ទោះធ្លាក់ច្រើនដង, កញ្ញា សុធារី ខំប្រឹងទាល់តែជាប់អាហារូបករណ៍នៅអាមេរិក

ជាតិ

បទសម្ភាសន៍

ទោះធ្លាក់ច្រើនដង, កញ្ញា សុធារី ខំប្រឹងទាល់តែជាប់អាហារូបករណ៍នៅអាមេរិក

03, Apr 2019 , 11:00 am

រូបភាព

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ ការដាក់អាហារូបករណ៍ទៅសិក្សានៅក្រៅប្រទេស មិនមែនជាការងាយស្រួលសម្រាប់យុវជន ឬបុគ្គលណាមួយឡើយ។ តាមបទពិសោធដាក់អាហារូបករណ៍សិក្សានៅក្រៅប្រទេស មិនតិចពី១០០ដង កញ្ញា យូ សុធារី ដែលជានិស្សិតទើបបញ្ចប់ថ្នាក់អនុបណ្ឌិតផ្នែក «គោលនយោបាយអភិវឌ្ឍន៍អន្តរជាតិ» ពីសហរដ្ឋអាមេរិក បានបញ្ជាក់ថា ដើម្បីជាប់អាហារូបករណ៍ទៅសិក្សានៅក្រៅប្រទេស បេក្ខជនត្រូវមានចំណេះដឹង, ភាពក្លាហាន និងស្គាល់ពីខ្លួនឯងច្បាស់ជាមុនសិន ទើបអាចជាប់អាហារូបករណ៍។ និស្សិតអាហារូបករណ៍ពីសហរដ្ឋអាមេរិករូបនេះ ជំរុញយុវជន កុំបោះបង់ក្ដីស្រមៃរបស់ខ្លួន ជាពិសេសខំប្រឹងដាក់បន្តទៀត។

ធ្លាក់អាហារូបករណ៍ច្រើនលើកច្រើនសារ កញ្ញា យូ សុធារី នៅតែព្យាយាមដាក់អាហារូបករណ៍រហូតដល់ជាប់ទៅរៀននៅសហរដ្ឋអាមេរិក។ ស្ត្រីដែលកើតក្នុងគ្រួសារក្រីក្រនៅខេត្តកំពង់ធំរូបនេះ បានជម្នះនូវឧបសគ្គជាច្រើនក្នុងការដាក់អាហារូបករណ៍នៅក្រៅប្រទេស។ កញ្ញា យូ សុធារី មានបទពិសោធដាក់អាហារូបករណ៍ និងដាក់ពាក្យចូលរួមក្នុងកម្មវិធីផ្លាស់ប្ដូរការសិក្សានៅក្រៅប្រទេស មិនតិចជាង១០០ដងនោះទេ។

កញ្ញា សុធារី ជាកូនខ្មែរដំបូងគេដែលទទួលបានអាហារូបករណ៍ផ្នែក «គោលនយោបាយអភិវឌ្ឍន៍អន្តរជាតិ» នៅសាលា «Sanford School of public Policy of Duke University» នាសហរដ្ឋអាមេរិក។ និស្សិតថ្នាក់អនុបណ្ឌិតរូបនេះ ចាប់ផ្ដើមដាក់អាហារូបករណ៍នៅឆ្នាំ២០១២ រហូតដល់ឆ្នាំ២០១៥ទើបជាប់ និងចេញដំណើរទៅសិក្សានៅអាមេរិកនៅឆ្នាំ២០១៦។

សូមអញ្ជើញទស្សនាបទសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មាន ThmeyThmey ជាមួយកញ្ញា យូ សុធារី ដូចតទៅ៖

អត្ថបទទាក់ទង

កញ្ញា យូ សុធារី ៖«ខ្ញុំចង់ឃើញស្ត្រីខ្មែរទទួលបានការអប់រំ, ការងារ, ប្រាក់កម្រៃនិងសេរីភាពដូចបុរស»

យូ សុធារី ព្យាយាមបន្សល់ស្នាដៃនៅលើផែនដី លើសពីឆ្អឹងរបស់គាត់

ការបាក់ទឹកចិត្ត ធ្លាប់ធ្វើឲ្យកញ្ញា សុធារី មានបំណងបោះបង់ចោលក្ដីស្រមៃទៅសិក្សានៅបរទេស ប៉ុន្តែបន្ទាប់ពីយំរួចហើយ កញ្ញា សុធារី បានបន្តដាក់អាហារូបករណ៍បន្តទៀត។ កត្តាដែលជំរុញទឹកចិត្តកញ្ញា សុធារី ឲ្យបន្តបេសកកម្មដាក់អាហារូបករណ៍សិក្សានៅក្រៅប្រទេសបន្តទៀត គឺការតាំងចិត្ត និងអ្វីដែលកញ្ញា សុធារី ចង់បាននៅក្នុងឆាកជីវិត។ ស្ត្រីវ័យ២៩ឆ្នាំរូបនេះ យល់ថាការសិក្សានៅក្រៅប្រទេស អាចជួយពង្រឹងសមត្ថភាពរបស់កញ្ញាបន្ថែម ដើម្បីធ្វើការងារដែលខ្លួនចង់ធ្វើ។ ម្យ៉ាងទៀត ការដឹងគោលដៅជីវិតរបស់ខ្លួនឯងច្បាស់ ជាអ្វីដែលកញ្ញា សុធារី ប្រឹងដាក់ម្ដងហើយម្ដង ទោះបីជាមិនចេះភាសាបរទេសក៏ដោយ។ អ្នកជំនាញគោលនយោបាយអភិវឌ្ឍន៍អន្តរជាតិនិងស្ថាបនិកគម្រោងស្ត្រីជំនាន់ថ្មី (Next Women Generation) កញ្ញា យូ សុធារី ក៏បានជំរុញទឹកចិត្តយុវជន ឲ្យបន្តដាក់អាហារូបករណ៍សិក្សានៅបរទេស និងកុំបោះបង់ក្ដីស្រមៃខ្លួនឯង៕