ទីស្តីការគណៈរដ្ឋមន្ត្រីកាលពីពេលថ្មីៗ បានចេញលិខិតគាំទ្រក្រសួងអប់រំយុវជននិងកីឡាចំពោះការផ្តល់ប្រាក់រង្វាន់លើកទឹកចិត្តដល់ម្ចាស់ជ័យលាភីមេដាយមាសកីឡាកាយវប្បកម្មពិភពលោកដោយអះអាងថា ក្រសួងបានអនុវត្តត្រឹមតាមច្បាប់។ ការអះអាងបែបនេះ គឺបន្ទាប់ពីមានការចោទប្រកាន់ថា ក្រសួងបានកិបកេងប្រាក់រង្វាន់លើកទឹកចិត្តរបស់កីឡាករ សំបូរ សុភណ្ឌ។
រាជរដ្ឋាភិបាលកម្ពុជាបានអះអាងថា ក្រសួងអប់រំយុវជននិងកីឡាមិនបានកិបកេងថវិកា១០០លានរៀលរបស់ម្ចាស់មេដាយមាសពិភពលោកកីឡាកាយវប្បកម្ម សំបូរ សុភណ្ឌ ដូចការចោទប្រកាន់នោះទេ។ នេះបើយោងតាមលិខិតរបស់ទីស្តីការគណៈរដ្ឋមន្ត្រី ដែលចេញផ្សាយកាលពីថ្ងៃទី៩ ខែមេសា ឆ្នាំ២០១៩។
លិខិតគាំទ្រដែលចុះហត្ថលេខាដោយលោក អ៊ីន វីរជាតិ រដ្ឋលេខាធិការទីស្តីការគណៈរដ្ឋមន្ត្រីបានរៀបរាប់ដូច្នេះថា៖«ករណីរបាយការណ៍ស្តីពីការផ្តល់ប្រាក់រង្វាន់ដល់ម្ចាស់ជ័យលាភីនៃការចូលរួមប្រកួតលក្ខណៈអន្តរជាតិប្រចាំឆ្នាំ និងការផ្តល់ប្រាករង្វាន់ដល់ម្ចាស់ជ័យលាភីកីឡាកាយវប្បកម្មជើងឯកពិភពលោក រាជរដ្ឋាភិបាលយល់ឃើញថា ការអនុវត្តតាមគោលការណ៍ក្រសួងអប់រំយុវជននិងកីឡា គ្រប់គ្រាន់ហើយ»។
ការអះអាងរបស់រាជរដ្ឋាភិបាល គឺធ្វើឡើងបន្ទាប់ពីលោក ហង់ ជួន ណារ៉ុន រដ្ឋមន្ត្រីក្រសួងអប់រំយុវជននិងកីឡាផ្ញើលិខិតទៅកាន់សម្តេចនាយករដ្ឋមន្ត្រី ហ៊ុន សែន ដើម្បីពិនិត្យពីរបាយការណ៍ផ្តល់ប្រាក់រង្វាន់សម្រាប់ការចូលរួមប្រកួតអន្តរជាតិ និងប្រាក់រង្វាន់លើកចិត្តម្ចាស់មេដាយមាសកីឡាកាយវប្បកម្ម។ ការផ្ញើលិខិតទៅកាន់ថ្នាក់ដឹកនាំនេះ គឺបន្ទាប់ពីមានការចោទប្រកាន់ថា ក្រសួងបានកិបកេងថវិកាលើកទឹកចិត្ត១០០លានរៀលរបស់កីឡាករ សំបូរ សុភ័ណ្ឌ។
បញ្ហាចម្រូងចម្រាសមួយបានកើតឡើងបន្ទាប់ពីកីឡាករ សំបូរ សុភណ្ឌ បានចោទប្រកាន់ថា ក្រសួងអប់រំ យុវជន និងកីឡា បានកិបកេងថវិកាលើកទឹកចិត្តរបស់គេចំនួន១០០លានរៀល។ ការចោទប្រកាន់នេះ ក្រោយរូបគេទទួលបានតែ២០លានរៀលពីការឈ្នះមេដាយមាសពិភពលោកនៅប្រទេសថៃកាលពីចុងឆ្នាំ២០១៨ ខណៈរូបគេរំពឹងទទួលបាន១២០លានរៀលដូចប្រភេទកីឡាដទៃ ដែលក្រសួងធ្លាប់ផ្តល់ឲ្យ។
ក្រោយការចោទប្រកាន់ លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡាបានរៀបចំសន្និសីទសារព័ត៌មានច្រានចោលចំពោះការចោទប្រកាន់នេះ ដោយអះអាងថា ក្រសួងមិនបានកិបកេងថវិកាដូចការលើកឡើងរបស់កីឡាករ សំបូរ សុភណ្ឌ នោះទេ។ ហើយលោកបានចាត់ទុកការចោទប្រកាន់នេះថា គឺជាការភាន់ច្រឡំ។
បើតាមប្រកាសអន្តរក្រសួងស្តីពី«គោលការណ៍សម្រាប់ប្រមូលផ្តុំហ្វឹកហាត់ក្រុមជម្រើសជាតិ និងការប្រកួតលក្ខណៈអន្តរជាតិផ្លូវការប្រចាំឆ្នាំ» ដែលចេញផ្សាយកាលពីថ្ងៃទី៧ កក្កដា ឆ្នាំ២០១៥ ម្ចាស់មេដាយមាសប្រចាំការប្រកួតជើងឯកពិភពលោក(World Championship)ទទួលបានថវិកាលើកទឹកចិត្ត២០លានរៀល, ប្រាក់១៦លានរៀល និងសំរឹទ្ធ១៣លានរៀល។
ប៉ុន្តែមេដាយនេះអាចមានតម្លៃស្មើមេដាយកីឡាអូឡាំពិកប្រសិនបើក្រសួងអប់រំយុវជននិងកីឡាដាក់សំណើរពិសេសទៅកាន់រាជរដ្ឋាភិបាល ដើម្បីចេញអនុក្រឹត្យស្តីពី«ការផ្តល់ប្រាក់រង្វាន់ចំពោះជ័យលាភី និងប្រាក់ឧបត្ថម្ភចំពោះគ្រូបង្វឹកក្នុងការប្រកួតកីឡាជាលក្ខណៈអន្តរជាតិ»។ ក្រោយទទួលបានអនុក្រឹត្យនេះ នោះមេដាយមាសនឹងមានតម្លៃ១២០លានរៀល ប្រាក់៨០លានរៀល និងសំរឹទ្ធ៦៤លានរៀល។
ករណីកីឡាករ សំបូរ សុភណ្ឌ ការមិនទទួលបានថវិកាលើកទឹកចិត្ត១២០លានរៀលពីរាជរដ្ឋាភិបាលដោយសារក្រសួងអប់រំ យុវជននិងកីឡារួមនិងស្ថាប័នពាក់ព័ន្ធមិនបានដាក់សំណើរពិសេសទៅកាន់រាជរដ្ឋាភិបាល ទើបរូបគេទទួលបានតែ២០លានរៀល៕