កីឡាអន្តរជាតិ
អន្តរជាតិ
Solskjaer ជឿថា Man Utd អាចទម្លាក់ Barca ដូច PSG ទោះចាញ់ ១-០ នៅជើងទី១
× លោក Ole Gunnar Solskjaer អ្នកចាត់ការទូទៅ Manchester United ថាកូនក្រុមលោកអាចរកគ្រាប់បាល់ជ័យជម្នះនៅក្នុងទឹកដីរបស់ Barcelona សម្រាប់ជំនួបជើងទី២ វគ្គ១/៤ ផ្តាច់ព្រ័ត្រ ពានរង្វាន់ Champions League។ Solskjaer និយាយបែបនេះបន្ទាប់ពីបិសាចក្រហមបរាជ័យក្រោមថ្វីជើងក្រុមអ្នកមានបុណ្យ ១-០ ក្នុងការប្រកួតជើងទី១។
គ្រាប់បាល់ធ្វើឲ្យចូលទីខ្លួនឯងរបស់ខ្សែការពារ Luke Shaw នៅនាទី១២ បាននាំឲ្យ Barca យកឈ្នះ Man Utd ១-០ ក្នុងការប្រកួតជើងទី១នៅទឹកដី Old Trafford នៅរាត្រីថ្ងៃទី១០ ខែមេសា។ ក្រុមទាំំងពីរនឹងត្រូវតទល់គ្នាម្តងទៀតនៅជំនួបជើងទី២ក្នុងទឹកដី Camp Nou នៅថ្ងៃទី១៦ ខែឧសភា ដើម្បីកាត់សេចក្តីថាក្រុមណាអាចឡើងទៅវគ្គពាក់កណ្តាលផ្តាច់ព្រ័ត្រ។
យ៉ាងណា បរាជ័យក្នុងដីនេះមិនអាចធ្វើឲ្យលោក Solskjaer អស់សង្ឃឹមឡើយ ហើយថែមទាំងជឿជាក់ថាកូនក្រុមលោកអាចរកគ្រាប់បាល់នៅក្រៅដីវិញទៀតផង។ អ្នកចាត់ការសញ្ជាតិន័រវែសបានប្រាប់ BT Sport ក្រោយចប់ការប្រកួតថា៖«យើងកំពុងលេងជាមួយក្រុមដ៏អស្ចារ្យ ហើយវាជាការប្រកួតដ៏ស្វិតស្វាញមួយ។ យើងនឹងទៅទឹកដីពួកគេវិញជាមួយនឹងបទពិសោធន៍ ហើយអាចរកគ្រាប់បាល់លើពួកគេនៅទីនោះ។ យើងទៅទីនោះដើម្បីតែរឿងមួយប៉ុណ្នោះក្នុងចិត្តខ្ញុំ គឺត្រូវតែរកគ្រាប់បាល់ឲ្យបាន»។
កាលពីនៅវគ្គ១៦ក្រុមចុងក្រោយ Man Utd បានចាញ់ Paris St-Germain ដល់ទៅ ២-០ នៅជើងទី១ក្នុងដីខ្លួនឯង ប៉ុន្តែពួកគេនៅតែអាចវាយបកយកឈ្នះក្រុមយក្សបារាំងនេះវិញបាននៅក្រៅដីដោយលទ្ធផល ៣-១។
«ការបង្ហាញទម្រង់លេងដ៏ល្អពេលប៉ះ PSG បានផ្តល់ឲ្យយើងនូវក្តីសង្ឃឹម និងជំនឿចិត្តថាក្រុមយើងអាចធ្វើបាន ប៉ុន្តែយើងកំពុងតទល់ជាមួយក្រុមខ្លាំងពេលនេះ។ បើយើងអាចធ្វើបានដើម្បីឈានទៅវគ្គ៤ក្រុមចុងក្រោយ វានឹងក្លាយជាសមិទ្ធផលដ៏ធំធេងបំផុតសម្រាប់ Man Utd»។ Solskjaer បន្ថែមដូច្នេះ។
ដោយឡែកអ្នកចាត់ Barcelona លោក Ernesto Valverde មិនបាននិយាយអ្វីច្រើនក្នុងជ័យជម្នះលើក្រុមពីអង់គ្លេសនេះឡើយ។
អ្នកចាត់ការសញ្ជាតិអេស្ប៉ាញរូបនេះគ្រាន់តែរម្លឹកពីរបៀបដែល Man Utd ធ្វើបានជាមួយ PSG នៅវគ្គ១៦ក្រុម។ «យើងគិតថាវានឹងមានការលំបាកខ្លាំងនៅជំនួបបន្ទាប់ ហើយលទ្ធផល ១-០ នេះមិនទាន់អាចសម្រេចអ្វីបានឡើយ»៕
Tag:
បាល់ទាត់
Ole Gunnar Solskjaer
UEFA Champions League
© រក្សាសិទ្ធិដោយ thmeythmey.com