ជាតិ
ក្រសួងការពារជាតិ ព្រមានចាត់វិធានការលើអ្នក ដែលយករូបនាយទាហានបង្ហោះលើហ្វេសប៊ុកក្នុងន័យទុច្ចរិត
× ភ្នំពេញ៖ ក្រសួងការពារជាតិ ព្រមានចាត់វិធានការលើអ្នក ដែលយករូបនាយទាហានទៅបង្ហោះលើបណ្ដាញសង្គមហ្វេសប៊ុក ក្នុងន័យទុច្ចរិត។ ការព្រមានរបស់ក្រសួងការពារជាតិនេះ ធ្វើឡើងបន្ទាប់ពីក្រសួងបានពិនិត្យឃើញមានអ្នកប្រើប្រាស់ហ្វេសប៊ុកមួយចំនួន បានបង្ហោះរូបភាពទាហាន និងខ្លឹមសារ ញុះញង់វាយប្រហារទៅលើរដ្ឋាភិបាល។
អ្នកនាំពាក្យក្រសួងការពារជាតិ ចាត់ទុកសកម្មភាពអ្នកប្រើប្រាស់បណ្ដាញសង្គមទាំងនេះ គឺជាអំពើខុសច្បាប់ ដែលមិនអាចអត់ឱនឲ្យបានឡើយ។ ដើម្បីទប់ស្កាត់ទង្វើបែបនេះ ក្រសួងការពារជាតិ ស្នើឲ្យស្ថាប័នមានសមត្ថកិច្ចទាំងអស់ ចាត់វិធានការតាមផ្លូវច្បាប់ ចំពោះអ្នកដែលប្រព្រឹត្តសកម្មភាពនេះ។
អមជាមួយការព្រមានចាត់វិធានការនេះ អ្នកនាំពាក្យក្រសួងការពារជាតិ ក៏ប្រាប់ឲ្យកងយោធពលខេមរភូមិន្ទទាំងអស់ ដែលនិយមប្រើប្រាស់បណ្ដាញសង្គមនោះ មានការប្រុងប្រយ័ត្ន ដោយរក្សាការពារសន្តិសុខ និងកិច្ចការងារសម្ងាត់របស់អង្គភាព មិនឲ្យមានការបែកធ្លាយជាសាធារណៈឡើយ។
តាមរយៈសេចក្តីប្រកាសព័ត៌មាន ក្រសួងការពារជាតិ បានលើកឡើងដូច្នេះថា៖«សូមអំពាវនាវដល់ប្រជាពលរដ្ឋទាំងអស់ ត្រូវមានទំនុកចិត្តមកលើកងយោធពលខេមរភូមិន្ទ ហើយសូមកុំចាញ់ឧបាយកល ក្រុមទុច្ចរិតទាំងនោះឲ្យសោះ»។
លើកឡើងបែបនេះហើយ អ្នកនាំពាក្យក្រសួងការពារ នៅតែអះអាងថា កងកម្លាំងទាំងអស់ មានជំហរស្មោះត្រង់ចំពោះរដ្ឋាភិបាល ហើយប្រឆាំងដាច់ខាតរាល់ការប៉ុនប៉ង បង្កភាពវឹកវរដល់សង្គម និងការបំផ្លាញដល់សន្តិសុខជាតិ៕
© រក្សាសិទ្ធិដោយ thmeythmey.com