កីឡាអន្តរជាតិ
អន្តរជាតិ
Wolves ត្រៀម៤០លានដុល្លារដើម្បីទិញយក Jimenez ពី Benfica
× Wolverhampton Wanderers នៅថ្ងៃទី៤ ខែមេសានេះបានបញ្ជាក់ពីការបញ្ចេញខ្ទង់ចំណាយជាកំណត់ត្រាក្លិបដើម្បីទិញផ្តាច់យកខ្សែប្រយុទ្ធ Raul Jimenez ពី Benfica ក្នុងតម្លៃ ៣០លានផោន (៤០លានដុល្លារអាមេរិក)។
ខ្សែប្រយុទ្ធសញ្ជាតិម៉ិកស៊ិក វ័យ២៧ឆ្នាំរូបនេះត្រូវបាន Wolves ខ្ចីជើងពីក្រុមនៅលីគកំពូលព័រទុយហ្គាល់ Benfica កាលពីខែមិថុនា ឆ្នាំ២០១៨ និងបានបញ្ចេញសមត្ថភាពលេចធ្លោគួរឲ្យភ្ញាក់ផ្អើលក្នុងក្របខណ្ឌ Premier League រដូវកាលនេះ។
Jimenez ស៊ុតបញ្ចូលទីបាន១៥គ្រាប់ហើយក្នុងការបង្ហាញខ្លួន ៣៧លើក និងជួយក្រុមរហស្សនាមចចកខ្មៅទទួលបានចំណាត់ថ្នាក់ទី៧នៅក្នុងតារាងលីគកំពូលអង់គ្លេសគិតត្រឹមសប្តាហ៍ទី៣២។ អតីតកីឡាករ Atlético Madrid រូបនេះបានដើរតួយ៉ាងសំខាន់ក្នុងការជួយ Wolves យកឈ្នះ Manchester United ដើម្បីឈានដល់វគ្គពាក់កណ្តាលផ្តាច់ព្រ័ត្រ FA Cup ដោយត្រូវតទល់ជាមួយ Watford នៅថ្ងៃទី៦ ខែមេសានេះ។
សមិទ្ធផលដ៏គាប់ប្រសើរនេះ បានធ្វើឲ្យ Wolves សម្រេចត្រៀមប្រាក់ដ៏ច្រើនសន្ធឹកមិនធ្លាប់មានដល់ទៅ៤០លានដុល្លារអាមេរិកដើម្បីយក Jimenez មកកាន់ទឹកដី Molineux Stadium តែម្តង។ Wolves ធ្លាប់បង្កើតកំណត់ត្រាទិញកីឡាថ្លៃបំផុតប្រចាំក្លិបកាលពីឆ្នាំ២០១៨ សម្រាប់តម្លៃខ្លួនខ្សែប្រយុទ្ធ Adama Traore ពី Middlesbrough ជិត២៤លានដុល្លារអាមេរិក។
Jimenez បានផ្លាស់ចេញពី AT-Madrid ទៅចូលរួមជាមួយ Benfica កាលពីឆ្នាំ ២០១៥ ដោយស៊ុតបញ្ចូលទីបាន៣១គ្រាប់ ក្នុង១២០ប្រកួត និងជួយក្រុមនេះឈ្នះជើងឯក Primera Liga របស់ព័រទុយហ្គាល់ ២រដូវកាលជាប់គ្នា ២០១៥-១៦ និង ២០១៦-១៧ ផងដែរ៕
© រក្សាសិទ្ធិដោយ thmeythmey.com