ជាតិ
រដ្ឋមន្ត្រីទេសចរណ៍ ព្រមានចាត់វិធានការ លើអ្នកលក់វត្ថុអនុស្សាវរីយ៍និងផលិតផលក្លែងក្លាយ រូបភាពក្រសួងទេសចរណ៍
× ភ្នំពេញ៖ រដ្ឋមន្រី្តក្រសួងទេសចរណ៍ លោក ថោង ខុន បានឲ្យមន្ត្រីទេសចរណ៍គ្រប់ខេត្ត-ក្រុង សហការជាមួយស្ថាប័ន វិស័យឯកជន និងផ្នែកពាក់ព័ន្ធ ចូលរួមទប់ស្កាត់ការលក់វត្ថុអនុស្សាវរីយ៍និងផលិផក្លែងក្លាយ។ លោក លើកឡើងថា បញ្ហានេះបានធ្វើឲ្យប៉ះពាល់ធ្ងន់ធ្ងរដល់កិត្តិយសនិងកិត្យានុភាពកម្ពុជា។
ការព្រមានចាត់ការយ៉ាងម៉ឺងម៉ាត់នេះ គឺធ្វើឡើងក្នុងវិធីបើកសន្និបាតបូកសរុបការងារទេចរណ៍ត្រីមាសទី១ ឆ្នាំ២០១៩ ហើយត្រូវបានស្រង់ទៅចុះផ្សាយលើទំព័រហ្វេសប៊ុករបស់ក្រសួងទេសចរណ៍។ តាមការលើកឡើងរបស់លោក ថោង ខុន ការលក់វត្ថុអនុស្សាវរីយ៍ក្លែងក្លាយនេះ ធ្លាប់មានភ្ញៀវទេសចរ បានប្ដឹងទៅក្រសួងការបរទេសកម្ពុជា។ ការប្ដឹងនេះ គឺដោយសារភ្ញៀវបរទេសបានទិញទំនិញកម្ពុជា រួចមកទើបដឹងថា ជាគ្រឿងអលង្ការក្លែងក្លាយ។ លោក ថោង ខុន បញ្ជាក់ថា ជាក់ស្ដែងពេលថ្មីៗនេះ មានករណីប្ដឹងផ្ទាល់ទៅអង្គភាពប្រឆាំងអំពើពុករលួយ (ACU) ហើយ អង្គភាពប្រឆាំងអំពើពុករលួយ បានដាក់លិខិតទៅក្រសួងទេសចរណ៍។
លោករដ្ឋមន្ត្រី បានជំរុញគ្រប់ភាគីពាក់ព័ន្ធ ឲ្យចាត់ការតាមនីតិវិធីច្បាប់ និងចុះពិនិត្យតាមមូលដ្ឋានអាជីវកម្មលក់វត្ថុអនុស្សាវរីយ៍។ ក្នុងកិច្ចការនេះ គួរសហការជាមួយក្រសួងពាណិកម្ម ក្នុងការតាមដានអាជីកម្មលក់គ្រឿងអលង្កា ដើម្បីទប់ស្កាត់និងលុបបំបាត់បញ្ហានេះ៕
Tag:
ក្រសួងទេសចរណ៍
ផលិតផលក្លែងក្លាយ
© រក្សាសិទ្ធិដោយ thmeythmey.com