ថ្ងៃ២៤មេសា មានអគ្គិភ័យ៥លើកនៅភ្នំពេញ ដោយសារឆ្លងចរន្តអគ្គិសនី និងដុតទៀន

ជាតិ

សង្គមជាតិ

ថ្ងៃ២៤មេសា មានអគ្គិភ័យ៥លើកនៅភ្នំពេញ ដោយសារឆ្លងចរន្តអគ្គិសនី និងដុតទៀន

25, Apr 2019 , 5:42 pm

រូបភាព

ដោយ: ឡាយ សុភាវតី

អគ្គិភ័យកើតឡើង៥លើកក្នុងរាជធានីភ្នំពេញ នៅថ្ងៃទី២៤មេសា ឆ្នាំ២០១៩។ ករណីអគ្គិភ័យក្នុងថ្ងៃទី២៤មេសានេះ បង្កឡើងដោយការឆ្លងចរន្តអគ្គិសនី៤លើក និងការដុតទៀនបំភ្លើក្នុងបន្ទបប់១លើក។

ការចុះផ្សាយរបស់អគ្គស្នងការដ្ឋាននគរបាលជាតិ បានឲ្យដឹងថា ការឆ្លងចរន្តអគ្គិសនីឆេះផ្ទះនៅសង្កាត់បឹងរាំង ខណ្ឌដូនពេញ កើតឡើងនៅម៉ោងជាង៣រសៀល ដោយឆេះផ្ទះរបស់វេជ្ជបណ្ឌិតមន្ទីរពេទ្យកាល់ម៉ែត ហើយបង្កឲ្យមានអ្នករងរបួស២នាក់។

ចំណែកនៅសង្កាត់មិត្តភាព ខណ្ឌ៧មករា ឆ្លងចរន្តអគ្គិសនី ឆេះផ្ទះ នៅម៉ោងជាង៥ល្ងាច បង្កឲ្យខូចខាតសម្ភារៈប្រើប្រាស់មួយចំនួន តែពុំបណ្ដាលឲ្យមានអ្នករងរបួសឡើយ។

នៅច្រកចូលបូរីពិភពថ្មី ក្នុងសង្កាត់ភ្នំពេញថ្មី មានការឆេះប្រអប់ភ្លើងនៅបង្គោលភ្លើងមួយ តែមិនប៉ះពាល់អ្វីទេ។ ហើយនៅមុខក្លោងទ្វារវត្តញាណរង្សី ក្នុងសង្កាត់ទួលសងែ្ក១ ខណ្ឌឬស្សីកែវ ក៏មានការឆេះបង្គោភ្លើងដែរ នៅណ្ដាលអាធ្រាតប្រមាណម៉ោង១និង៣០នាទីរំលងអធ្រាត្រ ឈានចូលថ្ងៃទី២៥ខមេសា តែមិនបណ្ដាលឲ្យរាលដាលដល់ផ្ទះប្រជាពលរដ្ឋឡើយ។

ដោយឡែក ការដុតទៀនបំភ្លឺក្នុងបន្ទប់ បង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចុះពន្លត់ទាន់ពេល មិនបណ្ដាលឲ្យឆាបឆេះដល់ផ្ទះអ្នកជិតខាង និងពុំបង្កគ្រោះថ្នាក់ដល់នរណាម្នាក់ទេ។ ករណីនេះកើតឡើងនៅម៉ោងជិត១២ថ្ងៃត្រង់ ក្នុងសង្កាត់បឹងទំពន់ ខណ្ឌមានជ័យ។

កាលពីថ្ងៃទី២២មេសា អគ្គិភ័យបានឆាបឆេះហាងលក់ភីហ្សាឈ្មោះ Domino’s Pizza នៅសង្កាត់បឹងងកក់១ បង្កឲ្យមានការខូចខាតយ៉ាងធ្ងន់ធ្ងរ។

ជុំវិញករណីអគ្គិភ័យនេះ សម្តេច ស ខេង រដ្ឋមន្ត្រីក្រសួងមហាផ្ទៃ បានអំពាវនាវអាជ្ញាធរនិងមន្ត្រីគ្រប់លំដាប់ថ្នាក់ រួមទាំងប្រជាពលរដ្ឋផងដែរ ឲ្យចូលរួមការពារនិងបង្ការគ្រោះអគ្គិភ័យក្នុងរដូវប្រាំងនេះ។ រដ្ឋមន្ត្រីមហាផ្ទៃ ស្នើឲ្យប្រជាពលរដ្ឋនិងគ្រប់ភាគីពាក់ព័ន្ធ បង្កើនការប្រុងប្រយ័ត្នគ្រប់ពេលវេលា ចំពោះដើមចម ដែលអាចបង្កើតឲ្យមានអគ្គិភ័យ ដូចជា ភ្លើងចង្ក្រាន ភ្លើងចង្កៀង ភ្លើងធូប-ទៀន ការដុតសំរាម ព្រៃ ចម្ការ វាលស្រែ ការបោះកន្ទុយបារីផ្តេសផ្តាស ការតភ្ជាប់ឬការប្រើចរន្តអគ្គិសនីមិនត្រឹមត្រូវតាមបច្ចេកទេស ការទុកដាក់ប្រេងឥន្ទនៈ ឧស្ម័នចំហេះ និង វត្ថុងាយឆេះ ជាដើម៕