បទយកការណ៍ / បទសម្ភាសន៍
×![]()
សៀមរាប៖ ជាបន្តបន្ទាប់ ផ្លូវក្នុងតំបន់រមណីយដ្ឋានអង្គរ ត្រូវបានស្ថាបនា និងជួសជុល ក្នុងបំណងដើម្បីសម្រួលចរាចរណ៍ដល់ភ្ញៀវទេសចរ ក៏ដូចជាសាធារណជនទូទៅ។ អាជ្ញាធរជាតិអប្សរា ដែលគ្រប់គ្រងតំបន់នេះបានបង្ហាញគោលជំហរច្បាស់លាស់ និងចាត់ទុកការស្ថាបនាផ្លូវ ថាជាចំណុចអាទិភាពមួយទន្ទឹមនឹងការអភិរក្សប្រាសាទ។ អាជ្ញាធរបានលើកឡើងថា ត្រឹមឆ្នាំ២០២០ ផ្លូវថ្នល់នៅតំបន់អង្គរនឹងត្រូវស្ថាបនា កែលម្អថ្មីឱ្យបានស្អាតទាំងស្រុង។
ព័ត៌មានលម្អិត សូមស្ដាប់បទយកការណ៍ដែលរៀបរៀងដោយអ្នកស្រី អ៊ីសា រ៉ហានី ពីខេត្តសៀមរាបដូចតទៅ៖
ផ្លូវថ្នល់ ត្រូវបានរដ្ឋាភិបាលកម្ពុជាចាត់ទុកដូចជាសរសៃឈាមដ៏សំខាន់ ហើយការអភិវឌ្ឍនានាប្រសិនបើគ្មានប្រព័ន្ធផ្លូវថ្នល់ នោះក៏មិនអាចទៅមុខបានដែរ។ គេតែងបានដឹង និងស្ដាប់ឮប្រមុខរដ្ឋាភិបាល ក៏ដូចជាមន្ត្រីនៃអាជ្ញាធរជាតិអប្សរា តែងបាននិយាយថា ការអភិរក្ស និងអភិវឌ្ឍន៍ ត្រូវដើរទន្ទឹមគ្នា ត្រូវទាញអត្ថប្រយោជន៍ និងបម្រើឱ្យគ្នាទៅវិញទៅមក។ ការអភិរក្ស មិនអាចខ្វះការអភិវឌ្ឍ ហើយការអភិវឌ្ឍក៏មិនត្រូវខ្វះការអភិរក្សដែរ។
ការស្ថាបនា និងជួសជុលផ្លូវនៅតំបន់រមណីយដ្ឋានអង្គរ កំពុងមមាញឹកនារយៈពេលប៉ុន្មានឆ្នាំចុងក្រោយនេះ។ ដោយសារជាតំបន់បេតិកភណ្ឌ ដូច្នេះការកសាង និងជួសជុលផ្លូវក្នុងតំបន់នេះ ក៏ខុសពីតំបន់ដទៃដែរ។ ការងារទាំងនេះ ត្រូវបានសិក្សាយ៉ាងស៊ីជម្រៅ និងមានការឯកភាពពីគណៈកម្មាធិការសម្របសម្រួល ដើម្បីកិច្ចការអភិរក្ស និងអភិវឌ្ឍន៍រមណីយដ្ឋានអង្គរ ហៅកាត់ថា អាយស៊ីស៊ី-អង្គរ រួមនិងអង្គការយូណេស្គូ។ មុននឹងស្ថាបនាទៀតសោត ត្រូវមានការធ្វើកំណាយសង្គ្រោះ ប្រសិនមានការសង្ស័យពីទីតាំងបុរាណដ្ឋានណាមួយ។ល។
លោក យិត ចាន់ដារដ្ឋ អគ្គនាយករងអាជ្ញាធរជាតិអប្សរា និងទទួលបន្ទុកលើការងារផ្លូវថ្នល់របស់អាជ្ញាធរជាតិអប្សរា បានឱ្យដឹងថា ទាក់ទងនឹងរឿងផ្លូវនេះ អាជ្ញាធរអប្សរាបានរៀបចំផ្លូវវាង ក៏ដូចជាការបន្ដជួសជុលផ្លូវនៅតំបន់ដែលស្ថិតក្នុងដែនសមត្ថកិច្ចរបស់ខ្លួន។ ហើយការរៀបចំផ្លូវវាង គឺមានសារសំខាន់ណាស់ដើម្បីបញ្ជៀសចរាចរណ៍ដឹកធ្ងន់ៗ ដែលរង្គើប្រាសាទ ក៏ដូចជាការបំពុលបរិស្ថាន។
