កីឡាជាតិ
ជាតិ
សម្តេច ហ៊ុន សែន ព្រមានចេញមុខដោះស្រាយឲ្យកីឡាករ បើអាជ្ញាកណ្តាល ចៅក្រមកាត់ក្តីមិនយុត្តិធម៌ សម្តេចនាយករដ្ឋមន្ត្រី ហ៊ុន សែន ថ្លែងក្នុងពិធីជួបសំណេះសំណាលនិងអាហារសាមគ្គីជាមួយមហាគ្រួសារកីឡានៅកោះពេជ្រ
× សម្តេចនាយករដ្ឋមន្ត្រី ហ៊ុន សែន ព្រមានចេញមុខដោះស្រាយជូនកីឡាករ បើអាជ្ញាកណ្តាលចៅក្រមកាត់ក្តីមិនយុត្តិធម៌។ ការព្រមានបែបនេះ បន្ទាប់ពីមានរឿងអយុត្តិធម៌ក្នុងការកាត់ក្តីមួយចំនួនបានកើតឡើងនៅតាមស្ថានីយទូរទស្សន៍ ជាពិសេសលើវិស័យកីឡាប្រដាល់នាពេលកន្លងមក។ សម្តេច ជំរុញឲ្យប្រធានសហព័ន្ធប្រដាល់គុនខ្មែរ ត្រូវយកចិត្តទុកដាក់លើការបណ្តុះបណ្តាលបច្ចេកទេស និងវិជ្ជាជីវៈដាក់ពិន្ទុដល់មន្ត្រីអាជ្ញាកណ្តាលចៅក្រម។
សម្តេចនាយករដ្ឋមន្ត្រី ហ៊ុន សែន ដាស់តឿនឲ្យមន្ត្រីអាជ្ញាកណ្តាលចៅក្រមលើប្រភេទកីឡាប្រដាល់គុនខ្មែរត្រូវកាត់ក្តីឲ្យត្រឹមត្រូវ និងយុត្តិធម៌ដល់កីឡាករ កីឡាការិនីទាំងកម្ពុជានិងបរទេស។ សម្តេចសង្កេតឃើញថា មន្ត្រីអាជ្ញាកណ្តាលចៅក្រមមួយចំនួននៅមានភាពខ្វះចន្លោះក្នុងការកាត់ក្តី និងដាក់ពិន្ទុ ដែលជាហេតុធ្វើឲ្យកីឡាករមួយចំនួនរងភាពអយុត្តិធម៌។ សម្រាប់សម្តេច ការកាត់ក្តីមិនយុត្តិធម៌អាចធ្វើឲ្យកីឡាករបាក់ទឹកចិត្ត និងប៉ះពាល់កិត្តិយស និងកេរ្តិ៍ឈ្មោះប្រទេសជាតិ។
ត្រង់ចំណុចនេះសម្តេចព្រមានចេញមុខដោះស្រាយរកយុត្តិធម៌ជូនកីឡាករដោយផ្ទាល់ បើសិនមន្ត្រីអាជ្ញាកណ្តាលចៅក្រមមិនកែប្រែទម្លាប់អាក្រក់ ហើយបន្តឲ្យមានរឿងអយុត្តិធម៌បែបនេះកើតឡើងទៀត។ ប្រមុខរដ្ឋាភិបាលកម្ពុជារូបនេះ បានអះអាងថា ពេលខ្លះសម្តេចមិនត្រឹមតែទស្សនាការប្រកួតប៉ុណ្តោះទេ ថែមទាំងថតវីដេអូការប្រកួតនោះទុកទៀតផង។
ទន្ទឹមនឹងនេះសម្តេច ហ៊ុន សែន ជំរុញឲ្យលោក តែម ម៉ឺន ប្រធានសហព័ន្ធប្រដាល់គុនខ្មែរ ត្រូវយកចិត្តទុកដាក់បណ្តុះបណ្តាលមន្ត្រីអាជ្ញាកណ្តាលចៅក្រម ពីបច្ចេកទេស ក្រមសីលធម៌ និងវិជ្ជាជីវៈក្នុងការដាក់ពិន្ទុឲ្យបានត្រឹមត្រូវ។
«សូមឲ្យប្រធានសហព័ន្ធកីឡាប្រដាល់គុនខ្មែរ(លោក តែម ម៉ឺន)យកចិត្តទុកដាក់ទៅលើបញ្ហាការបណ្តុះបណ្តាលអាជ្ញាកណ្តាល និងក្រមសីលធម៌នៃអាជ្ញាកណ្តាល បើសិនជាមិនព្រមកែប្រែទេ ខ្ញុំនឹងចេញមុខរកដំណោះស្រាយជូនកីឡាកររបស់យើង ព្រោះពួកគេរងនូវអំពើអយុត្តិធម៌ ដែលខ្ញុំមិននិយាយ»។ ការព្រមានបែបនេះរបស់ប្រមុខរាជរដ្ឋាភិបាលកម្ពុជា ធ្វើឡើងក្នុងពិធីជួបជុំមហាគ្រួសារកីឡា និងពិសារអាហារសាមគ្គីកាលពីល្ងាចថ្ងៃទី៤ ខែមេសា ឆ្នាំ២០១៩ នៅមជ្ឈមណ្ឌលកោះពេជ្រ។
ការជួបសំណេះសំណាល និងពិសារអាហារសាមគ្គីជាមួយមហាគ្រួសារកីឡាលើកទី៤នេះ មានថ្នាក់ដឹកនាំ មន្ត្រី គ្រូបង្វឹក អត្តពលិក និងអ្នកពាក់ព័ន្ធវិស័យកីឡាជាង៤ពាន់នាក់ចូលរួម។ បើធៀបនឹងឆ្នាំមុនកើនឡើងជាង៥០០នាក់ ដែលមានត្រឹមតែជាង៣ពាន់នាក់៕
Tag:
សម្តេច ហ៊ុន សែន
ប្រដាល់គុនខ្មែរ
© រក្សាសិទ្ធិដោយ thmeythmey.com