ជាតិ
សមាគមភាពយន្ត គ្រោងធ្វើរបាយការណ៍ដាក់ទៅក្រសួងវប្បធម៌ ដើម្បីចាត់វិធានការចំពោះអ្នកលួចថតចម្លងកម្មសិទ្ធបញ្ញា លោក ព្រំ សិលា ប្រធានសមាគមភាពយន្តកម្ពុជា (រូបភាព៖ហ្វេសប៊ុកសមាគមភាពយន្តកម្ពុជា)
× ភ្នំពេញ៖ សមាគមភាពយន្តកម្ពុជា គ្រោងធ្វើរបាយការណ៍ជុំវិញករណីលួចថតចម្លងកម្មសិទ្ធបញ្ញា ដាក់ទៅក្រសួងវប្បធម៌ និងវិចិត្រសិល្បៈ ដើម្បីចាត់វិធានការចំពោះជនខិលខូចតាមផ្លូវច្បាប់។ យន្តការរបស់សមាគមភាពយន្តនេះ ធ្វើឡើងបន្ទាប់ពីមានជនខិលខូច បានលួចថតចម្លងសាច់រឿង«ជួបស៊យវគ្គ២» យកទៅបង្ហោះលើបណ្ដាញយូធូប (Youtube) កាលពីពេលថ្មីៗនេះ។
ដោយសារតែបញ្ហាលួចចម្លងកម្មសិទ្ធបញ្ញាកើតឡើងច្រំដែលនេះ សមាគមភាពយន្ត ប្រកាសលែងទទួលយកពាក្យ«សុំទោស»ហើយ ពីជនខិលខូចណា ដែលខាងសមាគម ចាប់កំហុសបាននោះ។ សម្រាប់សកម្មភាពលួចថតចម្លងបែបនេះ សមាគមភាពយន្ត ចាត់ទុកជាអំពើមិនគួរគប្បី ដែលត្រូវប្រឈមចំពោះមុខច្បាប់។
តាមរយៈហ្វេសប៊ុកផ្លូវការនោះ សមាគមភាពយន្តកម្ពុជា បានសរសេរដូច្នេះថា៖«សូមផ្តន្ទាទោសចំពោះការលួចថតចម្លងរាល់កម្មសិទ្ធបញ្ញាទាំងឡាយ។ រាល់ស្នាដៃទាំងឡាយតែងមានម្ចាស់កម្មសិទ្ធ ជនទាំងឡាយណាដែលលួចចម្លងកម្មសិទ្ធ ដោយគ្មានការអនុញ្ញាតិ ជននោះនឹងត្រូវទទួលខុសត្រូវចំពោះមុខច្បាប់។ ចាប់ពីថ្ងៃនេះទៅយើងខ្ញុំលែងទទួលពាក្យ«សូមទោស» ឆ្លើយថាមិនដឹងទៀតហើយ អ្នកប្រព្រឹត្តខុសនឹងត្រូវទទួលទោសចំពោះមុខច្បាប់»។
ទាក់ទងនឹងការលួចថតចម្លងសាច់រឿងយកទៅបង្ហោះលើបណ្ដាញសង្គមនេះ តែងតែមានការហាមប្រាមពីសំណាក់សមាគមភាពយន្ត និងម្ចាស់រោងកុង ព្រមទាំងព្រមានដាក់ពិន័យចំពោះអថិតិជនលួចថតចម្លងកម្មសិទ្ធបញ្ញានេះផងដែរ។ ប៉ុន្តែករណីនេះ នៅតែបន្តកើតមាន។
ដើម្បីដោះស្រាយបញ្ហានេះ ស្របតាមផ្លូវច្បាប់នោះ សមាគមភាពយន្តកម្ពុជា គ្រោងធ្វើរបាយការណ៍ដាក់ទៅដាក់ទៅក្រសួងវប្បធម៌ និងវិចិត្រសិល្បៈ ដើម្បីចាត់វិធានការចំពោះជនខិលខូចតាមផ្លូវច្បាប់។«រួមគ្នាកម្ចាត់ក្រុមលួចចម្លងដើម្បីឱ្យវិស័យសិល្បៈភាពយន្តជាតិយើងរីកចម្រើន។យើងខ្ញុំនឹងរៀបចំរបាយការណ៍ដាក់ជូនក្រសួងវប្បធម៌ និង វិចិត្រសិល្បៈ»។ នេះជាការបញ្ជាក់របស់សមាគមភាពយន្តកម្ពុជា។
កន្លងមកសមាគមភាពយន្តកម្ពុជា បានអំពាវនាវដល់ក្រសួងវប្បធម៌ និងស្ថាប័នពាក់ព័ន្ធ រឹតបន្តឹងវិធានការនានាដែលបានដាក់ចេញទាក់ទងនឹងការណែនាំការចាក់បញ្ចាំងភាពយន្តខ្មែរ និងវិធានការមួយចំនួនទៀត ដើម្បីការពារវិស័យភាពយន្តខ្មែរ និងបញ្ចៀសទំនាស់នៅក្នុងវិស័យនេះ៕
© រក្សាសិទ្ធិដោយ thmeythmey.com