មកដល់បច្ចុប្បន្ននេះ ការស្ថាបនា និងជួសជុលផ្លូវក្នុងរមណីយដ្ឋានអង្គរ សម្រេចបានជិតរួចរាល់ហើយដែរ។ ផ្លូវដែលស្ថាបនារួចជាស្ថាពរក្នុងនោះរួមមាន ផ្លូវកូម៉ៃ កំណាត់ផ្លូវ៦០ម៉ែត្រ ផ្លូវវង់តូច និងផ្លូវវង់ធំ ដែលក្រុមការងាររបស់អាជ្ញាធរជាតិអប្សរាបាននិងកំពុងបន្តធ្វើជាប់រហូត។ ហើយផ្លូវដែលកំពុងជួសជុលធ្វើថ្មី រួមមានផ្លូវមិត្តភាពកម្ពុជា-កូរ៉េ ផ្លូវមុខព្រលានយន្តហោះអន្ដរជាតិសៀមរាប។ល។ ក្នុងគម្រោងរបស់អាជ្ញាធរជាតិអប្សរា ផ្លូវក្នុងតំបន់អង្គរនឹងត្រូវស្ថាបនាឱ្យបានស្អាតទាំងស្រុងនៅត្រឹមឆ្នាំ២០២០។
ក្រៅពីផ្លូវនៅខាងក្រៅប្រាសាទហើយ ក្នុងនោះអាជ្ញាធរជាតិអប្សរា ក៏បានគិតគូរពីការរៀបចំផ្លូវថ្មើរជើងតាមបរិវេណប្រាសាទផងដែរ។ ជាទូទៅ ការងារនេះត្រូវមានការប្រុងប្រយ័ត្នបន្ដិច ទាំងបច្ចេកទេស និងការតុបតែងផ្សេងៗ ដោយត្រូវធ្វើយ៉ាងណាឱ្យមានលក្ខណៈដូចដើម ស៊ីទៅនឹងទេសភាពវប្បធម៌ក្នុងតំបន់បេតិកភណ្ឌ។ នេះជាការគិតគូរវែងឆ្ងាយរបស់អាជ្ញាធរជាតិអប្សរា ក្នុងការលើកតម្លៃបេតិកភណ្ឌជាតិ ក៏ដូចជាស្របតាមគោលការណ៍របស់អង្គការយូណេស្កូផងដែរ។
ដើម្បីការអភិរក្ស និងអភិវឌ្ឍនេះដែរ អាជ្ញាធរបានរៀបចំផ្លូវវាងនៅមុខប្រាសាទមួយចំនួនក្នុងតំបន់អង្គរ រួមមានផ្លូវវាងមុខប្រាសាទអង្គរវត្ត និងគម្រោងរៀបចំផ្លូវវាងនៅមុខព្រះលានជល់ដំរីជាដើម។ លោក យិត ចាន់ដារដ្ឋ បានឱ្យដឹងថា ដោយសារផ្លូវទាំងនោះនៅកៀកប្រាសាទពេក វាបង្កផលប៉ះពាល់ដល់ប្រាសាទ។ អាជ្ញាធរជាតិអប្សរា និងបិទផ្លូវទាំងនោះដើម្បីរៀបចំដាំស្មៅលម្អសោភណ្ឌភាពជុំវិញបរិវេណ ហើយរៀបចំផ្លូវវាងថ្មី។
នៅពេលផ្លូវស្អាត ការចរាចររបស់ប្រជាពលរដ្ឋ ពិសេសអ្នកធ្វើការលើវិស័យទេសចរណ៍ដឹកភ្ញៀវក៏មានភាពងាយស្រួលទៅតាមនោះដែរ។ ជាក់ស្ដែង លោក ឈិត ប៊ុនហ៊រ ជាមគ្គុទ្ទេសក៍ កំពុងធ្វើដំណើរលើផ្លូវវង់ធំឆ្ពោះពីខ្លោងទ្វារដៃឆ្នាំង គោលដៅទៅប្រាសាទតាសោម បានឱ្យដឹងថា ផ្លូវល្អស្រួលធ្វើដំណើរ ហើយការធ្វើដំណើររបស់ភ្ញៀវក៏មានសុវត្ថិភាព និងភាពរីករាយទៅតាមនោះដែរ។
ចំណែកលោក កូកូ វិញ លោកជាអ្នករត់រ៉ឺម៉កកង់បី និងកំពុងរង់ចាំភ្ញៀវនៅមុខប្រាសាទតាសោម។ លោកថា តាំងពីការមានផ្លូវល្អមក ភ្ញៀវតែងសរសើរពីការរីកចម្រើនរបស់កម្ពុជា ឯការបើកបរក៏ប្រសើរជាងមុនៗដែរ៕
© រក្សាសិទ្ធិដោយ thmeythmey.com
