ពីនេះ ពីនោះ
ព័ត៍មានសុខភាព
អានអត្ថបទនេះរួច អ្នកនឹងលែងចង់ញ៉ាំមីកញ្ចប់ទៀតហើយ
× មីកញ្ចប់គឺជាអាហារសម្រន់ដែលថោក និងងាយស្រួលរៀបចំញ៉ាំ ហេតុដូច្នេះហើយទើបវាមានភាពពេញនិយមបំផុតសម្រាប់មនុស្សទូទៅនាពេលបច្ចុប្បន្ន និងមិនត្រូវការពេលវេលាយូរក្នុងការធ្វើម្ហូបញ៉ាំ។ ជាអកុសល សម្រាប់ផលិតផលអាហារដែលមានការវិចខ្ចប់បានយ៉ាងល្អ និងជាទីពេញចិត្តបំផុតសម្រាប់មនុស្សគ្រប់គ្នាមួយនេះ មានគ្រោះថ្នាក់ច្រើនចំពោះសុខភាព ហើយអ្នកដែលចូលចិត្តញ៉ាំវាជាទៀងទាត់នោះ ក៏គួរតែដឹងអំពីរឿងនេះដែរ។
ខ្ញុំសូមបង្ហាញហេតុផលមួយចំនួនដែលអ្នកគួរតែព្យាយាមចៀសវាងការញ៉ាំមីកញ្ចប់បើសិនជាមិនចង់កើតរឿងទាំងនេះទេ។
បង្កើនការប្រឈមនឹងជំងឺមហារីក
មីកញ្ចប់ផ្ទុកទៅដោយសារធាតុថែរក្សាផលិតផលឲ្យទុកបានយូរ ក្នុងនោះដែរមានសារធាតុប្រភេទនេះពីរយ៉ាងគឺ T-butylhydroquinone (TBHQ) និង Butylated Hydroxyanisole (BHA)។ ខណៈពេលដែលចំនួនសារធាតុទាំងពីរនេះតិចតួចត្រូវបានអ្នកវិទ្យាសាស្ត្រអះអាងថាមិនមានអ្វីគ្រោះថ្នាក់ដល់សុខភាព តែវាពិតជារឿងមួយខុសគ្នាដាច់វិញបើសិនជាអ្នកនិយមញ៉ាំអាហារមានសារធាតុទាំងនេះច្រើនៗ ព្រោះវាអាចបង្កើនការប្រឈមនឹងជំងឺមហារីកបាន។
ឈឺក្រពះ
មីកញ្ចប់ប្រហែលជាជម្រើសមុនគេរបស់អ្នកក្នុងការទទួលទានអាហារ ប៉ុន្តែវាពិតជាមិនអាចធ្វើឲ្យក្រពះរំលាយវាបានដូចអាហារដទៃឡើយ។ ប្រហែលជាអ្នកធ្លាប់ដឹងអំពីរឿងនេះច្រើនហើយតាមរយៈប្រព័ន្ធអ៊ីនធើណេតនានា ទាក់ទងនឹងការញ៉ាំមីធ្វើឲ្យក្រពះចំណាយពេលកាន់តែយូរក្នុងការរំលាយ។ យ៉ាងណាមិញ ក្រពះរបស់មនុស្សយើងមិនត្រូវបានបង្កើតឡើងដើម្បីរំលាយអាហារកែឆ្នៃដូចជាមីកញ្ចប់នេះឡើយ ដូច្នេះវាពិតជាងាយនឹងធ្វើឲ្យឈឺក្រពះបានក្រោយពីញ៉ាំមីរួច។
អាការៈមិនស្រួលផ្សេងៗទៀត
ហេតុផលមួយផ្សេងទៀតដែលធ្វើឲ្យអ្នកមិនស្រួលក្នុងក្រពះក្រោយពីញ៉ាំមីរួចគឺដោយសារតែវត្តមានសារធាតុ MSG ឬ Monosodium Glutamate ដែលជាសារធាតុផ្តល់រសជាតិដល់អាហារដ៏ពេញនិយមបំផុត ជាពិសេសផលិតផលអាហារធ្វើក្នុងប្រទេសចិនតែម្តង។ មីកញ្ចប់ភាគច្រើនដែលដាក់លក់នៅលើទីផ្សារសព្វថ្ងៃគឺមានសារធាតុ MSG ដើម្បីជំរុញឲ្យអាហារមានរសជាតិឆ្ងាញ់។ ប៉ុន្តែការញ៉ាំអាហារមានសារធាតុនេះច្រើន វាអាចធ្វើឲ្យចង្អោ ឈឺក្បាល ស្ពឹកមុខ ញ័រដើមទ្រូង និងឈឺទ្រូងបាន។
លើសសម្ពាធឈាម
នរណាក៏ធ្លាប់ដឹងហើយថា អាហារកែឆ្នៃ ឬមីកញ្ចប់ផ្ទុកទោដោយជាតិសូដ្យូមខ្ពស់ ហេតុដូច្នេះហើយការញ៉ាំមីច្រើននឹងធ្វើឲ្យសម្ពាធឈាមឡើងខ្ពស់បាន។ ម្យ៉ាងវិញទៀត មីកញ្ចប់គួរតែជាអាហារត្រូវហាមប្រាមសម្រាប់អ្នកជំងឺបេះដូង លើសសម្ពាធឈាម ឬអ្នកដែលប្រឈមខ្ពស់នឹងជំងឺទាំងនេះ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com