ជាតិ
សង្រ្កាន្តឆ្នាំថ្មី
អភិបាលខេត្តពន្យល់មូលហេតុដែលមានតំបន់លេងទឹកក្នុងព្រឹត្តិការណ៍សៀមរាបសង្ក្រាន្ត
រូបថត Tea Seiha
×![]()
សៀមរាប៖ មានការរិះគន់បន្ដិចពីការរៀបចំឱ្យមានតំបន់លេងទឹក ការដាក់ពាងទឹកដើម្បីឱ្យសាធារណជនលេងទឹកក្នុងព្រឹត្តិការណ៍សៀមរាបសង្ក្រាន្ត ដែលរៀបចំឡើងដោយសហភាពសហព័ន្ធយុវជនកម្ពុជាខេត្ត រួមនិងរដ្ឋបាលខេត្តសៀមរាប។ នៅថ្ងៃបើកព្រឹត្តិការណ៍នៅព្រឹកថ្ងៃទី១៤ ខែមេសានេះ អភិបាលខេត្ត លោក ទៀ សីហា បានពន្យល់ពីមូលហេតុទាំងនេះ និងថាការរៀបចំនេះបានគិតគួរច្បាស់លាស់។
នៅចំពោះមុខសម្ដេច ទៀ បាញ់ ដែលធ្វើជាអធិបតីបើកព្រឹត្តិការណ៍សៀមរាបសង្ក្រាន្ត អភិបាលខេត្តសៀមរាប លោក ទៀ សីហា បានប្រាប់ពីមូលហេតុដែលសៀមរាបគ្មានអង្គរសង្ក្រាន្តនៅឆ្នាំនេះ ក៏ដូចជាការរៀបចំសៀមរាបសង្ក្រាន្តដោយប្រើពេលវេលាខ្លី។ តាមលោកអភិបាលខេត្ត សៀមរាបសង្ក្រាន្តរៀបចំត្រឹម១៣ថ្ងៃប៉ុណ្ណោះ បន្ទាប់ពីការសម្រេចចិត្តផ្អាកព្រឹត្តិការណ៍អង្គរសង្ក្រាន្ត។ ប្រើពេលវេលាខ្លីក៏ពិតមែន តែដោយសារការខិតខំប្រឹងប្រែងរបស់ក្រុមការងារ ធ្វើឱ្យព្រឹត្តិការណ៍នេះប្រព្រឹត្តិទៅដោយរលូន។ នេះជាការលើកឡើងរបស់លោក ទៀ សីហា។
ជាមួយគ្នានេះ លោក ទៀ សីហា ក៏បានបកស្រាយពីការរៀបចំតំបន់ តោះតោះលេងទឹកផងដែរ។ លោកអភិបាលខេត្តទទួលស្គាល់ថា តំបន់ខ្លះនៃខេត្តជួបគ្រោះខ្វះទឺកពិតមែន តែការរៀបចំឱ្យមានការលេងទឹក ក៏រិតតែមិនអាចរំលងបានឡើយ ដ្បិតថាជាប្រពៃណីមួយក្នុងពិធីបុណ្យចូលឆ្នាំដែលប្រជាពលរដ្ឋនិយមលេង ដូចជាពិធីស្រង់ព្រះជាដើម។ លោកបន្ថែមថា ក្រុមការងារចម្រុះបានចុះជួយផ្តល់ទឹកដល់តំបន់ខ្វះទឹករួចរាល់ហើយដែរ ហើយខេត្តសៀមរាបក៏មិនមានការចាំបាច់ដើម្បីទៅទិញទឹកពីខាងណានោះដែរ។
ក្រៅពីនេះ លោកអភិបាលខេត្តក៏ប្រាប់ពីមូលហេតុក្នុងការជ្រើសរើសតំបន់សួនច្បារព្រះរាជដំណាក់ និងបរិវេណព្រះអង្គចេកព្រះអង្គចម សម្រាប់ប្រារព្ធពិធីសៀមរាបសង្ក្រាន្តនេះ។ លោកថា ដោយសារតំបន់នេះត្រូវបានរៀបចំស្អាតដោយអតីតអភិបាលមុន ណាមួយជាតំបន់ទីសក្ការមួយសម្រាប់ខេត្ត ដែលលោកជឿថាស័ក្ដិសមបំផុតសម្រាប់ការរៀបចំពិធីបុណ្យប្រពៃណីជាតិមួយនេះ។ យ៉ាងណា លោក ទៀ សីហា ក៏សុំការយកយោគយល់ដល់សាធារណជនចំពោះករណីកកស្ទះចរាចរណ៍ជុំវិញបរិវេណនេះ ដោយសារអាជ្ញាធរត្រូវបង្ខំចិត្តបិទផ្លូវមួយចំនួនធំជុំវិញបរិវេណ បំណងដើម្បីសណ្ដាប់ធ្នាប់ សន្ដិសុខ និងសុវត្ថិភាពដល់ភ្ញៀវជាតិ និងអន្ដរជាតិ៕
Tag:
សង្ក្រាន្ត
© រក្សាសិទ្ធិដោយ thmeythmey.com
