កីឡាអន្តរជាតិ
អន្តរជាតិ
Ronaldo កោតសរសើរ Zidane ពីរបៀបដឹកនាំក្រុមប្លែកពីគេ
× Cristiano Ronaldo តារាស៊ុតរបស់ក្រុម Juventus បានលើកសរសើរពីជំនាញដឹកនាំក្រុមរបស់អតីតគ្រូចាស់លោក Zinedine Zidane បន្ទាប់ពីអ្នកចាត់ការសញ្ជាតិបារាំងរូបនេះវិលត្រលប់ចូលទៅដឹកនាំ Real Madrid វិញ។
Zidane បានចាកចេញពីទឹកដី Santiago Bernabeu យ៉ាងគួរអោយភ្ញាក់ផ្អើលបន្ទាប់ពីជួយក្លិបយក្សអេស្ប៉ាញឈ្នះជើងឯក Champions League ៣លើកជាប់ៗគ្នា ពោលគឺមុនបន្តិចប៉ុណ្ណោះពេល Ronaldo បានផ្លាស់ទៅ Juventus នៅចុងបញ្ចាប់រដូវកាលមុន ។
យ៉ាងណាក៏ដោយអ្នកចាត់ការសញ្ជាតិបារាំង វ័យ៤៦ឆ្នាំបានវិលចូលទៅកាន់តំណែងអ្នកចាត់ការទូទៅក្រុមដែលស្ថិតក្នុងក្រុងម៉ាឌ្រីដវិញដោយចុះកិច្ចសន្យារហូតដល់ឆ្នាំ ២០២២ ដើម្បីជំនួសលោក Santiago Solari ដែលត្រូវបណ្តេញចេញក្រោយដឹកនាំមិនបានល្អ។
នៅក្នុងកម្មវិធីមួយដែលផ្សាយដោយ RMC Sport នៅថ្ងៃទី៣ ខែមេសានេះ Ronaldo បានសាទរវិធីសាស្ត្រក្នុងការដឹកនាំក្រុមរបស់ Zidane អំឡុងពេលអ្នកទាំងពីរជាគ្រូនឹងសិស្សរួមក្រុម Real Mdrid។
ខ្សែប្រយុទ្ធឆ្នើមសញ្ជាតិព័រទុយហ្គាល់ វ័យ៣៤ឆ្នាំរូបនេះបានលើកសរសើរថា Zidane បានគ្រប់គ្រងក្រុមដោយភាពវៃឆ្លាតបំផុត។ «វាមិនមែនជារឿងងាយស្រួលទេព្រោះកីឡាករគ្រប់រូបចង់លេងច្រើន។ គាត់ធ្វើការងារដ៏ឆ្លាតវៃមួយដែលពាក់ព័ន្ធនឹងកីឡាករទាំងអស់ហើយវាមានអត្ថប្រយោជន៍ខ្លាំងណាស់»។
ក្រៅពី Ronaldo ប្រធានក្រុមស្តេចស Sergio Ramos ក៏បានសរសើរពីជំនាញគ្រប់គ្រងរបស់ Zidane ផងដែរ។ Ramos លើកឡើងថា Zidane បានពន្យល់កូនក្រុមទាំងអស់ពីរបៀបដែលលោកបានធ្វើក្នុងនាមជាកីឡាករ និងជាគ្រូបង្វឹក។
«គាត់ (Zidane) បានរកឃើញវិធីមួយដើម្បីផ្ទេរទេពកោសល្យដែលគាត់មានកាលនៅជាកីឡាករបង្កើតទៅជាច្បាប់ផ្ទាល់ខ្លួនក្នុងនាមជាគ្រូបង្វឹកដើម្បីគ្រប់គ្រងនៅក្នុងបន្ទប់ប្តូរស្លៀកពាក់។ គាត់ធ្វើការងារដ៏អស្ចារ្យនិងប្លែកខុសគេ ហើយលទ្ធផលទាំងនោះមិនមែនកើតឡើងដោយចៃដន្យឡើយ»។ Ramos បន្ថែមដូច្នេះ។
Zidane ដែលមានរហស្សនាម Zizou ធ្លាប់ឈ្នះពានរង្វាន់បាល់ទាត់ពិភពលោក World Cup ឈ្នះ Champions League ក្របខណ្ឌ Serie A និង LaLiga ក្នុងចំណោមពានរង្វាន់ជាច្រើនទៀតក្នុងអំឡុងពេលលោកនៅប្រកបអាជីពជាកីឡាករ៕
Tag:
បាល់ទាត់
Cristiano Ronaldo
Zinedine Zidane
© រក្សាសិទ្ធិដោយ thmeythmey.com