ជាតិ
សេដ្ឋកិច្ច
អាមេរិកផ្តល់ប្រាក់២លានដុល្លារ សម្រាប់បោសសម្អាតគ្រាប់មិនទាន់ផ្ទុះនៅកម្ពុជា
រូបបានពីទំព័រហ្វេសប៊ុក លោក ហេង រតនា ប្រធាន CMAC
×![]()
ដោយ: ថ្មីៗ
ភ្នំពេញ៖ អាមេរិកបានផ្ដល់ថវិកា២លានដុល្លារដល់មជ្ឈមណ្ឌលកម្ចាត់មីនកម្ពុជា (CMAC) សម្រាប់ប្រតិបតិ្តការបោសសម្អាតសំណល់ជាតិផ្ទុះពីសង្គ្រាម ជាពិសេសគឺសម្អាតគ្រាប់បែកចង្កោមនៅកម្ពុជា។ថវិកានេះ សម្រាប់អនុវត្តគម្រោងរយៈពេល១២ខែ គឺចាប់ពីខែមីនា ឆ្នាំ២០១៩ ដល់ ខែកុម្ភៈ ឆ្នាំ២០២០។ នេះបើតាមទំព័រហ្វេសប៊ុករបស់ លោក ហេង រតនា អគ្គនាយកមជ្ឈមណ្ឌលកម្ចាត់មីនកម្ពុជា (CMAC)។
លោក ហេង រតនា បញ្ជាក់ថា ជំនួយនេះនឹងផ្តល់លទ្ធភាពឱ្យCMAC អាចរំដោះមីន ឬគ្រាប់បែកនៅលើ ផ្ទៃដី២៦០០ហិចតា ក្នុងចំការចង្កោម/UX O១១៥ចំការ ដែលនឹងត្រូវស្រាវជ្រាវបច្ចេកទេស លើផ្ទៃដីជាង៣២០០ហិចតា ព្រមទាំងឆ្លើយតបសំណើរបន្ទាន់ចំនួន២០០០ករណី។ ដើម្បីសម្រេចផែនការប្រតិបត្តិការនេះ CMAC នឹងប្រើប្រាស់កម្លាំងប្រតិបត្តិការចំនួនជាង ២៥០នាក់។
គិតចាប់ពីឆ្នាំ១៩៩២ ដល់ខែតុលា ឆ្នាំ២០១៧ CMAC បានបោសសម្អាតមីន និងសំណល់ជាតិផ្ទុះពីសង្គ្រាមលើផ្ទៃដីសរុបប្រមាណ ១៦៧,០០០ហិកតា។ ក្នុងនោះរួមមានគ្រាប់មីនប្រឆាំងមនុស្ស ១,៧៧៩,០៤៦គ្រាប់ មីនប្រឆាំងរថក្រោះ ៦០,៨២៤គ្រាប់ យុទ្ធភណ្ឌមិនទាន់ផ្ទុះ ៦,២៥៧,១០២គ្រាប់ និងអំបែង ៧៤១,៧១៥,៤៩១គ្រាប់។ ចំណែកទិន្នន័យជនរងគ្រោះ គិតចាប់ពីឆ្នាំ ១៩៩៧ ដល់ឆ្នាំ២០១៧ សរុបទាំងអស់មាន ៦៤,៧០៥នាក់ ក្នុងនោះគ្រោះថ្នាក់ដោយសារមីនចំនួន ៥១,០៥៦នាក់ និងគ្រាប់ ៦៤,៩១៣នាក់។ នេះបើតាមរបាយការណ៍ CMAC។
តាមផែនការយុទ្ធសាស្ត្រជាតិសកម្មភាពមីនរបស់រាជរដ្ឋាភិបាលឆ្នាំ២០១៨-២០២៥ កម្ពុជាគ្រោងសម្រេចគោលដៅមួយចំនួនរួមមាន ត្រូវដោះផ្ទៃដីដែលកំពុងទទួលរងការគំរាមកំហែងដោយគ្រាប់មីន និងគ្រាប់បែកចង្កោម ឲ្យអស់ក្នុងឆ្នាំ ២០២៥។ ផែនការនេះត្រូវការថវិកាគាំទ្រ៤០០លានដុល្លារ៕
Tag:
CMAC
មីន
© រក្សាសិទ្ធិដោយ thmeythmey.com
