សម្តេចនាយករដ្ឋមន្ត្រី ហ៊ុន សែន ថ្លែងថា អ្នកស្រី អ៊ុងសាន ស៊ូជី មេដឹកនាំមីយ៉ាន់ម៉ា នឹងធ្វើដំណើរមកបំពេញទស្សនកិច្ចនៅកម្ពុជា នៅថ្ងៃទី២៩ ខែមេសា ឆ្នាំ២០១៩។ ការថ្លែងនេះ គឺធ្វើឡើងក្នុងពិធីចែកសញ្ញាបត្រដល់និស្សិតនៃសាកលវិទ្យាល័យជាតិគ្រប់គ្រង់ (NUM) នាព្រឹកថ្ងៃទី២៣ ខែមេសា។
សម្តេចនាយករដ្ឋមន្ត្រី ពុំបានបញ្ជាក់ពីបំណងរបស់អ្នកស្រី អ្នកស្រី អ៊ុងសាន ស៊ូជី ក្នុងការមកបំពេញទស្សនកិច្ចនៅកម្ពុជានោះទេ។ យ៉ាងណា សម្តេចនាយករដ្ឋមន្ត្រី លើកឡើងថា សកម្មភាពការទូតរវាងកម្ពុជានិងបណ្តាប្រទេសនានា មិនមែនស្ថិតតែលើគ្រប់ខណ្ឌនយោបាយប៉ុណ្ណោះទេ ប៉ុន្តែ វា ក៏ទាក់ទងនឹងបញ្ហាសង្គម សេដ្ឋកិច្ច និងសហប្រតិបត្តិការ សម្រាប់ការអភិវឌ្ឍផងដែរ។
នៅថ្ងៃទី២៩ ខែមេសា គឺជាថ្ងៃដែលប្រមុខរដ្ឋាភិបាលកម្ពុជា ត្រូវបញ្ចប់ទស្សនកិច្ចនៅប្រទេសចិន ហើយនឹងត្រូវវិលត្រឡប់មកកម្ពុជាវិញ នៅថ្ងៃទីនោះតែម្តង ដើម្បីជួបអ្នកស្រី អ៊ុងសាន ស៊ូជី។ នៅថ្ងៃទី២៥ ខែមេសា ប្រមុខរដ្ឋាភិបាលកម្ពុជា នឹងដឹកនាំគណៈប្រតិភូទៅចិន ដើម្បីចូលរួមក្នុងវេទិកា «ខ្សែក្រវាត់និងផ្លូវលើកទី២ សម្រាប់កិច្ចសហប្រតិបត្តិការអន្តរជាតិ»។
លោក ផៃ ស៊ីផាន អ្នកនាំពាក្យរដ្ឋាភិបាល មិនទាន់ដឹងច្បាស់ពីរបៀបវារៈនៃដំណើរទស្សនកិច្ចរបស់អ្នកស្រី អ៊ុងសាន ស៊ូជី មកកម្ពុជានោះទេ ដូច្នេះ លោក មិនធ្វើអត្ថាធិប្បាយអ្វីឡើយ។ ប៉ុន្តែ លោក យល់ថា ដំណើរទស្សនកិច្ចរបស់អ្នកស្រី ទំនងជាដើម្បីពង្រឹងកិច្ចសហប្រតិបត្តិការរវាងមីយ៉ាន់ម៉ានិងកម្ពុជា។
នេះជាលើកដំបូង ដែលអ្នកស្រី អ៊ុងសាន ស៊ូជី មានគម្រោងមកទស្សនកិច្ចនៅកម្ពុជា ចាប់តាំងពីអ្នកស្រីជាប់ឆ្នោតនិងក្លាយជាទីប្រឹក្សារដ្ឋរបស់មីយ៉ាន់ម៉ា កាលអំឡុងខែមេសា ឆ្នាំ២០១៦មក៕