ពីនេះ ពីនោះ
ព័ត៍មានសុខភាព
អាការៈទាំងនេះអាចបញ្ជាក់បានថា រាងកាយកំពុងតែខ្វះជាតិប៉ូតាស្យូមហើយ
×![]()
ដោយ: ថ្មីៗ
ប៉ូតាស្យូមគឺជាជាតិរ៉ែមួយប្រភេទដែលសំខាន់សម្រាប់រាងកាយមនុស្សយើង។ យ៉ាងណាមិញ វាមាននាទីខុសៗគ្នាច្រើនណាស់ក្នុងខ្លួនដូចជា៖
- សម្របសម្រួលដល់តុល្យភាពជាតិទឹកក្នុងកោសិកា
- ថែរក្សាការកន្ត្រាក់សាច់ដុំបានយ៉ាងល្អ
- ជំនួយដល់មុខងារសរសៃប្រសាទបានល្អបំផុត
- កាត់បន្ថយសម្ពាធឈាម
- បង្ការការកើតគ្រួសក្នុងតម្រងនោម និងជំងឺពុកឆ្អឹង
វាមិនមានអ្វីដែលត្រូវឆ្ងល់ថាហេតុអ្វីបានជាការកង្វះជាតិប៉ូតាស្យូមក្នុងខ្លួនអាចជាបញ្ហាធំឡើយ តែការកង្វះជាតិរ៉ែមួយនេះធ្ងន់ធ្ងរ ហើយរកមិនឃើញទៀតនោះ អាចជារឿងគ្រោះថ្នាក់ដល់អាយុជីវិតបាន។ បើសិនជាអ្នកមិនទទួលបានជាតិប៉ូតាស្យូមគ្រប់គ្រាន់ពីរបបអាហារទេ អ្នកប្រហែលជាមានអាការៈនៃការកង្វះជាតិប៉ូតាស្យូមដូចខាងក្រោមនេះ៖
ខ្សោយ
ភាពខ្សោយនេះច្រើនតែជាបញ្ហាដំបូងគេបំផុតដែលអ្នកសម្គាល់ដឹងថា កំពុងតែខ្វះជាតិប៉ូតាស្យូមហើយ។ ដូចអ្វីដែលខ្ញុំបានបញ្ជាក់ពីខាងលើអ៊ីចឹងថា ប៉ូតាស្យូមមាននាទីជួយឲ្យសាច់ដុំកន្ត្រាក់បានល្អ។ ដូច្នេះបើសិនជាវត្តមានរបស់វាខ្វះ ដូច្នេះការខ្សោយសាច់ដុំនឹងកើតឡើង។
រមួលក្រពើ
ដោយសារតែប៉ូតាស្យូមជាជីវជាតិដ៏សំខាន់សម្រាប់ការកន្ត្រាក់សាច់ដុំ ដូច្នេះអ្នកងាយនឹងរមួលក្រពើណាស់បើសិនជាកង្វះវាក្នុងឈាម។ វាអាចនឹងធ្វើឲ្យកន្ត្រាក់សាច់ដុំជាប់រយៈពេលយូរ ជាលក្ខណៈបែបរមួលក្រពើតែម្តង។
ការញ័រដើមទ្រូង
បេះដូងមនុស្សយើងក៏ជាសាច់ដុំដែរ។ ហេតុដូច្នេះហើយ ការកង្វះជាតិប៉ូតាស្យូម វានឹងខ្វះអ្វីមួយសម្រាប់សម្រួលដល់ការកន្ត្រាក់របស់សាច់ដុំបេះដូង រហូតដល់ធ្វើឲ្យបេះដូងញ័របាន ខណៈពេលការញ័រដើមទ្រូងនេះក៏អាចកើតឡើងដោយសារតែរាងកាយធ្វើការងារហត់ ស្ត្រេស និងថប់អារម្មណ៍ដែរ។
បញ្ហានៃការរំលាយអាហារ
ផ្លូវក្រពះពោះវៀនទាំងមូលគឺពោរពេញទៅដោយសាច់ដុំរលោង ដូច្នេះអ្នកក៏អាចស្មានដឹងថា មានអ្វីកើតឡើងដែរចំពោះសាច់ដុំមួយនេះបើសិនជាកង្វះជាតិប៉ូតាស្យូមក្នុងខ្លួន។ នៅពេលសាច់ដុំក្នុងផ្លូវរំលាយអាហារខ្សោយ វាទំនងជាងាយធ្វើឲ្យឈឺពោះ ហើមពោះ ខ្យល់ក្នុងពោះ និងទល់លាមកណាស់។
ឈឺឈៀបៗ
ជាតិប៉ូតាស្យូមដើរតួនាទីជាមុខងារជួយថែរក្សាការងាររបស់សរសៃប្រសាទ។ ដូច្នេះការកង្វះជីវជាតិមួយនេះ នឹងធ្វើឲ្យមានអារម្មណ៍ឈឺឈៀបៗ ជាពិសេសនៅប្រអប់ដៃ ដៃ ប្រអប់ជើង និងជើង។ ប៉ុន្តែបញ្ហានេះក៏អាចកើតឡើងដោយសារតែមូលហេតុអ្វីផ្សេងដែរ ជាពិសេសជំងឺទឹកនោមផ្អែមតែម្តង៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
