ជាតិ
រូបភាព AFP
×![]()
ដោយ: តន ចាន់រិទ្ធារ៉ា
កម្ពុជា បានដាក់ពាក្យបណ្ដឹងទៅកាន់តុលាការយុត្តិធម៌អឺរ៉ុប ដើម្បីតវ៉ាការសម្រេចចិត្តរបស់គណៈកម្មការ អឺរ៉ុបដែលយកពន្ធនាំចូលអង្ករ។ ការយកពន្ធនាំចូលរយៈពេលបីឆ្នាំ ចាប់ផ្ដើមអនុវត្តចាប់ខែមករាកន្លងទៅ។ មីយ៉ាន់ម៉ា ជាប្រទេសមួយទៀតដែលរងវិធានការរបស់អឺរុប។ 
ការយកពន្ធនាំចូលលើអង្ករកម្ពុជា និងមីយ៉ាន់ម៉ា ត្រូវបានសហភាពអឺរ៉ុបអះអាងថា ដើម្បីការពារអ្នកផលិតអង្ករនៅតំបន់អឺរ៉ុបដូចជាអ៊ីតាលីជាដើម។ យ៉ាងណាមិញ សហព័ន្ធស្រូវអង្ករកម្ពុជានិយាយនៅថ្ងៃទី១១ ខែមេសា ថា វិធានការការពាររបស់អឺរ៉ុប មិនទាក់ទងនឹងសកម្មភាពមិនស្មើភាពអ្វីឡើយ ហើយធ្វើឡើងដោយផ្អែកលើការប្រើប្រាស់ទិន្នន័យមិនពេញលេញ។ នេះបើតាមការផ្សាយរបស់ទីភ្នាក់ងារព័ត៌មាន Reuters ។
តាមពិតទៅ សមាជិកភាគច្រើនរបស់សហភាពអឺរ៉ុប គាំទ្រវិធានការការពារនេះ ប៉ុន្តែមិនបានឯកភាពគ្នាឡើយ។ ដូចនេះហើយ ទើបគណៈកម្មការអឺរ៉ុបសម្រេចចិត្តអនុវត្តការយកពន្ធចូលអង្ករនេះចំនួន៣ឆ្នាំតែម្ដង។ នៅឆ្នាំដំបូង អឺរ៉ុបនឹងយកពន្ធ១៩៧,១៣ដុល្លារក្នុងមួយតោន នៅឆ្នាំទីពីរ ទម្លាក់មកត្រឹម១៦៩,២៧ដុល្លារក្នុងមួយតោន និងឆ្នាំទីបី ចុះមក១៤១,០៦ដុល្លារក្នុងមួយតោន។
គណៈកម្មការអឺរ៉ុបលើកឡើងថា ខ្លួនរកឃើញការនាំចូលអង្ករពីកម្ពុជា និងមីយ៉ាន់ម៉ាទៅកាន់ទីផ្សារអឺរ៉ុបកើនឡើងចំនួន៨៩ភាគរយក្នុងរយៈពេល៥រដូវចុងក្រោយ ហើយការនាំចូលដែលមានតម្លៃទាបធ្វើឲ្យចំណែកក្នុងទីផ្សាររបស់អ្នកផលិតនៅអឺរ៉ុបធ្លាក់ពី៦១ភាគរយមកត្រឹម២៩ភាគរយ។
ក្រសួងពាណិជ្ជកម្មកម្ពុជា ធ្លាប់អះអាងហើយថា ចំណាត់ការរបស់អឺរ៉ុបជាអាវុធសម្លាប់កសិករកម្ពុជា និងផ្ទុយពីច្បាប់អន្តរជាតិផង៕
Tag:
កម្ពុជា
អឺរ៉ុប
អង្ករ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
