កីឡាអន្តរជាតិ
អន្តរជាតិ
Ligue 1 បារាំង មានអាជ្ញាកណ្តាលស្ត្រីដំបូង ដូច Bundesliga អាល្លឺម៉ង់ដែរ
× សហព័ន្ធកីឡាបាល់ទាត់បារាំង (FFF) ប្រកាសថានាង Stephanie Frappart នឹងក្លាយជាអាជ្ញាកណ្តាលកាត់សេចក្តីស្ត្រីដំបូងគេ ក្នុងការប្រកួតក្របខណ្ឌ Ligue 1ជាផ្លួវការ។
អាជ្ញាកណ្តាលសញ្ជាតិបារាំង Frappart នឹងបង្កើតប្រវត្តិសាស្ត្រនៅពេលដែលនាងចូលខ្លួនទៅកាត់សេចក្តីក្នុងការប្រកួតលីគកំពូលបារាំងរវាង Amiens និង Strasbourg នៅថ្ងៃទី២៨ ខែមេសា ចុងសប្តាហ៍នេះ។
នាង Frappart វ័យ៣៥ឆ្នាំដែលត្រូវបានជ្រើសរើសឲ្យចូលរួមធ្វើជាអាជ្ញាកណ្តាលក្នុងព្រឹត្តិការណ៍កីឡាបាល់ទាត់ពិភលោកស្ត្រី Women's World Cup ឆ្នាំ២០១៩នេះ ហើយក៏ជាអាជ្ញាកណ្តាលស្ត្រីដំបូងគេផងដែរក្នុងក្របខណ្ឌ Ligue 2 បារាំង កាលពីឆ្នាំ២០១៤។
អ្នកស្រី Bibiana Steinhaus ដែលជាអាជ្ញាកណ្តាលនៅលីគកំពូលអាល្លឺម៉ង់
«Stephanie Frappart ដែល FIFA ជ្រើសរើស សម្រាប់ការប្រកួតបាល់ទាត់ស្ត្រី ដែលបារាំងធ្វើជាម្ចាស់ផ្ទះនោះ ត្រូវបានប្រធានអាជ្ញាកណ្តាលនៃ FFF តែងតាំងជាអាជ្ញាកណ្តាលនៅ Ligue 1 ផ្លូវការ ដោយត្រូវដឹកនាំការប្រកួតដំបូងក្នុងសប្តាហ៍ទី៣៤ រវាង Amiens SC និង RC Strasbourg»។ នេះបើតាមសេចក្តីប្រកាសរបស់ FFF។
ក្រៅពី Frappart នាង Bibiana Steinhaus សញ្ជាតិអាល្លឺម៉ង់ វ័យ៤០ឆ្នាំ ក៏បានក្លាយជាអាជ្ញាកណ្តាលស្ត្រីដំបូងគេក្នុងការប្រកួតក្របខណ្ឌកំពូលអាល្លឺម៉ង់ Bundesliga រវាង Hertha Berlin ទល់នឹង Werder Bremen ក្នុងឆ្នាំ ២០១៧ផងដែរ៕
Tag:
បាល់ទាត់
អាជ្ញាកណ្តាលស្ត្រី
Stephanie Frappart
© រក្សាសិទ្ធិដោយ thmeythmey.com