កីឡាជាតិ
ជាតិ
វិសាខាឈរលេខ១បណ្តោះអាសន្ន ខណៈអង្គរថាយហ្គឺរ និងអាស៊ីអឺរ៉ុប បាន៣ពិន្ទុបន្ថែម កីឡាករវិសាខាអបអរគ្រាប់បាល់បញ្ចូលទីរបស់ ទិត្យ ឌីណា។ រូបថត CNCC
× វិសាខា ឡើងឈរលេខ១បណ្តោះអាសន្នក្នុងតារាងមិត្តហ្វូនខេមបូឌានលីគក្រោយទទួលជ័យជម្នះ ៤-០ លើភ្ញៀវអគ្គិសនីកម្ពុជា នាល្ងាចថ្ងៃសៅរ៍ ទី២០ ខែមេសា បន្ទាប់ពីអង្គរថាយហ្គឺរ និងអាស៊ីអឺរ៉ុបយូណាយធីត សុទ្ធតែបាន៣ពិន្ទុរៀងៗខ្លួនលើ យុវជនបាទី និងគិរីវង់សុខសែនជ័យ នៅសប្តាហ៍ប្រកួតទី៤ នេះ។
វិសាខា បាននាំមុខក្រុមភ្ញៀវ ១-០ នៅតង់ទីមួយ ដែលសម្រេចបានដោយ ខ្សែបម្រើកូរ៉េខាងជើង Pak Song-chol ហើយបន្ថែមបាន៣គ្រាប់នៅតង់ទីពីរ ពីសំណាក់ខ្សែបម្រើ ទិត្យ ឌីណា ខ្សែបម្រើក្រិក Evangelos Skraparas និងខ្សែបម្រើជប៉ុន Masaaki Ideguchi។
វិសាខា មានពិន្ទុសរុប១០ពិន្ទុ ដោយឈរលេខមួយបណ្តោះអាសន្ន ខណៈព្រះខ័នរាជស្វាយរៀង និងក្រសួងការពារជាតិ ដែលជាគូប្រជែងនៅសល់១ប្រកួតនៅក្នុងដៃ ហើយត្រូវប្រកួតនៅថ្ងៃអាទិត្យ។ អគ្គិសនីកម្ពុជា រក្សាវាសនាឡើងចុះ ដោយមានពិន្ទុសរុប៦ពិន្ទុ។
នៅទីលានសាលបាល់ទាត់ជាតិបាទី ក្រុមយុវជនបាទី នៅតែមិនទាន់មានពិន្ទុរាប់ឡើយ នាសប្តាហ៍ទី៤នេះ ដោយរងបរាជ័យរហូតដល់ ៦-០ ដោយសារក្រុមភ្ញៀវអង្គរថាយហ្គឺរ។ ខ្សែប្រយុទ្ធនីហ្សេរីយ៉ា Okereke Timothy ក្លាយជាកីឡាករដំបូងដែលរកបាន៤គ្រាប់ក្នុង១ប្រកួត ហើយ២គ្រាប់ទៀតរបស់អង្គរថាយហ្គឺរ សម្រេចបានដោយខ្សែបម្រើជប៉ុន Joichiro Sugiyama និង ពៅ ភារិទ្ធ។
អង្គរថាយហ្គឺរហក់ឡើងលេខ៣ជាបណ្តោះអាសន្ន ដោយមាន៨ពិន្ទុ ខណៈយុវជនបាទី បន្តនៅបាតតារាង ដោយគ្មានពិន្ទុ។
នៅកីឡដ្ឋាន AEU Sport Park ខ្សែប្រយុទ្ធកូតឌីវ័រ Coulibali Abdel Kader រកបានពីរគ្រាប់នាំមុខនៅនាទី ទី២ និង៣៥ សម្រាប់ក្រុមម្ចាស់ផ្ទះអាស៊ីអឺរ៉ុប យូណាយធីត មុនពេលដែលខ្សែប្រយុទ្ធជប៉ុន Yuto Sasaki វាយបកបាន១គ្រាប់សម្រាប់គិរីវង់សុខសែនជ័យនៅនាទី៤៥+២។
ក្រោយជ័យជម្នះ២លើកផ្ទួនៗ អាស៊ីអឺរ៉ុប ទទួលបាន៦ពិន្ទុពី៤ប្រកួត ខណៈគិរីវង់សុខសែនជ័យ ដែលបរាជ័យ៣ប្រកួតជាប់គ្នា ត្រាំត្រែងជាមួយ៣ពិន្ទុ៕
© រក្សាសិទ្ធិដោយ thmeythmey.com