ជាតិ
សង្គមជាតិ
កុលបុត្រ-កុលធីតាដែលចង់ស្វែងយល់ព្រះធម៌ អាចចុះឈ្មោះបួសរយៈពេលខ្លីនៅវត្តអង្គរតូចខាងត្បូង
× ភ្នំពេញ៖ ដើម្បីអបអរសាទរពិធីបុណ្យវិសាខបូជានាពេលខាងមុខ វត្តអង្គរតូចខាងត្បូងនៅតំបន់អង្គរ ខេត្តសៀមរាប នឹងរៀបចំពិធីបំបួសកុលបុត្រ-កុលធីតាខ្មែរប្រចាំឆ្នាំ ដោយមានចំនួន៣០០រូប។ ពិធីបំបួស នឹងប្រព្រឹត្តទៅនៅថ្ងៃទី១៤ ខែឧសភា ហើយពិធីចាកសិក្ខាបទ នឹងរៀបចំនៅថ្ងៃទី១៩ ខែឧសភា។
ព្រះគ្រូធម្មវិសុទ្ធិកោសល កែវ អាន ព្រះចៅអធិការវត្តអង្គរតូចខាងត្បូង និងជាប្រធានគណៈកម្មការបុណ្យវិសាខបូជា និងបំបួសកុលបុត្រ-កុលធីតា ចាត់ទុកថាព្រឹត្តិការណ៍នេះ អាចឲ្យពុទ្ធបរិស័ទទាំងអស់ ចូលរួមអភិវឌ្ឍវិស័យសាសនាឲ្យមានលំនឹង និងសុក្រឹតភាពតាមព្រះធម៌ រំលឹកឲ្យកូនខ្មែរដឹងពីប្រវត្តិនៃថ្ងៃបុណ្យ វិសាទបូជា និងចូលរួមអនុមោទនាចាប់យកចំណែកបុណ្យកុសលដោយក្តីជ្រះថា្ល។
ព្រះគ្រូធម្មវិសុទ្ធិកោសល កែវ អាន បានមានសង្ឃដីកាថា ព្រឹត្តិការណ៍សាសនាលក្ខណៈបែបទ្រង់ទ្រាយធំនេះ នឹងមានព្រះសង្ឃ៤០០អង្គ និងមានកម្មវិធីរាប់បាតនៅខាងលិចប្រាសាទអង្គរវត្ត។
សម្រាប់កុលបុត្រ-កុលធីតា ដែលមានអាយុ២១ឆ្នាំចុះក្រោម អាចចុះឈ្មោះបួស ឬដាក់ពាក្យសុំបព្វជ្វា ឲ្យបានមុនថ្ងៃទី១៣ ខែឧសភា ដោយមានការធានាពីឪពុកម្តាយ ឬអាណាព្យាបាល និងឯកសារត្រឹមត្រូវ។
សូមបញ្ជាក់ថា «បុណ្យវិសាខបូជា» ជាពិធីបុណ្យជាតិដ៏ធំមួយក្នុងព្រះពុទ្ធសាសនា។ ការប្រារព្ធពិធីបុណ្យវិសាខបូជា ដើម្បីរំលឹកដល់ព្រឹត្តិការណ៍ពិសេសចំនួន៣ធំ ដូចជា ការប្រសូត ការត្រាស់ដឹង និងការចូលព្រះនិពា្វន។ ព្រះពុទ្ធមានប្រនាមថា សិទ្ធត្ថ(អានថា សិត-ធ័ត)។ ព្រះអង្គ ទ្រង់ប្រសូត ពេញបូរមី ខែវិសាខ មុនគ្រិស្តសករាជចំនួន ៦២៣ឆ្នាំ ព្រះអង្គក៏ត្រាស់ដឹងជាព្រះពុទ្ធនៅថ្ងៃពុធ ពេញបូណ៍មី ខែវិសាខ នាវេលាទាបភ្លឺ។ ព្រះអង្គ ទ្រង់ចូលបិរិពាន្ត នៅថ្ងៃអង្គារ ពេញបូណ៍មី ខែវិសាខ នៅពេលដែលព្រះអង្គមានព្រះជន្ម ៨០វស្សា។ ដោយសារតែទ្រង់ប្រសូត ត្រាស់ដឹង និងចូលបរិពាន្ត នៅក្នុងថ្ងៃ១៥កើត ពេញបូណ៍មី ខែវិសាខដូចគ្នា គឺខុសតែឆ្នាំតែប៉ុណ្ណោះ។ ដូច្នេះ បុណ្យវិសាខបូជា គឺជារំលឹកដល់ថ្ងៃទាំង៣របស់ព្រះអង្គ៕
Tag:
សៀមរាប
បំបួស
សាសនា
វិសាខបូជា
© រក្សាសិទ្ធិដោយ thmeythmey.com