មេបក្សកាន់អំណាច ដាក់គោលដៅកម្ចាត់ក្រុមប្រឆាំង ដូចកម្ចាត់ ប៉ុល ពត

ជាតិ

នយោបាយជាតិ

មេបក្សកាន់អំណាច ដាក់គោលដៅកម្ចាត់ក្រុមប្រឆាំង ដូចកម្ចាត់ ប៉ុល ពត

01, Apr 2019 , 1:33 pm

រូបភាព

ដោយ: សារព័ត៌មានថ្មីៗ

សម្តេច ហ៊ុន សែន នាយករដ្ឋមន្ត្រីនិងជាប្រធានគណបក្សកាន់អំណាច បានប្រកាសខ្លាំងៗថា បានដាក់គោលដៅកម្ចាត់ក្រុមអ្នកប្រឆាំង ជាពិសេសសំដៅលើលោក សម រង្ស៊ី ដូចការកម្ចាត់ក្រុមខ្មែរក្រហម។ ការប្រកាសនេះ គឺធ្វើឡើងក្នុងពិធីចែកសញ្ញាបត្រដល់និស្សិតនៃវិទ្យាស្ថានវ៉ាន់ដា នាព្រឹកថ្ងៃទី១ ខែមេសា ឆ្នាំ២០១៩។

នៅចំពោះមុខនិស្សិតទាំងនោះ សម្តេចនាយករដ្ឋមន្ត្រី ហ៊ុន សែន បានផ្ញើសារទៅក្រុមប្រឆាំងនិងលោក សម រង្ស៊ី យ៉ាងដូច្នេះថា៖«អ្នកចាំមើលទៅ ហ៊ុន សែន ឈរមាំណាស់ កុំសូវពេក។ ប៉ុន ប៉ុល ពត ខ្លាំងប៉ុណ្ណឹង នៅ ហ៊ុន សែន វាយដួលទាំងអស់។ ឥឡូវ អាធុនប៉ុណ្ណេះ....ទៅនៅលេងនៅក្រៅ [ប្រទេស] ទៅ....។ អ្នកឯង រកវិធីកម្ចាត់ខ្ញុំ ខ្ញុំក៏ដាក់គោលដៅកម្ចាត់ឯងដូចគ្នា។ អាហ្នឹងឲ្យវាច្បាស់លាស់ជាមួយគ្នាអ៊ីចឹងតែម្តងទៅ»។

សម្តេចនាយករដ្ឋមន្ត្រី ប្រកាសបែបនេះ គឺដោយសារតែខឹងអ្នកប្រឆាំង ដែលនៅបន្តជេរប្រមាថពីក្រៅប្រទេសមក។ អ្វីដែលធ្វើឲ្យមេដឹកនាំរូបនេះ រឹតតែខឹង គឺនៅពេលនឹកដល់ការប្រមាថមួយ ដែលមិនអាចទទួលយកបាន គឺការចោទថា ភរិយានិងកូនរបស់ខ្លួន ជាភរិយានិងជាកូនរបស់មេដឹកនាំវៀតណាម។ មេដឹកនាំរូបនេះ ប្តេជ្ញាថា៖«រឿងមួយនេះ អ្នកឯងត្រូវចាំ មួយជីវិតរបស់ខ្ញុំ ខ្ញុំ មិនអត់ឱនឲ្យអ្នកឯងទេ។ ការប្រមាថមួយនេះ មិនអាចយោគយល់ ហើយក៏មិនអាចនិយាយគ្នាកើតដែរ»។

ប្រធានគណបក្សកាន់អំណាច អះអាងថា លោក សម រង្ស៊ី ជាអ្នកណែនាំកូន-ចៅ ឲ្យប្រមាថនិងលាបពណ៌លើប្រពន្ធ-កូនរបស់ខ្លួន។ ប្រធានគណបក្សកាន់អំណាច លើកឡើងថា៖«ខ្ញុំ ទុកឱកាសឲ្យគេសុំទោស និងឲ្យគេ ប្រកាសថ្កោលទោសក្រុមអ្នកធ្វើ តែធ្វើម៉េចបាន បើគេជាអ្នកណែនាំឲ្យកូន-ចៅឲ្យធ្វើ»។

ប៉ុន្មានម៉ោងក្រោយមក លោក សម រង្ស៊ី មេដឹកនាំក្រុមប្រឆាំង ដែលកំពុងនិរទេស ក៏ឆ្លើយតបនឹងសម្តេច ហ៊ុន សែន។ លោក បានបង្ហោះសារលើទំព័រហ្វេសប៊ុកថា លោក មិនដែលចាប់អារម្មណ៍ពីរឿងឯកជនរបស់អ្នកដទៃ ឬគ្រួសារអ្នកដទៃឡើយ។

តាមរយៈសារនោះ លោក បានរិះគន់សម្តេច ហ៊ុន សែន ថា ជាមេដឹកនាំមិនទទួលខុសត្រូវ ហើយចង់បង្វែរអារម្មណ៍របស់មហាជនពីបញ្ហាប្រទេសជាតិ ដែលខ្លួន មិនចេះដោះស្រាយ ទៅជាបញ្ហាឯកជននិងក្រុមគ្រួសារទៅវិញ។ លោក បានសរសេរបែបនេះថា៖«គាត់ដើរចោទប្រកាន់គេឯង ទាក់ទងទៅនឹងរឿងផ្ទាល់ខ្លួន និងគ្រួសាររបស់គាត់ ពីព្រោះគាត់ត្រូវការលេស ដើម្បីបង្ក្រាបគូប្រកួតនយោបាយរបស់គាត់»។

