កីឡាជាតិ
ជាតិ
លីគ៖ ទ័ពប៉ះកំពង់ចាម អាស៊ីអឺរ៉ុបស្វាគមន៍សូលទីឡូអង្គរ ខណៈអគ្គិសនីជួប U18 បាទី
× ការប្រកួតក្របខណ្ឌមិត្តហ្វូនខេមបូឌានលីគបានឈានដល់សប្តាហ៍ទី៣ ដោយនៅថ្ងៃសៅរ៍ ទី៦ ខែមេសា ឆ្នាំ២០១៩នេះមានការប្រកួតចំនួន៣គូ ក្នុងនោះក្រុមក្រសួងការពារជាតិ(ទ័ព)ស្វាគមន៍កំពង់ចាម ក្រោយសូលទីឡូអង្គរប៉ះអាស៊ីអឺរ៉ុបនិងអគ្គិសនីកម្ពុជាទទួលភ្ញៀវយុវជនអាយុក្រោម១៨ឆ្នាំបាទី។
ក្រុមមិនទាន់ស្គាល់ចាញ់ក្រសួងការពារជាតិ ត្រូវបើកទ្វារកីឡដ្ឋានស្តាតចាស់ស្វាគមន៍ភ្ញៀវកំពង់ចាម សម្រាប់ជំនួបសប្តាហ៍ទី៣នៃពានរង្វាន់ក្របខណ្ឌខេមបូឌានលីគនៅម៉ោង៦ល្ងាចថ្ងៃសៅរ៍នេះ។ បច្ចុប្បន្នទ័ព ស្ថិតនៅលេខ៣ដោយមាន៤ ក្រោយយកឈ្នះណាហ្គាវើល ៤-២ និងស្មើ ១-១ ជាមួយអង្គរថាយហ្គឺរ។ ចំណែកកំពង់ចាមឈ្នះអគ្គិសនី ១-០ និងចាញ់អង្គរថាយហ្គឺរ ១១-០។
លោក ភា សុភ័ក្ត្រា បានអះអាងពីការត្រៀមខ្លួនរួចរាល់ក្នុងការស្វាគមន៍ក្រុមចំណូលថ្មីមួយនេះ។ តែលោក ហាក់មិនហ៊ានមើលស្រាលសមត្ថភាពរបស់ក្រុមនេះឡើយ ទោះបីពួកគេបានរងបរាជ័យយ៉ាងធ្ងន់ធ្ងរកាលពីសប្តាហ៍មុខក៏ដោយ។ ទោះបីយ៉ាងនេះក្តី លោក សុភ័ក្ត្រា បាននិយាយថា លោកនឹងព្យាយាមដាក់សម្ពាធលើក្រុមថ្មីនេះតាមតែអាចធ្វើបាន។
នៅម៉ោង៣:៣០នាទីរសៀល ក្រុមអាស៊ីអឺរ៉ុបដែលបរាជ័យពីរប្រកួតជាប់គ្នា ត្រូវបើកទ្វារកីឡដ្ឋានរបស់ខ្លួនស្វាគមន៍ក្រុមមានមូលដ្ឋាននៅខេត្តសៀមរាបសូលទីឡូអង្គរ។ សម្រាប់ពីរប្រកួតកន្លងមក អាស៊ីអឺរ៉ុបចាញ់ណាហ្គាវើល ១-០ ក្នុងជំនួបបើកឆាកហើយបានបន្តចាញ់អគ្គស្នងការនគរបាលជាតិ ៣-២ ខណៈសូលទីឡូអង្គរបញ្ចប់ដោយគ្មានការស៊ុតបញ្ចូលទីជាមួយវិសាខា និងចាញ់ព្រះខ័នរាជស្វាយរៀង ១-០។
នៅម៉ោង៣:៣០នាទីរសៀលនេះដែរ ក្រុមអគ្គិសនីកម្ពុជាដែលយកឈ្នះបឹងកេតស្ទើរមិនគួរឲ្យជឿ ១-០ សប្តាហ៍មុន ត្រូវតទល់ជាមួយក្រុមយុវជនអាយុក្រោម១៨ឆ្នាំបាទីនៅកីឡដ្ឋាន EDC។ ពីរប្រកួតកន្លងមកក្រុម U18 បាទីមិនទាន់អាចរកបានពិន្ទុនៅឡើយទេ ក្រោយពួកគេចាញ់គីរីវង់សុខសែនជ័យ ៤-១ និងចាញ់ភ្នំពេញក្រោន ២-០៕
Tag:
បាល់ទាត់
Cambodian League 2019
© រក្សាសិទ្ធិដោយ thmeythmey.com