កីឡាអន្តរជាតិ
អន្តរជាតិ
FIFA បញ្ចប់អាជីពកីឡាករបាល់ទាត់៧រូបមួយជីវិត ពីបទកំណត់លទ្ធផលទុកមុន
× សហព័ន្ធកីឡាបាល់ទាត់អន្តរជាតិ FIFA នៅថ្ងៃទី២៤ ខែ មេសា បានសម្រេចហាមឃាត់កីឡាករ និងអតីតកីឡាករចំនួន៧រូបមិនឲ្យមានសកម្មភាពក្នុងវិស័យកីឡាបាល់ទាត់មួយជីវិតក្រោយរកឃើញថាមានជាប់ពាក់ព័ន្ធការកំណត់លទ្ធផលទុកមុន។
បន្ទាប់ពីស៊ើបអង្កេតអស់រយៈពេលជាច្រើនឆ្នាំ FIFA អាចកំណត់បានថាកីឡាករទាំង៧រូប ដែលភាគច្រើនជាកីឡាករពីតំបន់អាហ្វ្រិក មានការទាក់ទងទៅនឹងការកំណត់លទ្ធផលការប្រកួតទុកមុនជាមួយលោក Wilson Raj Perumal។ Perumal ជាជនជាតិសិង្ហបុរី បានចូលរួមគប់គិតអំពើពុករលួយក្នុងការប្រកួតមិត្តភាពអន្តរជាតិ សម្រាប់ឲ្យការភ្នាល់បាល់។
FIFA បានបង្ហាញឈ្មោះកីឡាករទាំង៧រូបនោះមានដូចជា កីឡាករ Karlon Murray និង Keyeno Thomas (ទ្រីនីដាតនិងតូបាហ្គោ), Ibrahim Kargbo (សៀរ៉ាឡេអូន), Hellings Mwakasungula (ម៉ាឡាវី), Seidath Tchomogo (បេណាំង), Leonel Duarte (គុយបា) និងកីឡាករអាស៊ីម្នាក់ពី អាហ្វហ្គានីស្ថាន Mohammad Salim Israfeel Kohistani ។
ក្រៅពីអ្នកទាំង៧ខាងលើ មានកីឡាករសញ្ជាតិកេនយ៉ាម្នាក់ George Owino Audi ត្រូវហាមមិនឲ្យពាក់ព័ន្ធក្នុងកីឡារយៈពេល១០ឆ្នាំ រួមជាមួយភ្នាក់ងារកីឡាករលោក Kudzanai Shaba ត្រូវពិន័យអស់មួយជីវិត។
ស្ថាប័នគ្រប់គ្រងកីឡាបាល់ទាត់ពិភពលោកមួយនេះ ក៏កំពុងស៊ើបអង្កេតរកមុខអ្នកដែលពាក់ព័ន្ធនឹងអំពើពុករលួយ ក៏ដូចជាស៊ីសំណូកក្នុងវិស័យកីឡាបាល់ទាត់ជាបន្តបន្ទាប់ទៀតផងដែរ៕
Tag:
បាល់ទាត់
FIFA
កំណត់លទ្ធផលទុកមុន
© រក្សាសិទ្ធិដោយ thmeythmey.com