អន្តរជាតិ
រដ្ឋមន្រ្តីការបរទេសប៉ាគីស្ថាន Shah Mehmood Qureshi ក្នុងសន្និសីសារព័ត៌មាន។ (រូបភាព AFP)
×![]()
ដោយ: តន ចាន់រិទ្ធារ៉ា
រដ្ឋមន្ត្រីការបរទេសប៉ាគីស្ថាន Shah Mehmood Qureshi នៅថ្ងៃទី៧ ខែមេសា បានចោទឥណ្ឌាចំៗថា មានផែនការវាយប្រហារប៉ាគីស្ថានក្នុងខែមេសានេះ។ លោក Qureshi និយាយបែបនេះដោយសំអាងលើព័ត៌មានគួរឲ្យទុកចិត្តបានរបស់ក្រុមចារកម្មប៉ាគីស្ថានផ្ទាល់។ យ៉ាងណាមិញ ការចោទប្រកាន់របស់ប៉ាគីស្ថាន ត្រូវបានឥណ្ឌាទាត់ចោលភ្លាមៗវិញ ដោយមន្ត្រីក្រសួងការបរទេសឥណ្ឌាចាត់ទុកជាព័ត៌មានបំផ្លើស។
ភាពតានតឹងរវាងមហាអំណាចអាស៊ីខាងត្បូងទាំងពីរ គឺឥណ្ឌា និងប៉ាគីស្ថាននៅតែមិនថមថយដដែល។ កម្ដៅបានឡើងខ្ពស់នៅដើមឆ្នាំ២០១៩ បន្ទាប់ពីឥណ្ឌារងការប្រហារដ៏ធំមួយក្នុងតំបន់កាស្មៀដែលខ្លួនគ្រប់គ្រងក្នុងខែកុម្ភៈ។ ឥណ្ឌាបានតបវិញ ដោយបើកការវាយប្រហារដែនអាកាសលើគោលដៅក្រុមជ្រុលនិយមនៅទឹកដីប៉ាគីស្ថានវិញ។ ការប៉ះទង្គិចក៏ឈានដល់ការបាញ់ទម្លាក់យន្តហោះឥណ្ឌាមួយគ្រឿងផងដែរ។
ខណៈស្ថានភាពធូរស្រាលបន្តិច ប្រមុខការទូតប៉ាគីស្ថាន Shah Mehmood Qureshi បែរជាចោទឥណ្ឌាថា ប្រុងវាយប្រហារលើប៉ាគីស្ថានជាថ្មីទៅវិញ។ ក្នុងសន្និសីទសារព័ត៌មាននៅថ្ងៃទី៧ ខែមេសា លោក Qureshi បានបញ្ចេញព័ត៌មានចារកម្មដែលប៉ាគីស្ថានប្រមូលបាន និងចោទថា ឥណ្ឌានឹងធ្វើសកម្មភាពយោធានៅចន្លោះថ្ងៃទី១៦ ដល់ទី២០ ខែមេសានេះ។ លោកប្រកាសទទួលខុសត្រូវចំពោះសម្ដីរបស់ខ្លួន និងថា គម្រោងរបស់ឥណ្ឌា មានគោលដៅដាក់សម្ពាធលើប៉ាគីស្ថាន។
បើតាមប្រមុខការទូតរូបនេះ ប៉ាគីស្ថានក៏បានកោះហៅអនុប្រធានទូតឥណ្ឌាប្រចាំរដ្ឋធានីអ៊ីស្លាម៉ាបាដទៅសួរនាំពីរឿងនេះ។ លើសពីនោះ ប៉ាគីស្ថាន ក៏បានជូនដំណឹងពីព័ត៌មានដែលខ្លួនទទួលបានទៅកាន់ក្រុមប្រឹក្សាសន្តិសុខអង្គការសហប្រជាជាតិរួចហើយដែរ។
ក្រោយការចោទប្រកាន់ជាសាធារណៈសំណាក់មន្ត្រីការទូតប៉ាគីស្ថាន ក្រុងញូវដែលី ក៏ប្រកាសទាត់ចោលវិញដោយមិនបង្អង់យូរឡើយ។ អ្នកនាំពាក្យក្រសួងការបរទេសឥណ្ឌា Raveesh Kumar ហៅការចោទរបស់លោក Qureshi ជាការមិនទទួលខុសត្រូវ និងធ្វើឡើងដោយខុសទំនងទៀតផង។ តាមរយ Twitter របស់ខ្លួន មន្ត្រីនាំពាក្យដដែលនេះក៏ចាត់ទុកសម្ដីលោក Qureshi ជាការប៉ុនប៉ងបង្កការភ័យខ្លាចនៃការផ្ទុះសង្គ្រាមក្នុងតំបន់។
លោក Kumar វាយនិយាយរិះគន់លោក Qureshi វិញថា កំពុងប្រាប់ឲ្យក្រុមភេរវជនមានទីតាំងនៅទឹកដីប៉ាគីស្ថានឲ្យបើកការវាយប្រហារក្នុងទឹកដីឥណ្ឌាទៀតផង។ មន្ត្រីឥណ្ឌាដដែលនេះ ប្រាប់ឲ្យក្រុងអ៊ីស្លាម៉ាបាដបោសសម្អាតក្រុមជ្រុលនិយមដែលលាក់ខ្លួនក្នុងទឹកដីប៉ាគីស្ថាន ជាជាងការនិយាយស្ដីដែលបិទបាំងបញ្ហាស្នូលរបស់តំបន់នោះ គឺសកម្មភាពភេរវកម្មឆ្លងព្រំដែនតែម្ដង។
តាមពិតទៅ ឥណ្ឌាតែងចោទប្រកាន់គូសត្រូវស្លាប់រស់ពីដែលបានអនុញ្ញាតឲ្យក្រុមភេរវករបើកមូលដ្ឋានរបស់ខ្លួន ដើម្បីធ្វើសកម្មភាពប្រឆាំងឥណ្ឌាវិញ។ កាលពីហេតុការណ៍ថ្ងៃទី១៤ ខែកុម្ភៈដែលសម្លាប់ទាហានឥណ្ឌាអស់៤០នាក់ ក្រុមជ្រុលនិយម Jaish-e-Mohammad ដែលមានជំរំក្នុងទឹកដីប៉ាគីស្ថានប្រកាសនៅពីក្រោយហេតុការណ៍នេះ។ យ៉ាងណា ក្រុងអ៊ីស្លាម៉ាបាដតែងបដិសេធរាល់ការចោទប្រកាន់ទាំងឡាយលើខ្លួន ហើយអំពាវនាវឲ្យមានការសហការជាមួយក្រុងញូវដែលីផង៕
Tag:
ឥណ្ឌា
ប៉ាគីស្ថាន
Shah Mehmood Qureshi
© រក្សាសិទ្ធិដោយ thmeythmey.com
