អ្នកចិញ្ចឹមត្រីក្នុងបែ បារម្ភរឿងត្រីងាប់ ខណៈកម្តៅកើនឡើង

ជាតិ

អ្នកចិញ្ចឹមត្រីក្នុងបែ បារម្ភរឿងត្រីងាប់ ខណៈកម្តៅកើនឡើង

07, Apr 2019 , 3:29 pm

រូបភាព

ដោយ: ឡាយ សុភាវតី

ភ្នំពេញ៖ ពលរដ្ឋដែលរស់នៅផ្ទះបណ្តែតទឹក នៅក្នុងឃុំព្រែកតាទែន ពញាឮ ខេត្តកណ្ដាល ដែលភាគច្រើនពឹងផ្អែកលើការចិញ្ចឹមត្រីពីក្រោមផ្ទះ ដែលហៅថាបែចិញ្ចឹមត្រីបានខ្វាយខ្វល់យ៉ាងខ្លាំងចំពោះអាកាសធាតុក្តៅខ្លាំង ដែលអាចធ្វើឲ្យត្រីចិញ្ចឹមក្នុងបែរបស់ខ្លួនងាប់។

លោក រ៉ាកាស៊ី ជាអ្នកចិញ្ចឹមត្រីម្នាក់ផងនោះ បានឲ្យដឹងថា ជាទូទៅក្នុងខែ៣ និងខែ៤ មានអាកាសធាតុក្ដៅខ្លាំង ដែលអាចឲ្យត្រីងាប់បាន។ លោក រ៉ាកាស៊ី ដែលអះអាងត្រីរបស់លោក បានចាប់ផ្តើមងាប់មួយៗហើយនោះ ពន្យល់ថា៖«ពេលត្រីងាប់ច្រើន ដោយសារទឹកក្ដៅ ទឹកនៅនឹងមិនហូរ បណ្ដាលឲ្យត្រីពុលទឹក។ ម្យ៉ាងទៀតពេលខ្លះ គឺ មកពីការបង្ហូរទឹកចេញពីរោងចក្រចូលទន្លេ»។

អ្នកស្រី សុខ ស្រីនាង ក៏ជាអ្នករស់នៅឃុំព្រែកកាទែនដែរ។ អ្នកស្រីដែលប្រកបរបរចិញ្ចឹមត្រីនេះ ជាង២០ឆ្នាំមកហើយនោះ បានសង្កត់ធ្ងន់ថា ត្រីរបស់អ្នកស្រីងាប់អស់ជាង១ពាន់ក្បាលហើយ ដោយសារធាតុអាកាសក្ដៅផង និងបញ្ហាទឹកមានជាតិពុលផង។ ស្ត្រីវ័យប្រមាណ៤០ឆ្នាំរូបនេះ ពោលបន្តទាំងមុខស្ងួតថា៖«ចិញឹមត្រីខាតអស់២ឆ្នាំហើយ។ កាលឆ្នាំទៅមិញ ខាតអស់ជាង២០លានរៀល ដោយសារត្រីធ្លាក់ចុះ។ ឯឆ្នាំនេះវិញ ខាតដោយសារត្រីងាប់»។

ទាក់ទងនឹងបញ្ហានេះលោក អេង ជាសាន ប្រធានរដ្ឋបាលជលផល បានប្រាប់សារព័ត៌មានថ្មីៗតាមទូរស័ព្ទថា ធម្មតានៅតាមទន្លេកន្លែងខ្លះ តែទទួលរងនៅការបង្ហូរទឹកចូលក្នុងទន្លេ ដែលមានជាតិពុល និងទឹកមិនស្អាតពីរោងចក្រ ដែលអាចបង្កឲ្យមានការងាប់ត្រីបាន។ ទាក់ទងនឹងបញ្ហាអាកាសធាតុក្តៅ លោក បានប្រាប់ពីវិធីបង្ការខ្លះៗ ដូចជាត្រូវចល័តបែចិញ្ចឹមត្រី ទៅកន្លែងមានទឹកជ្រៅ និងចៀសវាងនៅកន្លែងទឹកនឹងមិនហូរ។ បើមានលទ្ធភាពអ្នកចិញ្ចឹមត្រីគួរដាក់បំពង់ខ្យល់ឧស៊ីនសែនក្នុងបែ និងគួរបន្ថែមទឹកឲ្យច្រើនក្នុងស្រះ។ ការដាក់បរិមាណត្រីចិញ្ចឹមច្រើន ក៏អាចជាបញ្ហាឲ្យត្រីងាប់ដែរ៕