ក្រសួងសុខាភិបាល ក្រើនរំលឹកឲ្យពលរដ្ឋបង្ការករណីពុលស្រាក្នុងពិធីបុណ្យចូលឆ្នាំខ្មែរ

ជាតិ

សង្គមជាតិ

ក្រសួងសុខាភិបាល ក្រើនរំលឹកឲ្យពលរដ្ឋបង្ការករណីពុលស្រាក្នុងពិធីបុណ្យចូលឆ្នាំខ្មែរ

08, Apr 2019 , 7:59 am

រូបភាព

ដោយ: ថ្មីៗ

ក្រោយពីមានករណីពុលស្រាជាច្រើនលើកច្រើនសារមក ក្រសួងសុខាភិបាល បានចេញសេចក្តីប្រកាសឲ្យពលរដ្ឋបង្ការករណីពុលស្រាក្នុងអំឡុងពេលបរិភោគអាហារជួបជុំគ្រួសារនៅពិធីបុណ្យចូលឆ្នាំខ្មែរខាងមុខនេះ។

ក្រសួងសុខាភិបាល បានបញ្ជាក់ថា ករណីពុលស្រានៅតែកើតមានជាបន្តបន្ទាប់ នៅតាមសហគមន៍ទូទាំងខេត្តមួយចំនួនកន្លងមក។ ជាក់ស្តែងនៅឆ្នាំ២០១៨ មានករណីពុលស្រាចំនួន៩លើក និងអ្នកស្លាប់ដោយសារពុលស្រាចំនួន១៣នាក់។ កាលពីថ្មីៗនៅដើមឆ្នាំ២០១៩នេះ មានអ្នកស្លាប់ដោយសារពុលស្រាចំនួន២នាក់។ អាស្រ័យហេតុនេះ ក្រសួងសុខាភិបាល អំពាវនាវដល់ពលរដ្ឋបញ្ឈប់ពិសាស្រា ដែលផ្ទុកសារធាតុពុលនាពិធីបុណ្យចូលឆ្នាំខ្មែរ។

លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានដាស់តឿនឲ្យពលរដ្ឋខ្មែរកុំពិសាស្រា ដែលផ្ទុកដោយសារធាតុពុល ស្របពេលអាកាសធាតុក្តៅខ្លាំងហួតហែង ព្រោះវាងាយបណ្តាលឲ្យបាត់បង់ជីវិត។ ជាមួយគ្នានេះ រដ្ឋមន្ត្រីក្រសួងសុខាភិបាល ប្រាប់ឲ្យពលរដ្ឋជៀសវាងការពិសារភេសជ្ជៈនានា ដែលនាំឲ្យឈឺពោះ ក្អួត រាករូស ជាពិសេសចំណីអាហារដែលមិនមានអនាម័យត្រឹមត្រូវ។

ចំពោះករណីពុលស្រា មានរោគសញ្ញាដូចជា ឈឺក្បាល, ក្អួត,ស្រវាំងភ្នែក,សន្លប់,វិលមុខ,ប្រកាច់,ពិបាកដកដង្ហើម។ ដូច្នេះបើពលរដ្ឋមានរោគសញ្ញា ដូចដែលបានលើកឡើងខាងលើ ត្រូវត្រួតពិនិត្យ និងព្យាបាលជាបន្ទាន់៕