អាល្លឺម៉ង់ផ្ដល់ជំនួយឥតសំណងជាង៦០០លានដុល្លារដល់កម្ពុជា ក្នុងរយៈពេល២៦ឆ្នាំ

ជាតិ

អាល្លឺម៉ង់ផ្ដល់ជំនួយឥតសំណងជាង៦០០លានដុល្លារដល់កម្ពុជា ក្នុងរយៈពេល២៦ឆ្នាំ

06, Apr 2019 , 11:29 pm

រូបភាព

រូបភាពក្រុមព្រឹក្សាអភិវឌ្ឍន៍កម្ពុជា

ដោយ: ឡាយ សុភាវតី

រយៈពេលជាង២០ឆ្នាំនេះ រដ្ឋាភិបាលអាល្លឺម៉ង់ បានផ្ដល់ហិរញ្ញប្បទានឥតសំណងជាង៦០០លានដុល្លារ ស្មើនឹងប្រមាណ៣ភាគរយ នៃទំហំហិរញ្ញប្បទានទាំងអស់ ដែលផ្ដល់ដោយដៃគូរអភិវឌ្ឍន៍មកកម្ពុជា។ នេះបើតាមសេចក្ដីជូនព័ត៌មានរបស់រាជរដ្ឋាភិបាលកម្ពុជា កាលពីថ្ងៃទី៤ មេសា។

ទំហំហិរញ្ញប្បទានឥតសំណាងប្រមាណជាង៦០០លានដុល្លារនេះ គឺមិនរាប់បញ្ចូលហិរញ្ញប្បទាន ដែលភាគីអាល្លឺម៉ង់ផ្ដល់ដល់កម្ពុជាតាមរយៈគម្រោងថ្នាក់តំបន់ និងសកល សហភាពអឺរ៉ុប អង្គការសហប្រជាជាតិស្ថាប័នហិរញ្ញវត្ថុអន្តរជាតិ និងស្ថាប័នពហុភាគីដទៃទៀតទេ។ ទឹកប្រាក់៦០០លានដុល្លារ គឺគិតចាប់ឆ្នាំ១៩៩២ ដល់ ២០១៨។

កាលថ្ងៃទី៤មេសានេះ កម្ពុជាបានរៀបចំកិច្ចប្រជុំអន្តរក្រសួង នៅទីស្ដីការក្រុមប្រឹក្សាអភិវឌ្ឍន៍កម្ពុជា គឺសម្រាប់ត្រៀមរៀបចំកិច្ចចរចាស្ដីពីកិច្ចសហប្រតិបត្តិការអភិវឌ្ឍន៍រវាងរាជរដ្ឋាភិបាលកម្ពុជា និងអាល្លឺម៉ង់លើកទី១៣ ដែលនឹងប្រព្រឹត្តទៅចាប់ពីថ្ងៃទី១៤ដល់១៦ឧសាភា ឆ្នាំ២០១៩ នៅទីក្រុងប៉ែកឡាំង ប្រទេសអាល្លឺម៉ង់។ កិច្ចប្រជុំនេះ ក្នុងគោលបំណងពង្រឹងកិច្ចសហប្រតិបតិ្តការអភិវឌ្ឍន៍ និងភាពជាដៃគូ ជាពិសេសសំណើគម្រោងកម្មវិធីអភិវឌ្ឍន៍ និងការសន្យាផ្ដល់ហិរញ្ញប្បទានរបស់រដ្ឋាភិបាលអាល្លឺងម៉ង់មកកម្ពុជា សម្រាប់រយៈពេល២ឆ្នាំ គឺ២០១៩ដល់២០២០។

សំណើរគម្រោងផ្ដល់ហិរញ្ញប្បទាន២ឆ្នាំនេះ បានត្រូវស្នើក្នុងកិច្ចប្រជុំពិគ្រោះយោបល់ទ្វេភាគីកាលពីខែវិច្ចិកាឆ្នាំ២០១៨ ដែលផ្ដោតសំខាន់លើវិស័យចំនួន៣។ វិស័យសុខាភិបាល សម្រាប់គាំពារសុខមាលភាពសង្គម និងសន្តិសុខស្បៀង និងអាហារូបត្ថម្ភ, វិស័យអភិវឌ្ឍន៍ជនបទ និងវិស័យអភិបាលកិច្ច។ សូមបញ្ជាក់ថា រាជរដ្ឋាភិបាលកម្ពុជា និងអាល្លឺម៉ង់ តែងតែរៀបចំកិច្ចចរចាទ្វេភាគីស្តីពីកិច្ចសហប្រតិបតិ្តការអភិវឌ្ឍន៍រៀងរាល់២ឆ្នាំម្ដង។ នេះបើតាមរាជរដ្ឋាភិបាលកម្ពុជា ៕