ភ្នំពេញ៖ តន្ត្រីករ តារាចម្រៀង និងអ្នកជំនាញសិល្បៈឯករាជ្យវ័យក្មេង១០រូប នឹងធ្វើដំណើរទៅសហរដ្ឋអាមេរិក ដើម្បីសិក្សាស្វែងយល់ពីវិស័យតន្ត្រី និងការការពារកម្មសិទ្ធិបញ្ញាចាប់ពីថ្ងៃទី២៧មេសា ដល់ថ្ងៃទី៨ឧសភា ឆ្នាំ២០១៩។ ដំណើរទស្សនកិច្ចសិក្សារយៈពេល១០ថ្ងៃនេះ ធ្វើឡើងក្រោមកម្មវិធីទស្សនកិច្ចភាពជាអ្នកដឹកនាំអន្តរជាតិ (IVLP On-Demand) ដែលរៀបចំដោយស្ថានទូតអាមេរិកប្រចាំកម្ពុជា។
ក្នុងសន្នីសីទសារព័ត៌មាននៅថ្ងៃទី១៩មេសា នៅសាកលវិទ្យាល័យបញ្ញាសាស្ត្រ កញ្ញា Linnette Franco មន្ត្រីទទួលបន្ទុកកិច្ចការវប្បធម៌របស់ស្ថានទូតអាមេរិក បាននិយាយថា ការទៅសិក្សារបស់សិល្បករទាំង១០រូប នេះ គឺស្ថិតនៅក្រោមប្រធានបទ «ការកសាងឡើងវិញនូវឧស្សាហកម្មធុរកិច្ចតន្រី្តកម្ពុជា» ដែលបញ្ជូលនូវការបណ្តុះបណ្តាលលើផ្នែកការពារកម្មសិទ្ធបញ្ញា និងរក្សាសិទ្ធិបែបនៃការកំណត់តម្លៃនិងរបៀបដើម្បីលក់តន្ត្រី ការរកទីផ្សារសម្រាប់លក់តន្ត្រី និងបញ្ហាទាក់ទងនឹងស្លាកយីហោ។ លើសពីនេះ ដំណើរទស្សនកិច្ចនេះ ក៏បានផ្តល់ឱកាសដល់សិល្បករទាំងនេះឱ្យយល់កាន់តែច្រើនពីវិធីកសាង និងការរៀបចំទម្រង់នៃឧស្សាហកម្មតន្ត្រី។
កញ្ញា Linnette Franco មានជំនឿថា៖«យើងជឿជាក់ថាសិល្បករទាំង១០រូបនេះ នឹងវិលត្រឡប់មកកម្ពុជាវិញ ជាមួយនឹងការត្រៀមខ្លួនយ៉ាងល្អ ក្នុងការដឹកនាំវិស័យសិល្បៈរបស់គេឱ្យឈានឡើងទៅដល់កម្រិយមួយទៀត ហើយផ្សព្វផ្សាយព័ត៌មានពីសារសំខាន់នៃការការពារកម្មសិទ្ធិបញ្ញា។ ដូច្នេះគម្រោងនេះក៏នឹងជួយ ដល់ការខិតខំរបស់ក្រុមហ៊ុនទាំងឡាយរបស់អាមេរិក នៅក្នុងការការពារកម្មសិទ្ធិបញ្ញានៅកម្ពុជាដោយបង្កើតឱ្យមានកិច្ចពិភាក្សាយ៉ាងទូលំទូលាយមួយស្តីពីការការពារកម្មសិទ្ធិបញ្ញានៅកម្ពុជា»។
លោក អ៊ូ សុជាតិ មន្ត្រីឯកទេសផ្នែកកិច្ចការសាធារណៈរបស់ស្ថានទូតអាមេរិក និងជាអ្នករៀបចំកម្មវិធី IVLP បាននិយាយថា ដំណើរសិក្សានិងទស្សនកិច្ចរបស់សិល្បករខ្មែរឯករាជ្យទាំង១០រូបនេះ គឺជាលើកដំបូងហើយដែលស្ថានទូតអាមេរិកផ្តល់ឱកាសដល់ពួកគាត់។ ការចំណាយទាំងឡាយក្នុងដំណើរសិក្សានេះ ស្ថានទូតអាមេរិកជាអ្នកចំណាយទាំងស្រុង លើកលែងតែសំបុត្រយន្តហោះធ្វើដំណើរទៅមកពីកម្ពុជាទៅអាមេរិក។
