កីឡាជាតិ
ជាតិ
អង្គរថាយហ្គឺរធ្វើឲ្យវិសាខា បរាជ័យលើកដំបូង ខណៈណាហ្គាវើលឡើងលេខពីរបណ្តោះអាសន្ន អង្គរថាយហ្គឺរឈ្នះវិសាខា ២-១ នៅកីឡដ្ឋានស្វាយធំ ខេត្តសៀមរាប។ ប្រភពរូបថត៖ ហ្វេសប៊ុក Angkor Tiger
× ក្រុមដែលមានមូលដ្ឋាននៅសៀមរាបអង្គរថាយហ្គឺរ រក្សាកំណត់ត្រាមិនស្គាល់ក្នុងក្របខណ្ឌមិត្តហ្វូនខេមបូឌានលីគ រហូតដល់សប្តាហ៍ទី៥នេះ ជាមួយនឹងជ័យជម្នះ ២-១ លើក្រុមភ្ញៀវវិសាខានៅកីឡដ្ឋានស្វាយធំ។ នេះក៏ជាការរងបរាជ័យលើកដំបូងផងដែរសម្រាប់វិសាខា ដែលដឹកនាំដោយលោក ហុក សុជីវ័ន្ត។ នៅថ្ងៃអាទិត្យដដែលនេះ ម្ចាស់ការពារតំណែងជើងឯកណាហ្គាវើល បានយកឈ្នះម្ចាស់ផ្ទះគិរីវង់សុខសែនជ័យ ៣-១ ដើម្បីឡើងឈរលេខពីរបណ្តោះអាសន្ន ស្របពេលដែល អគ្គស្នងការដ្ឋាននគរបាលជាតិស្មើសូលទីឡូអង្គរ ២-២ នៅកីឡដ្ឋានអគ្គិសនីកម្ពុជា។
កីឡាករជប៉ុនទាំងសងខាងបានស៊ុតបាល់បញ្ចូលទីនាជំនួបនៅកីឡដ្ឋានស្វាយធំខេត្តសៀមរាប។ Yudai Ogawa រកបានគ្រាប់នាំមុខនៅ១០នាទីដំបូងសម្រាប់ម្ចាស់ផ្ទះអង្គរថាយហ្គឺរ ហើយខណៈការប្រកួតដំណើរការបានជាង១ម៉ោង Ideguchi Masaaki វាយបកតាមស្មើសម្រាប់វិសាខា។ ប៉ុន្តែ៣ពិន្ទុជារបស់អង្គរថាយហ្គឺរ ដោយ Yudai រកបាន១គ្រាប់ទៀតនៅនាទី៦៩។
អង្គរថាយហ្គឺរ រក្សាលទ្ធផលមិនទាន់ស្គាល់ចាញ់ ហើយឡើងទៅឈរលេខ៣ ដោយមាន១១ពិន្ទុ ខណៈវិសាខា ស្គាល់បរាជ័យលើកដំបូង ក្រោយឈ្នះ៣ ស្មើ១ ដោយមាន១០ពិន្ទុ។
រីឯជំនួបនៅមជ្ឈមណ្ឌលគរុកោសល្យភូមិភាគខេត្តតាកែវ ម្ចាស់ការពារតំណែងជើងឯកណាហ្គាវើល យកឈ្នះម្ចាស់ ៣-១ ។ ត្រឹម១៥នាទី ណាហ្គាវើលនាំមុខពីរគ្រាប់ ដោយខ្សែការពារគិរីវង់ ង៉ោល បូរី ធ្វើឲ្យបាល់ចូលសំណាញ់ទីខ្លួនឯង និងមួយទៀតគឺជាការស៊ុតរបស់ Esoh Omogba។ នៅនាទី៥២ សួង វីរៈ បង្កើនលទ្ធផលនាំមុខ ៣-០ ហើយ៦នាទីក្រោយមក សំ តារា វាយបកពីក្រោយមួយគ្រាប់សម្រាប់ម្ចាស់ផ្ទះ។
ខណៈដែលក្រសួងការពារជាតិ និងវិសាខា ស្គាល់បរាជ័យជាលើកដំបូង ណាហ្គាវើល តោងឱកាសឈរលេខពីរបណ្តោះអាសន្ន ដោយមាន១២ពិន្ទុ និង៣ពិន្ទុតាមពីក្រោយក្រុមកំពូលតារាង ព្រះខ័នរាជស្វាយរៀង ដែលមានកំណត់ត្រាឈ្នះរហូត។
សម្រាប់ជំនួបនៅកីឡដ្ឋានអគ្គិសនីកម្ពុជា អគ្គស្នងការដ្ឋាននគរបាលជាតិ និងសូលទីឡូអង្គរចែករំលែកគ្នា១ពិន្ទុ ជាមួយនឹងលទ្ធផលស្មើ ២-២។
© រក្សាសិទ្ធិដោយ thmeythmey.com