ក្រសួងអប់រំ ណែនាំឲ្យបាញ់ទឹកស្រោចលើអាគារ និងទីធ្លាសាលារៀន ដើម្បីទប់ស្កាត់កម្តៅ កុំឲ្យប៉ះពាល់សុខភាពសិស្ស

ជាតិ

សង្គមជាតិ

ក្រសួងអប់រំ ណែនាំឲ្យបាញ់ទឹកស្រោចលើអាគារ និងទីធ្លាសាលារៀន ដើម្បីទប់ស្កាត់កម្តៅ កុំឲ្យប៉ះពាល់សុខភាពសិស្ស

25, Apr 2019 , 10:36 am

រូបភាព

ដោយ:

ភ្នំពេញ៖ ក្រសួងអប់រំ យុវជន និងកីឡា បានប្រាប់ឲ្យគ្រឹះស្ថានសិក្សានានា បាញ់ទឹកដាក់ដំបូលអាគារសាលាទាបៗ ឬបរិវេណសាលារៀន ដើម្បីកាត់បន្ថយកម្តៅ កុំឲ្យប៉ះពាល់សុខភាពដល់សិស្ស។

ក្រសួងអប់រំ បានប្រាប់ឲ្យគណៈគ្រប់គ្រងសាលាទាំងអស់ ត្រូវចុះពិនិត្យមើលជាប្រចាំពីស្ថានភាពថ្នាក់រៀន បើកទ្វារបង្អួច ដើម្បីឲ្យមានខ្យល់ចេញចូលគ្រប់គ្រាន់។ នៅពេលអាកាសធាតុក្តៅខ្លាំង គួរតែបាញ់ទឹកលើដំបូលអាគារទាបៗ ឬបេតុងមុខអាគារ ជាពិសេសអនុញ្ញាតឲ្យសិស្សចេញមកលម្ហែកាយ នៅក្រោមដើមឈើដែលមានខ្យល់គ្រប់គ្រាន់។

«ប្រសិនបើសិស្សានុសិស្សជួបស្ថានភាពធ្ងន់ធ្ងរដែលបង្កឡើងដោយការកើនឡើងកម្តៅ គណៈគ្រប់គ្រងសាលា ត្រូវផ្តល់ព័ត៌មានទៅមាតាបិតា ដើម្បីទទួលកូនយកទៅផ្ទះវិញ ប៉ុន្តែត្រូវស្នើសុំការអនុញ្ញាតពីការិយាល័យអប់រំខណ្ឌជាមុនសិន»។ នេះជាការបញ្ជាក់របស់ក្រសួងអប់រំ។

នៅក្នុងសេចក្តីណែនាំបន្ថែមរបស់រដ្ឋមន្ត្រីក្រសួងអប់រំ បានក្រើនរំលឹកឲ្យគណៈគ្រប់គ្រងសាលាដាំដើមឈើ និងថែរក្សាដើមឈើដែលមានស្រាប់ ដើម្បីជាម្លប់ដោយសិស្សានុសិស្សសម្រាកនៅពេលចេញលេង។

ទាក់ទងនឹងបញ្ហាកម្ដៅនេះ សាលារៀនមួយនៅខេត្តស្ទឹងត្រែង បានប្រើប្រាស់កន្សែងសើម ស្អំក្បាល ដើម្បីផ្តល់ភាពត្រជាក់ដល់សិស្ស ខណៈអាកាសធាតុកំពុងឡើងកម្តៅខ្ពស់ ដើម្បីទប់ស្កាត់ផលប៉ះពាល់ដល់សុខភាពកុមារទៀតផង។ នេះបើតាមក្រសួងអប់រំ។

សូមបញ្ជាក់ថា ការកើនឡើងកម្តៅខ្លាំងបែបនេះ ដោយសារកម្ពុជាទទួលរងបាតុភូត អ៊ែល នីណូ ដែលនៅតែបន្តកើនឡើងដល់ខែឧសភាឯណោះ។ បាតុភូត អ៊ែល នីណូ នេះ ធ្វើឲ្យកម្ពុជាកើនឡើងដល់៤០អង្សា៕