ ពិសេសនៅផ្នែកខាងលិចតែម្ដង ដែលមានបរិយាកាសដ៏ស្រស់ស្អាត។ គេអាចមើលឃើញផ្ទៃដ៏ល្វឹងល្វើយនៃបារាយណ៍ ដែលក្នុងរដូវប្រាំងនេះ ទឹកនៅមិនសល់ច្រើនទេ ប៉ុន្តែក៏មិនខ្សត់អ្នកមកលេងដែរ។ នេះមិនបានបរិយាយពីបរិយាកាសនារដូវវស្សាផង ដែលមានផ្ទៃទឹកល្វឹងល្វើយ ជាទីគាប់កម្សាន្តរបស់ទេសចរទូទៅ។
កំពុងជិះម៉ូតូកាត់ផ្លូវដែលទើបនឹងជួសជុលហើយ លោក ឆាយ ផាត និងភរិយាកំពុងធ្វើដំណើរទៅលេងដន្លងរបស់លោកនៅភូមិខាងត្បូងបារាយណ៍ខាងលិច។ លោកថា តែងឆ្លងកាត់ផ្លូវខ្នងបារាយណ៍ខាងលិចនេះជារឿយៗ ពីមុនការធ្វើចរាចរណ៍នៅតំបន់នេះហាក់ពិបាកបន្ដិច ដ្បិតមានជង្ហុកធំៗនារដូវប្រាំង ឯរដូវវស្សារអិល ពិបាកជិះណាស់។ ដូច្នេះ លោកអស់បារម្ភចំពោះការធ្វើដំណើរកាត់តាមទីតាំងនេះទៀតហើយទៅថ្ងៃមុខ ព្រោះថាមានផ្លូវដីក្រហមថ្មី។
រីឯលោក ណាត ជាបុគ្គលិកធនាគារ និងឧស្សាហ៍ជិះកាត់ផ្លូវខ្នងបារាយណ៍ខាងលិចដែរនោះ ក៏បានសាទរចំពោះសមិទ្ធិផលថ្មីនេះដែរ។ លោកសុំឱ្យអាជ្ញាធរបន្តអភិវឌ្ឍន៍ផ្លូវនៅតំបន់ឆ្ងាយពីក្រុងឱ្យបានល្អបន្ថែមទៀត ដើម្បីសម្រួលចរាចរណ៍ដល់ប្រជាពលរដ្ឋទូទៅ៕
© រក្សាសិទ្ធិដោយ thmeythmey.com
