ជាតិ
បទសម្ភាសន៍
អន្តរជាតិ
អរិយធម៌ដ៏រុងរឿងរបស់ខ្មែរ ជំរុញឲ្យកញ្ញាជនជាតិចិន ឆេន វិនជា រៀនភាសាខ្មែរ
× ណាននីង-ចិន៖ ភាសាខ្មែរ និងភាសាចិន មានលក្ខណៈខុសគ្នាឆ្ងាយ ទាំងអក្សរ និងការប្រើប្រាស់សំឡេង ប៉ុន្តែតាមរយៈវប្បធម៍ប្រពៃណីរបស់ខ្មែរ បានធ្វើឲ្យកញ្ញា ឆេន វិនជា ដែលជាជនជាតិចិន ងាកមកសិក្សាអក្សរសាស្ត្រ និងវប្បធម៌ខ្មែរ។ បច្ចុប្បន្នកញ្ញា ឆេន វិនជា ដែលមានឈ្មោះជាភាសាខ្មែរថា ចរិយា កំពុងសិក្សាថ្នាក់បរិញ្ញាបត្រជាន់ខ្ពស់ផ្នែកវប្បធម៌ និងអក្សរសាស្ត្រខ្មែរនៅសាកលវិទ្យាល័យជនជាតិក្វាងស៊ី ប្រទេសចិន។ ក្នុងកិច្ចសម្ភាសជាមួយអ្នកសារព័ត៌មាន ThmeyThmey នៅប្រទេសចិន កញ្ញា ឆេន វិនជា បានលើកឡើយថា៖ «ខ្ញុំបានស្គាល់ប្រទេសកម្ពុជា គឺកម្ពុជាមានអង្គរវត្តដែលល្បីល្បាញលើពិភពលោក។ ខ្ញុំចាប់អារម្មណ៍ ហើយខ្ញុំចង់យល់ដឹងពីវប្បធម៌ខ្មែរ និងស្វែងយល់ពីប្រពៃណីអរិយធម៌កម្ពុជា»។
កញ្ញា ឆេន វិនជា បានសិក្សាបរិញ្ញាបត្រអក្សរសាស្ត្រខ្មែរ នៅប្រទេសចិនរយៈពេល៣ឆ្នាំ និងសិក្សានៅសាកលវិទ្យាល័យភូមិន្ទភ្នំពេញ រយៈពេល១ឆ្នាំ កាលពីឆ្នាំ២០១៥។ ស្ត្រីវ័យ២៤ឆ្នាំរូបនេះ អះអាងថា តាមរយៈការសិក្សាភាសាខ្មែរនេះ អាចក្លាយជាស្ពានផ្សាភ្ជាប់ទំនាក់ទំនងរវាងកម្ពុជា និងចិនផងដែរ។
សូមអញ្ជើញស្ដាប់កិច្ចសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មាន ThmeyThmey ជាមួយកញ្ញា ឆេន វិនជា និស្សិតបរិញ្ញាបត្រជាន់ខ្ពស់ផ្នែកវប្បធម៌ និងអក្សរសាស្ត្រខ្មែរនៅសាកលវិទ្យាល័យជនជាតិក្វាងស៊ី ប្រទេសចិនដូចតទៅ៖
រយៈពេល១ឆ្នាំកន្លះ ទើបកញ្ញា វិនជា អាចនិយាយភាសាខ្មែរបាន។ ការបញ្ចេញសំឡេង និងការប្រើប្រាស់ភាសាក្នុងការសរសេរ មានផលលំបាកសម្រាប់កញ្ញា វិនជា។ បច្ចុប្បន្ន កញ្ញា វិនជា ជាអ្នកបកប្រែភាសាខ្មែរនៅក្នុងប្រទេសចិន ដោយកញ្ញាប្រឡូកក្នុងអាជីពនេះ រយៈពេល២ឆ្នាំមកហើយ។ សម្រាប់ក្រុមគ្រួសារកញ្ញា វិនជាវិញ ពួកគាត់យល់ថាការសិក្សាពីភាសាខ្មែរ គឺល្អ៕
Tag:
ចិន
ភាសាខ្មែរ
ណាននីង
© រក្សាសិទ្ធិដោយ thmeythmey.com