ភ្នំពេញ៖ ប្រជាពលរដ្ឋ និងពាណិជ្ជករកម្ពុជា អាចទូទាត់ប្រាក់រៀលក្នុងប្រទេសថៃបាន ក្រោយពីធនាគារជាតិនៃកម្ពុជា និងធនាគារ Siam Commercial Bank នៃប្រទេសថៃ បានដាក់ឲ្យដំណើរការប្រព័ន្ធទូទាត់សងប្រាក់រវាងប្រទេសទាំងពីរតាមរយៈ QR «អន្តរប្រតិបត្តិការនៃការទូទាត់តាមប្រព័ន្ធ QR (Interoperable QR Payment)»។ នេះបើយោងតាមសេក្តីប្រកាសព័ត៌មាននៃធនាគារជាតិកម្ពុជា។
ការដាក់ឲ្យដំណើរការសាកល្បងនៃប្រព័ន្ធទូទាត់សងប្រាក់រវាង ធនាគាររជាតិនៃកម្ពុជា និង Siam Commercial Bank (SCB) របស់ប្រទេសថៃ និងសាខារបស់ខ្លួននៅកម្ពុជា បានធ្វើឡើងកាលពីថ្ងៃទី៤ ខែមេសា ឆ្នាំ២០១៩ នៅខេត្តឈាងរ៉ៃ ប្រទេសថៃ ដើម្បីបន្តការសហការតភ្ជាប់ប្រព័ន្ធទូទាត់សងប្រាក់រវាងប្រទេសទាំងពីរឲ្យកាន់តែមានប្រសិទ្ធភាព។ លើសពីនេះ ពាណិជ្ជករ និងភ្ញៀវទេសចរថៃ អាចប្រើប្រាស់កម្មវិធីធនាគារចល័តតាមរយៈទូរសព្ទដៃ ដើម្បីស្កេន QR code និងទូទាត់សងប្រាក់នៅក្នុងប្រទេសកម្ពុជាបានផងដែរ។ ប្រទេសទាំងពីរនឹងបន្តធ្វើការជាមួយគ្នាក្នុងការពង្រីកបណ្តាញទូទាត់ប្រាក់ ឆ្លងដែនតាមប្រព័ន្ធ QR នេះ តាមធនាគារនៃប្រទេសទាំងពីរ ឲ្យកាន់តែទូលំទូលាយបន្ថែមទៀតនាថ្ងៃខាងមុខ។
អន្តរប្រតិបត្តិការ នៃការទូទាត់សងប្រាក់តាមប្រព័ន្ធ QR នេះត្រូវបានធ្វើឡើងតាមស្តង់ដារ EMV ដែលអាចសម្រួលដល់ការទូទាត់ឆ្លងដែនរវាងបុគ្គល និងពាណិជ្ជករក្នុងប្រទេសទាំងពីរ ។ ជាពិសេសកាត់បន្ថយការចំណាយ និងការគាំទ្រដល់ការប្រើប្រាស់រូបិយវត្ថុក្នុងស្រុក។
លោក ជា ចាន់តូ ទេសាភិបាល ធនាគារជាតិនៃកម្ពុជា បាននិយាយថា ការបង្កើតនូវប្រព័ន្ធទូទាត់តាមរយៈ QR code គឺមានសារៈសំខាន់ណាស់សម្រាប់ប្រទេសទាំងពីរ ដើម្បីសម្រួលដល់ការទូទាត់សងប្រាក់ឆ្លងដែន និងកាត់បន្ថយហានិភ័យនិងការចំណាយក្នុងការទូទាត់ជាដើម។
លោក Veerathai Santiprabhob ទេសាភិបាល ធនាគារកណ្តាលថៃ ចាត់ទុកដំណើរការប្រតិបត្តិការរួមគ្នាជាការបោះជំហានមួយកម្រិតទៀត លើវិស័យពាណិជ្ជកម្ម និងវិនិយោគរវាងភាគីទាំងពីរ ជាពិសេសវិស័យទេសចរណ៍ ខណៈដែលកម្ពុជា ជាទិសដៅទេសចរណ៍ដ៏ពេញនិយមសម្រាប់ភ្ញៀវទេសចរថៃ។
បើតាមលោក Veerathai Santiprabhob ការបង្ហាញនាថ្ងៃនេះ គឺគ្រាន់តែជាជំហានដំបូងនៃអន្តរប្រតិបត្តិការនៃការទូទាត់សងប្រាក់តាមប្រព័ន្ធ QR រវាងប្រទេសទាំងពីរប៉ុណ្ណោះ។ លោកសង្ឃឹមថា ការអនុវត្តនេះនឹងកាន់តែទូលំទូលាយលើអន្តរប្រតិបត្តិការ នៃការទូទាត់សងប្រាក់តាមប្រព័ន្ធ QR នឹងអាចធ្វើឡើងកាន់តែច្រើនថែមទៀត តាមរយៈធនាគារនៃប្រទេសថៃនិងកម្ពុជា។
លោកបាននិយាយថា៖ «ខ្ញុំមានសេចក្តីសោមនស្សរីករាយដែលបានពិនិត្យឃើញពីវឌ្ឍនភាពនៃនវានុវត្តភាពហិរញ្ញវត្ថុនៅក្នុងសេវាទូទាត់ឆ្លងដែនរវាងកម្ពុជានិងថៃ ជាពិសេសផ្តោតលើការបង្កើតហេដ្ឋារចនាសម្ព័ន្ធហិរញ្ញវត្ថុ នៃអន្តរប្រតិបត្តិការនេះ»។
គួររម្លឹកថា ធនាគារជាតិនៃកម្ពុជា និងធនាគារកណ្តាលថៃ បានចុះហត្ថលេខា លើអនុស្សរណៈយោគយល់គ្នា ស្តីពី កិច្ចសហប្រតិបត្តិការក្នុងផ្នែកនវានុវត្តភាពហិរញ្ញវត្ថុនិងប្រព័ន្ធទូទាត់ នៅរាជធានីភ្នំពេញ កាលពីខែកុម្ភៈ ឆ្នាំ២០១៩៕