ជាតិ
នយោបាយជាតិ
អ្នកប្រឆាំង ប្រមូលផ្តុំគ្នានៅកូរ៉េខាងត្បូង ធ្វើមហាបាតុកម្មភ្លើងទៀន រូបពីទំព័រហ្វេសប៊ុករបស់លោក សម រង្ស៊ី
× គណបក្សសង្គ្រោះជាតិប្រចាំនៅកូរ៉េខាងត្បូង បានសហការជាមួយអង្គការ Asia Human Rights and Peace Forum (AHPF) រៀបចំវេទិកាមួយ ពីថ្ងៃទី១៩ដល់ថ្ងៃទី២០ ខែមេសា ឆ្នាំ២០១៩។ ស្របជាមួយគ្នានេះ ក្រុមអ្នកប្រឆាំង នឹងធ្វើមហាបាតុកម្មទ្រង់ទ្រាយធំផងដែរ ដែលហៅថាមហាបាតុកម្មភ្លើងទៀន។
លោក សម រង្ស៊ី មេដឹកនាំក្រុមប្រឆាំង រួមទាំងសហការីរបស់លោក បានទៅដល់កូរ៉េខាងត្បូងហើយ នៅថ្ងៃទី១៩ខែមេសានេះ។ អ្នកស្រី មូរ សុខហួរ បានសរសេរលើទំព័រហ្វេសប៊ុកថា «លោកប្រធាន សម រង្ស៊ី បានធ្វើដំណើរមកដល់ប្រទេសកូរ៉េខាងត្បូងហើយ ហើយនឹងបន្តមកប្រទេសកំណើតរបស់គាត់ ក្នុងពេលឆាប់ៗនេះ។ សូមបងប្អូន ខ្មែរពិសេសយុវជនត្រៀមទទួលលោកប្រធាន ដើម្បីសង្គ្រោះប្រទេសយើង»។
គេ ក៏បានលោក គឹម សុខ អ្នកវិភាគនយោបាយ ដែលភៀសខ្លួនទៅរស់នៅប្រទេសហ្វាំងឡង់ និង ព្រាប កុល នាយកប្រតិបត្តិអង្គការតម្លាភាពកម្ពុជា ក៏កំពុងមានវត្តមាននៅកូរ៉េខាងត្បូងដែរ។ ចំណែក លោក អ៊ូ ច័ន្ទរ័ត្ន និងលោក ជីវ កត្តា អតីតថ្នាក់ដឹកនាំគណបក្សប្រឆាំង ដែលទើបនឹងទទួលបានសិទ្ធិនយោបាយវិញ ក៏កំពុងស្ថិតនៅទីនោះដែរ។ ប៉ុន្តែ លោក អ៊ូ ច័ន្ទរ័ត្ន អះអាងថា ពួកលោកទាំងពីរ ទទួលបានការអញ្ជើញពីអង្គការ AHPF។
គោលបំណងនៃការរៀបចំមហាបាតុកម្មភ្លើងទៀននេះ គឺដើម្បីទាមទារឲ្យមានការស្តារលទ្ធិប្រជាធិបតេយ្យនៅកម្ពុជាឡើងវិញ។
លោក សុខ ឥសាន អ្នកនាំពាក្យគណបក្សប្រជាជនកម្ពុជា ចំអកឲ្យថា មហាបាតុកម្មនេះ ស្ថិតនៅក្រោមការរៀបចំរបស់យុវជនប្រឆាំងតែម្នាក់-ពីរនាក់ និង មានការចូលរួមពីមនុស្សមួយចំនួនតូចប៉ុណ្ណោះ ប៉ុន្តែ ពួកគេ ខំបំប៉ោងថា មានអ្នកចូលរួម មកពីគ្រប់ទិសទីនៅលើពិភពលោក។ លោក បានសរសេរក្នុងបណ្តាញទំនាក់ទំនងតេឡេក្រាម បែបនេះថា «បើតាមការឃោសនាបំប៉ោង អាចនឹងផ្អៀងប្រទេសកូរ៉េខាងត្បូងនេះជាមិនខាន។ ក៏ប៉ុន្តែ ការពិតមានមនុស្សមកពីប្រទេសនេះ១ឬ២នាក់ ពីប្រទេសនោះ ១ឬ២នាក់ ដែលសរុបទៅបានមួយដំបរស្វាប៉ុណ្ណោះ បានសេចក្តីថា មិនបានស្មើនឹងប្រជាពុទ្ធបរិស័ទទៅបុណ្យចូលឆ្នាំនៅវត្តមួយផង»។
អ្នកនាំពាក្យគណបក្សកាន់អំណាច បានចាត់ទុកមហាបាតុកម្មនេះ ថាគ្មានអ្វីក្រៅតែពីទៅជួបជុំគ្នាជេរប្រមាថនិងបរិហាកេរ្តិ៍សម្អុយជាតិសាសន៏ខ្មែរខ្លួនឯងនោះទេ។ លោក ព្រមានយ៉ាងដូច្នេះថា «ដោយសារមានចរិតប្រមាថជាតិសាសន៏ឯងយ៉ាងនេះហើយ គង់មានថ្ងៃណាមួយពួកទាំងនេះ នឹងឈប់បានទទួលទិដ្ឋាការឲ្យនៅធ្វើការនៅប្រទេសកូរ៉េ ពេលនោះនឹងឃើញទឹកភ្នែកជូតក្បាលជង្គង់ជាមិនខាន។ នៅពេលនោះ ទុកឲ្យពួកឧទ្ទាមខ្មែរក្បត់ជាតិរត់ចោលស្រុកមកជួយចុះ កុំស្រែកដង្ហោយរកជំនួយពីស្ថានទូតខ្មែរនៅប្រទេសកូរ៉េអី»។
កាលពីអំឡុងខែកក្កដា ឆ្នាំ២០១៨ គណបក្សប្រឆាំងប្រចាំនៅកូរ៉េខាងត្បូង បានធ្វើមហាបាតុកម្មភ្លើងទៀននេះម្តងរួមកហើយ ដើម្បីប្រឆាំងនឹងការបោះឆ្នោតនៅកម្ពុជា ដែលអវត្តមានគណបក្សប្រឆាំងរបស់ពួកគេ៕
Tag:
CNRP
បាតុកម្មភ្លើងទៀន
© រក្សាសិទ្ធិដោយ thmeythmey.com