ជាតិ
សង្គមជាតិ
រដ្ឋមន្ត្រីកសិកម្ម បញ្ជាឲ្យបំផ្លាញចោលជ្រូកមានផ្ទុកជំងឺ ដើម្បីទប់ស្កាត់ការរីករាលជំងឺប៉េស្តជ្រូកអាហ្វ្រិក
× ភ្នំពេញ៖ ក្រោយពីមានករណីផ្ទុះជំងឺប៉េស្តជ្រូកអាហ្វ្រិកដែលធ្វើឲ្យជ្រូក៥០០ក្បាលងាប់នៅរតនគិរីមក ក្រសួងកសិកម្ម រុក្ខាប្រមាញ់ និងនេសាទ បានចាត់ឲ្យក្រុមការងារ៣ក្រុមរួមគ្នាទប់ស្កាត់ការផ្ទុះរាលដាលជំងឺនេះ។ ជំងឺប៉េស្តជ្រូកអាហ្វ្រិកនេះ បានកើតឡើងនៅក្នុងភូមិសោមកានិញ ឃុំសោមធំ ស្រុកអូរយ៉ាដាវ ខេត្តរតនគិរី។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបង្គាប់ឲ្យអគ្គនាយកដ្ឋានសុខភាព និងផលិតកម្មសត្វ ត្រូវចាត់វិធានការព្យាបាល និងបោសសម្អាតជាបន្ទាន់នៅតំបន់ផ្ទុះជំងឺ ដោយត្រូវបំផ្លាញចោលសត្វជ្រូកដែលមានផ្ទុកជំងឺ, ផ្អាកការទិញ លក់ សត្វជ្រូក និងសាច់ជ្រូកដែលមានផ្ទុកជំងឺប៉េស្តជ្រូកអាហ្វ្រិក។ ជាមួយគ្នាផងដែរ លោក វេង សាខុន ក៏ចាត់វិធានការឲ្យពលរដ្ឋផ្អាកការជួញដូរសត្វជ្រូក និងសាច់ជ្រូកជាបណ្តោះអាសន្នសិន ដើម្បីរួមចំណែកទប់ស្កាត់ជំងឺប៉េស្តជ្រូកអាហ្វ្រិក។ ក្រោយពីជំងឺនេះបានទប់ស្កាត់រួច ក្រសួងនឹងប្រកាសឲ្យជួញដូរដូចធម្មតាវិញ។
ក្រុមការងារទប់ស្កាត់ជំងឺប៉េស្តជ្រូកអាហ្វ្រិក ដែលក្រសួងបញ្ចូនទៅខេត្តរតនគិរីនោះ រួមមាន ក្រុមទី១ អនុវត្តវិធានជីវសុវត្តិភាព កំទេច,កប់សត្វមានជំងឺ និងបាញ់ថ្នាំ។ ក្រុមទី២ អន្តរាគមន៍ទប់ស្កាត់ចលនាសត្វចេញ ចូលក្នុងតំបន់ផ្ទុះជំងឺក្នុងកាំរង្វង់៣គីឡូម៉ែត្រ និងក្រុមទី៣ អង្កេត និងត្រួតពិនិត្យក្នុងតំដើម្បីរកវត្តមានរាលដាលជំងឺ។ ក្រុមការងារទាំងនោះនឹងសហការគ្នា ពង្រឹងការទប់ស្កាត់ចលនាសត្វជ្រូក និងសាច់ជ្រូក ចេញពីតំបន់ផ្ទុះជំងឺដោយសុវត្ថិភាពប្រកបដោយប្រសិទ្ធភាព។ នេះបើតាមសេចក្តីជូនដំណឹងដែលចុះហត្ថលេខាដោយ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
បើតាមការបញ្ជាក់ពីលោករដ្ឋមន្ត្រីក្រសួងកសិកម្ម ជំងឺនេះពុំឆ្លង និងប៉ះពាល់ដល់មនុស្សទេ ប៉ុន្តែជំងឺនេះបណ្តាលឲ្យជ្រូកឈឺ និងងាប់មានអត្រាខ្ពស់ដល់១០០ភាគរយ ដែលបង្កការខាតធ្ងន់ដល់អ្នកចិញ្ចឹមជ្រូកតែប៉ុណ្ណោះ។
គួរបញ្ជាក់ថា ជំងឺប៉េស្តជ្រូកអាហ្វ្រិក បានផ្ទុះឡើងលើកដំបូងនៅឆ្នាំ១៩០៧ នៅប្រទេសកេនញ៉ា ហើយវាបានផ្ទុះឡើងជាបន្តបន្ទាប់ទៅតាមបណ្តាប្រទេសក្នុងទ្វីបអាហ្វ្រិក និងចុងក្រោយ ជំងឺនេះបានផ្ទុះឡើងនៅបណ្តាប្រទេសក្នុងទ្វីបអឺរ៉ុបក្នុងឆ្នាំ២០១៨ រួចបន្តរាលឆ្លងចូលក្នុងប្រទេសចិន។ បច្ចុប្បន្នជំងឺប៉េស្តជ្រូកអាហ្វ្រិកនេះ កំពុងបន្តរាលដាលតាមបណ្តាខេត្តមួយចំនួននៅប៉ែកខាងជើង និងកណ្តាលនៃប្រទេសវៀតណាម៕
Tag:
ជ្រូក
ក្រសួងកសិកម្ម
ជំងឺប៉េស្តជ្រូកអាហ្វ្រិក
សុខភាព
© រក្សាសិទ្ធិដោយ thmeythmey.com