ជាតិ
សង្គមជាតិ
ការដាច់ភ្លើង ធ្វើឲ្យប្រព័ន្ធទូរសព្ទនិងអុីនធឺណិត រអាក់រអួល?
× ភ្នំពេញ៖ អំឡុងពេលដាច់ចរន្តអគ្គិសនី មានប្រជាពលរដ្ឋជាច្រើនពិបាកក្នុងការប្រើប្រាស់ប្រព័ន្ធសេវាទូរសព្ទនិងអុីនធឺណិត។
លោក អ៊ឹម វត្ថា សមាជិកនិយ័តករទូរគមនាគមន៍កម្ពុជាបានប្រាប់សារព័ត៌មានថ្មីៗ តាមទូរសព្ទថា នៅពេលចរន្តអគ្គិសនីត្រូវបានកាត់ផ្តាច់ភ្លាមៗនោះ វាមិនមានការរំខានដល់ដំណើរការប្រព័ន្ធសេវាទូរសព្ទទេ។ ប៉ុន្តែ លោកបញ្ជាក់ថា បើសិនជា ការដាច់ចរន្តមានរយៈពេលលើសពី៤ម៉ោងឡើងទៅ វានឹងមានការដាច់ឬរអាក់រអួលសេវាទូរសព្ទ ដោយសារអេឡិចត្រូនិកនៃចរន្តម៉ាស៊ីនផ្ទុកភ្លើង អាចផ្ទុកបានត្រឹមតែជាង៤ម៉ោងប៉ុណ្ណោះ។
លោក អ៊ឹម វត្ថា បានពន្យល់ថា៖ «គ្រប់ប្រព័ន្ធសេវាទូរសព្ទនិងអេឡិចត្រូនិកត្រូវការចរន្តអគ្គិសនី។ ការដាច់ចរន្តអគ្គិសនីយូរនឹងធ្វើឲ្យមានផលវិបាក ប៉ុន្តែក្នុងប្រព័ន្ធទូរគមនាគមន៍មានការតប្រព័ន្ធចរន្តអគ្គិសនីពីរប្រភព គឺការតចរន្តពីខាងអគ្គិសនីកម្ពុជា (EDC) និងការប្រើដោយចរនអគ្គិសនីដើរដោយព្រះអាទិត្យ។ ប្រភពចរនអគ្គិសនីដើរដោយព្រះអាទិត្យ ខណៈពេលដាច់ចរនអគ្គិសនីពី EDC គឺមាន អាគុយបម្រុងឬម៉ាស៊ីនភ្លើងបម្រុង (UPS) មកប្រើប្រាស់ជំនួសវិញ។ ប៉ុន្តែបើដាច់ភ្លើងយូរប្រព័ន្ធនេះ មិនអាចទ្រទ្រង់បានទេ បានក្នុងរយៈពេលជាង៤ម៉ោងតែប៉ុណ្ណោះ។»
ជុំវិញបញ្ហានេះ ផ្នែកប្រព័ន្ធផ្សព្វផ្សាយនៃក្រុមហ៊ុនទូរស័ព្ទ Cellcard បកស្រាយប្រាប់សារព័ត៌មានថ្មីៗ តាមសារអេឡិចត្រូនិកថា ដោយសារបញ្ហាកង្វះខាតអគ្គិសនីនៅទូទាំងកម្ពុជាបានធ្វើឲ្យប៉ះពាល់គ្រប់បណ្ដាក្រុមហ៊ុនទូរស័ព្ទ ហើយបណ្ដាលឲ្យមានភាពរអាក់រអួលក្នុងការហៅទូរស័ព្ទនិងការប្រើប្រាស់អុីនធឺណិត។ ក្រុមហ៊ុន Cellcard អះអាងថា ក្រុមការងារបច្ចេកទេស បានដាក់ពង្រាយម៉ាស៊ីនភ្លើងតាមបណ្ដាសាខាក្រុមហ៊ុនរបស់ខ្លួន»។
រីឯអ្នកផ្ដល់ព័ត៌មានរបស់ក្រុមហ៊ុន Metfone (Call Center) បានឲ្យដឹងថា នៅពេលដាច់ចរន្តអគ្គិសនី ក្រុមហ៊ុនបានប្រើប្រាស់ម៉ាស៊ីនភ្លើង។ តែដោយសារកម្លាំងម៉ាស៊ីនខ្សោយទើបធ្វើឲ្យមានការរអាក់រអួលលើប្រព័ន្ធសេវានិងអុីនធឺណិត៕
Tag:
ដាច់ភ្លើង
ប្រព័ន្ធទូរស័ព្ទ
អុីនធឺណិត
© រក្សាសិទ្ធិដោយ thmeythmey.com