មន្ត្រីអាមេរិកទៅរុស្ស៊ីជជែករឿងរំសាយនុយក្លេអ៊ែរ មុនលោក ពូទីន ជួបលោក គីម

អន្តរជាតិ

មន្ត្រីអាមេរិកទៅរុស្ស៊ីជជែករឿងរំសាយនុយក្លេអ៊ែរ មុនលោក ពូទីន ជួបលោក គីម

18, Apr 2019 , 8:59 pm

រូបភាព

ដោយ: តន ចាន់រិទ្ធារ៉ា

បេសកជនចរចានុយក្លេអ៊ែររបស់អាមេរិក ទៅដល់ទីក្រុងមូស្គូនៅថ្ងៃទី១៧ ខែមេសា ដើម្បីជជែករឿងនុយក្លេអ៊ែរកូរ៉េខាងជើង។ វត្តមានរបស់លោក Stephen Biegun ធ្វើឡើងស្របពេលដែលក្រុងមូស្គូកំពុងរៀបចំជំនួបរវាងប្រធានាធិបតីរុស្ស៊ី វ្ល៉ាឌីមៀ ពូទីន ជួបមេដឹកនាំកូរ៉េខាងជើង គីម ជុងអ៊ុន ។ មន្ត្រីអាមេរិក ទំនងជាបញ្ចុះបញ្ចូលឲ្យរុស្ស៊ីជួយជំរុញកូរ៉េខាងជើងឲ្យបន្តការប្ដេជ្ញាចិត្តក្នុងការរំសាយនុយក្លេអ៊ែរ និងចាប់ផ្ដើមការចរចាដែលកំពុងជាប់គាំង។

លោក Stephen Biegun តំណាងចរចានុយក្លេអ៊ែររបស់អាមេរិក ធ្វើទស្សនកិច្ចពីរថ្ងៃនៅទឹកដីរុស្ស៊ីដែលនឹងបញ្ចប់នៅថ្ងៃទី១៨ ខែមេសានេះ។ ក្រសួងការបរទេសអាមេរិកប្រកាសថា លោក Biegun នឹងជួបជជែកជាមួយមន្ត្រីលើការជំរុញការសម្រេចឲ្យបានការរំសាយនុយក្លេអ៊ែរទាំងស្រុង និងដោយមានការត្រួតពិនិត្យផងដែរ។ ការរំសាយនុយក្លេអ៊ែរទាំងស្រុង និងធ្វើតែម្ដងនេះ ជាជំហរអាមេរិកយូរហើយ ទោះកូរ៉េខាងជើងចង់ធ្វើជាដំណាក់កាលក្ដី។

ដំណើរទស្សនកិច្ចរបស់លោក Biegun កើតឡើងចំពេលដែលរុស្ស៊ីកំពុងញាប់ដៃក្នុងការរៀបចំជំនួបទល់មុខលើកទីមួយរវាងប្រធានាធិបតី វ៉ា្លឌីមៀ ពូទីន និងមេដឹកនាំកូរ៉េខាងជើង គីម ជុងអ៊ុន ។ ការរៀបចំបានចាប់ផ្ដើមជាច្រើនសប្ដាហ៍មកហើយ ដោយមន្ត្រីជំនិតលោក គីម បានទៅទស្សនកិច្ចនៅរដ្ឋធានីមូស្គូ និងទីក្រុងវ្ល៉ាឌីវ៉ូស្តុក ជាទីដែលោកមេដឹកនាំទាំងពីរគ្រោងជួបគ្នា។ ប្រព័ន្ធសារព័ត៌មានខ្លះផ្សាយថា លោក ពូទីន នឹងទទួលលោក គីម នៅសប្ដាហ៍ក្រោយ មុនធ្វើដំណើរទៅចិន។

ដោយសាររុស្ស៊ីជាខ្នងបង្អែករឹងមាំមួយរបស់កូរ៉េខាងជើង លោក Biegun នឹងស្នើឲ្យរុស្ស៊ីលូកដៃឲ្យកាន់តែខ្លាំងដើម្បីធានាថា កូរ៉េខាងជើងអនុវត្តតាមសម្ដីរបស់ខ្លួនក្នុងការបោះបង់នុយក្លេអ៊ែរ ហើយត្រឡប់ចូលតុចរចាវិញ។ តាមពិតទៅ រុស្ស៊ីផ្ទាល់ ក៏ចង់មានតួនាទីធំក្នុងការដំណើរការរំសាយនុយក្លេអ៊ែររបស់កូរ៉េខាងជើងដែរ ប៉ុន្តែនៅពេលលោក គីម ជួបមេដឹកនាំចិន កូរ៉េខាងត្បូង និងអាមេរិកញឹកញាប់នោះ រុស្ស៊ីហាក់នៅក្រៅឆាកទៅវិញ។

បើសិនជួបគ្នាតាមគម្រោងមែន នេះជាជំនួបទល់មុខលើកទីមួយក្នុងរយៈពេល៨ឆ្នាំ។ ជំនួបចុងក្រោយរវាងមេដឹកនាំរុស្ស៊ី និងកូរ៉េខាងជើង កើតឡើងចុងក្រោយនៅឆ្នាំ២០១១ ពេលអតីតប្រធានាធិបតី ឌីមីទ្រី ម៉េដវ៉េដេវ ជួបអតីតមេដឹកនាំកំពូល គីម ជុងអ៊ីល ។

បើតាមទីភ្នាក់ងារព័ត៌មានកូរ៉េខាងត្បូង Yonhap អាកាសចរណ៍កូរ៉េខាងជើង Air Koryo បានបើកជើងហោះហើរពិសេសមួយទៅកាន់ទឹកដីចុងបូព៌ារបស់រុស្ស៊ីនៅសប្ដាហ៍ក្រោយ ដែលនោះទំនងជាផ្នែកមួយនៃការរៀបចំជំនួបរវាងលោក ពូទីន និងលោក គីម ។ បានន័យថា មេដឹកនាំកូរ៉េខាងជើងទំនងជ្រើសរើសផ្លូវធ្វើដំណើរតាមអាកាសក្នុងដំណើរទស្សនកិច្ចនៅបរទេសលើកនេះ ជំនួសឲ្យការជិះរថភ្លើងពិសេសរបស់ខ្លួនដូចពេលកន្លងទៅ៕