កីឡាជាតិ
ជាតិ
លោក ពៅ សុខចាន់ គ្រូបង្វឹកយុទ្ធក្រមខម ទទួលមរណៈភាពក្នុងគ្រោះថ្នាក់ក្រឡាប់រថយន្ត
× ភ្នំពេញ៖ លោក ពៅ សុខចាន់ គ្រូបង្វឹកក្បាច់គុនយុទ្ធក្រមខមបានទទួលមរណៈភាពក្នុងគ្រោះថ្នាក់ក្រឡាប់រថយន្តនៅខេត្តព្រះវិហារកាលពីថ្ងៃទី៧ ខែមេសា ឆ្នាំ២០១៩។ បច្ចុប្បន្នសពលោក សុខចាន់ កំពុងតម្កល់ធ្វើបុណ្យនៅស្រុកពាមជរ ខេត្តព្រៃវែង។ មរណៈភាពរបស់លោក សុខចាន់ គឺជាការបាត់បង់ធនធានមនុស្សមួយដ៏សំខាន់ ព្រោះលោកមិនត្រឹមតែជាអ្នកសាបព្រោះក្បាច់គុនដូនតាខ្មែរដល់យុវជនជំនាន់ក្រោយប៉ុណ្ណោះទេ ថែមទាំងបង្ហាត់ដល់ជួរកងនគរបាលទៀតផង។
បញ្ហាគ្រោះថ្នាក់ខាងលើបានកើតឡើងក្រោយលោក ពៅ សុខចាន់ បើកឡានតាមជើងភ្នំត្រឡប់មកពីបង្វឹកក្បាច់គុនយុទ្ធក្រមខមដល់មន្ត្រីកងនគរបាលព្រំដែននៅខេត្តព្រះវិហារ។ ក្រោយរងគ្រោះថ្នាក់ក្រឡាប់ឡានលោក សុខចាន់ ត្រូវបានគេដឹកយកមកសង្គ្រោះនៅមន្ទីរបង្អែកខេត្តសៀមរាប ហើយបានបញ្ជូនបន្តមកសង្គ្រោះនៅមន្ទីរពេទ្យកាល់ម៉ែត។ ប៉ុន្តែដោយសារស្ថានភាពរបួសក្បាលមានសភាពធ្ងន់ធ្ងរពេក ធ្វើឲ្យលោក សុខចាន់ ទទួលមរណៈភាពតែម្តង នៅយប់ថ្ងៃទី៧ ខែមេសា ឆ្នាំ២០១៩។ នេះបើតាមអង្គភាព Fresh News ដែលបានស្រង់សម្តីលោក នរៈ តខ្លា ដែលជាសិស្សច្បងរបស់លោក សុខចាន់ ។
លោក នរៈ តខ្លា បានចាត់ទុកមរណៈភាពរបស់លោក ពៅ សុខចាន់ ជាការបាត់បង់ធនធានមួយដ៏ល្អរបស់សង្គម ព្រោះរូបគេមិនត្រឹមតែជាអ្នកបង្ហាត់ក្បាច់គុនយុទ្ធក្រមខមដល់យុវជននៅសហព័ន្ធកីឡាយុទ្ធក្រមខមកម្ពុជាប៉ុណ្ណោះទេ រូបគេក៏ជាមន្ត្រីប៉ូលិសដ៏ល្អមួយរូបផងដែរ៕
Tag:
ពៅ សុខចាន់
យុទ្ធក្រមខម
© រក្សាសិទ្ធិដោយ thmeythmey.com