តន្ត្រីករ និងតារាចម្រៀងទាំង១០រូបដែលទៅចូលរួមក្នុងកម្មវិធី IVLP On-Demand នោះរួមមាន កញ្ញា Adda Angel, កញ្ញា ចិត្ត កញ្ចនា, កញ្ញា រិទ្ធី លំអរពេជ្រ, លោក ម៉ម ពេជ្ជរិទ្ធ, លោក ជុង សៀវភីន,លោក អ៊ួង សូរិយា, លោក សុខា បញ្ញា, លោក វណ្ណ ចេស្តា, លោក ម៉ា ច័ន្ទបញ្ញា និងលោក រៀម សុខ ភីរម្យ។
សិល្បករទាំង១០រូប នឹងផ្តើមដំណើរទស្សនកិច្ចនៅរដ្ឋធានីវ៉ាស៊ីនតោន ដោយត្រូវជួបជាមួយមន្ត្រីក្រសួងការបរទេសអាមេរិក និងក្រុមការងារគម្រោង FHI 360 ដើម្បីស្វែងយល់ពីការគាំទ្ររបស់រដ្ឋាភិបាលសហព័ន្ធ និងតួនាទីរបស់អង្គការក្រៅរដ្ឋាភិបាលក្នុងការការពារកម្មសិទ្ធិបញ្ញា។
បន្ទាប់មក ពួកគាត់ត្រូវធ្វើដំណើរទៅកាន់ក្រុង Austin រដ្ឋតិចសាស់ ដើម្បីរៀនសូត្រពីការប្រឈម និងឱកាសក្នុងការពង្រឹងឧស្សាហកម្មតន្ត្រីរបស់សហគមន៍តន្ត្រីល្បីល្បាញ ដូចជា Mosaic Sound Collective (MSC), House of Songs, Orb Recording Studios, South by Southwest (SXSW) និងមជ្ឈមណ្ឌលឧស្សហកម្មតន្ត្រីនៅក្រុង Austin (City of Austin, Music and Entertainment Division)។
រីឯនៅក្រុង Los Angeles រដ្ឋកាលីហ្វនីញ៉ា សិល្បករខ្មែរទាំង១០រូប នឹងមានឱកាសស្វែងយល់បន្ថែមពីជំនួញឧស្សហកម្មតន្ត្រី និងការគ្រប់គ្រងស្ទូតឌីយ៉ោ របស់សាលាជំនាញ សហគ្រាស និងសហគមន៍តន្ត្រីធំៗ ដូចជា សាលាតន្ត្រី Herb Alpert នៃសាកលវិទ្យាកាលីហ្វនីញ៉ា (UCLA) ក្រុមតន្ត្រី Ozomatli ក្រុមហ៊ុនតន្ត្រីដ៏ធំលើលោក Universal Music Group (UMG) សាលាតន្ត្រី Los Angeles Recording School និងមជ្ឈមណ្ឌល Guitar Center ជាដើម។
ចាប់តាំងពីឆ្នាំ១៩៩៣មក កម្មវិធីIVLP របស់ស្ថានទូតអាមេរិកប្រចាំកម្ពុជា បានបញ្ជូនមន្ត្រីធំៗក្នុងជួររដ្ឋាភិបាល អ្នកនយោបាយ អ្នកធ្វើការតស៊ូមតិមកពីអង្គការសង្គមស៊ីវិល ស្ត្រីក្នុងវិស័យសហគ្រិន និងអ្នកសារព័ត៌មាន សរុប៣២៥នាក់រួចមកហើយ៕