កន្លងមក លោក សម រង្ស៊ី ក៏ធ្លាប់ច្រានចោលដែរថា លោក ពុំដែលណែនាំមន្ត្រីគណបក្សប្រឆាំងឲ្យប្រមាថក្រុមគ្រួសាររបស់នាយករដ្ឋមន្ត្រី ឬគ្រួសាររបស់អ្នកណាម្នាក់ឡើយ។ លោក ថែមទាំងបកស្រាយថា លោក ជាអ្នកនយោបាយ ដែលគិតគូរពីរឿងប្រទេសជាតិជាធំ ដោយមិនចូលចិត្តយករឿងបុគ្គលផ្ទាល់ខ្លួនមកនិយាយនោះទេ។

លោក អ៊ូ ច័ន្ទរ័ត្ន អតីតមន្រ្តីជាន់ខ្ពស់គណបក្សប្រឆាំង ដែលទើបទទួលបានសិទ្ធិនយោបាយវិញ យល់ឃើញថា ការព្រមានរបស់ប្រធានគណបក្សកាន់អំណាច ហាក់មានលក្ខណៈធ្ងន់ធ្ងរ។ ប៉ុន្តែ លោក ចាត់ទុកថាជារឿងធម្មតា ព្រោះក្រុមលោក តែងរងការព្រមានជារឿយៗទៅហើយ ពីសំណាក់រដ្ឋាភិបាល។ លោក ប្រាប់សារព័ត៌មានថ្មីៗយ៉ាងដូច្នេះថា៖«វាស៊ាំសម្រាប់ពួកខ្ញុំទៅហើយ»។

អតីតមន្ត្រីគណបក្សប្រឆាំងរូបនេះ មិនមែនរិះគន់តែការប្រើភាសាគ្រោតគ្រាតនិងការគំរាមកំហែងរបស់ប្រធានគណបក្សកាន់អំណាចនោះទេ សូម្បីតែលោក សម រង្ស៊ី ដែលជាមេកើយរបស់លោក លោក រិះគន់ដែរ។ លោក បញ្ជាក់ថា៖«មានកន្លែងខ្លះ ខ្ញុំ ក៏មិនគាំទ្រឯកឧត្តម សម រង្ស៊ី ដែរ ដូចជាគាត់ ប្រើពាក្យថាពាលនិងថោកទាបជាដើម។ គេ ក៏ពិបាកទទួលយកដែរ»។

លោក ស្នើឲ្យមេដឹកនាំនយោបាយកំពូលទាំងពីរនេះ បន្ទន់ឥរិយាបថដាក់គ្នា ទើបអាចឈានទៅរកដំណោះស្រាយបាន។

ក្នុងពីធីចែកសញ្ញាបត្រនោះ ប្រមុខរដ្ឋាភិបាល ក៏បានចំអកឲ្យលោក សម រង្ស៊ី ផងដែរថា មិនអាចទៅរួចទេ ដែលលោក ព្យាយាមបំផុសបំផុលឲ្យកងកម្លាំងប្រដាប់អាវុធ ងើបបះបោរ។ ប្រមុខរដ្ឋាភិបាល តបទៅលោក សម រង្ស៊ី បែបនេះថា៖«ម៉ាថ្ងៃៗ គិតតែអំពាវនាវឲ្យកងទ័ពបះបោរវាយហ៊ុន សែន។ ចាំតើ អ្នកឯង ចាំទាល់តែថ្ងៃងាប់ខ្លួនឯងទៅ»។

បច្ចុប្បន្ន លោក សម រង្ស៊ី កំពុងរៀបចំផែនការវិលមកប្រទេសកម្ពុជាវិញ ក្នុងឆ្នាំ២០១៩នេះ។ លោក អំពាវនាវឲ្យប្រជាពលរដ្ឋខ្មែរនៅក្រៅប្រទេស វិលមកជាមួយលោក។ ក្រុមអ្នកប្រឆាំងនៅក្រៅប្រទេស កំពុងដើររៃអង្គាសថវិកាឲ្យបានយ៉ាងតិច៣សែនដុល្លារ សម្រាប់ការធ្វើមាតុភូមិនិវត្តរបស់មេដឹកនាំខ្លួន។ ទន្ទឹមនេះ ថ្នាក់ដឹកនាំក្រុមប្រឆាំង បានដាក់បញ្ជាពីក្រៅប្រទេសមក ឲ្យមន្ត្រីរបស់ខ្លួន ដើរប្រមូលអ្នកគាំទ្រ ដើម្បីត្រៀមទទួលលោក សម រង្ស៊ី។

ស្របជាមួយគ្នានេះ លោក សម រង្ស៊ី បានអំពាវនាវឲ្យកងកម្លាំងប្រដាប់អាវុធ ឈប់ស្តាប់បញ្ជារដ្ឋាភិបាល ដោយងាកមកចូលរួមជាមួយលោក និងប្រជាពលរដ្ឋ។ លោក មានជំនឿខ្ពស់ថា កម្ពុជា នឹងមានការផ្លាស់ប្តូរនៅឆ្នាំ២០១៩៕