Premier League ចំណាយលើប្រាក់ឈ្នួលកីឡាករ ៣,៧៤ពាន់លានដុល្លារ នៅរដូវកាលមុន

កីឡាអន្តរជាតិ

អន្តរជាតិ

Premier League ចំណាយលើប្រាក់ឈ្នួលកីឡាករ ៣,៧៤ពាន់លានដុល្លារ នៅរដូវកាលមុន

28, Apr 2019 , 9:19 pm

រូបភាព

ដោយ: ទេព ពិទូរ្យ

ក្លិបនៅ Premier League បានចំណាយប្រាក់ឈ្នួលសម្រាប់កីឡាករសរុបចំនួន ២,៩ពាន់លានផោន (៣,៧៤ពាន់លានដុល្លារអាមេរិក) ក្នុងរដូវកាល ២០១៧-១៨ ដែលកើន១៥ភាគរយ បើធៀបនឹងរដូវកាលមុនមួយទៀត។ នេះបើយោងតាមទិន្នន័យដែលចេញផ្សាយដោយ Deloitte នៅថ្ងៃទី២៥ ខែមេសា ឆ្នាំ២០១៩។

របាយការណ៍របស់ក្រុមហ៊ុន Deloitte ដែលមានមូលដ្ឋាននៅអង់គ្លេស (ក្រុមហ៊ុនព្រឹក្សាពន្ធ និងហិរញ្ញវត្ថុ) ផ្សាយទៀតថាដោយសារតែមានក្រុមពីអង់គ្លេសដល់ទៅ៥ ឈានដល់វគ្គ១/៨ផ្តាច់ព្រ័ត្រពាន Champions League ទើបធ្វើឲ្យលីគកំពូលអង់គ្លេសរួមបញ្ចូលគ្នានៃក្លិបទាំង២០ ទទួលបានប្រាក់ចំណូលច្រើនជាកំណត់ត្រារហូតដល់ ៦,១៩ពាន់លានដុល្លារអាមេរិកនៅរដូវកាល ២០១៧-១៨ ។

បើទោះជាប្រាក់ចំណូលរបស់ក្លិបកើនឡើងក្តី ប៉ុន្តែដោយសារការផ្ទេរកីឡាករមានតម្លៃថ្លៃផងនោះ បានធ្វើឲ្យក្លិបនានាត្រូវបង្កើនប្រាក់ឈ្នួលដល់កីឡាកររបស់ពួកគេដូចគ្នា។

លោក Tim Bridge នាយកផ្នែកពាណិជ្ជកម្មកីឡាប្រចាំក្រុមហ៊ុន Deloitte និយាយថា៖«ការកើនឡើងនៃប្រាក់ឈ្នួលនេះបណ្តាលមកពីទីផ្សារដោះដូរកីឡាករមមាញឹកពេកនៅរដូវកាល ២០១៧-១៨។ ក្នុងនោះមានការផ្ទេរកីឡាករជាកំណត់ត្រាដល់ទៅ២លើកដែលគេប៉ាន់ប្រមាណថាមានចំនួនសរុប ២,៤៥ពាន់លានដុល្លារអាមេរិក»។

Deloitte វាយតម្លៃទៀតថា ការចំណាយប្រាក់ឈ្នួលដល់កីឡាករក្នុងលីគបាល់ទាត់អង់គ្លេសប្រមាណ ៣,៧៤ពាន់លានដុល្លារអាមេរិក ដែលកើន១៥%នេះ មិនប៉ះពាល់ដល់ម្ចាស់ក្លិបនោះទេ ដ្បិតប្រាក់ចំណូលសរុបក៏កើនឡើងខ្ពស់បំផុតដូចគ្នា។

ការវិភាគរបស់ Deloitte បង្ហាញថាក្លិបបាល់ទាត់នៃក្របខណ្ឌ Premier League អាចរកប្រាក់ចំណេញមុនពេលកាត់ពន្ធដល់ទៅ៣ដងក្នុងរយៈពេល ៥ ឆ្នាំចុងក្រោយនេះ បើទោះជាប្រាក់ចំណូលពីការទិញសិទ្ធផ្សាយមានការធ្លាក់ចុះក៏ដោយ៕